Akinmej kipiaj miak tomin kinpaleuiaj akinmej amo miak kipiaj

ITlaixpantijkauan Jehová tlamachtiaj ika Biblia uan kinpaleuiaj oksekimej itech kanaj 200 altepemej. Pero san 35 altepemej kitemakaj miak tomin uan ijkon kitlaxtlauaj tlen kitekitiltiaj. ¿Tlen kichiuaj tokniuan kanin amo kipiaj miak tomin?

Tokniuan tlen pouij itech Cuerpo Gobernante kitaj tlen kichiuaj oksekimej tokniuan ipan nochi tlaltikpak uan tlen moneki para kiueyichiuaskej Jehová. Nochi tomin tlen kitemakaj kuali kitaj ken kitekitiltiskej. Tla se kali Betel kiselia okachi miak tomin, kimaka okse kali Betel tlen kipoloua. Kichiuaj ijkon ken okichiuayaj tokniuan tlen okatkaj achto siglo. Yejuan okinpaleuiayaj tokniuan tlen amo okachi okipiayaj uan ijkon san se tlamantli okipiayaj (2 Corintios 8:14).

¿Tlen kijtouaj tokniuan ijkuak kiseliaj tomin tlen kintitlaniliaj? Itech altepetl Tanzania, kanaj tlajko akinmej ompa chantij kitlanij kanaj 40 pesos (2 dólares) se tonal. Okintitlanilijkej tomin para ma kiyektlalikan kali kanin monechikouaj tlen itoka Mafinga. Tokniuan okijtojkej: “Axkan okachi timiakej timonechikouaj porque yokiyektlalijkej kali kanin timonechikouaj. Tiktlasojkamatiliaj ialtepe Jehová uan tokniuan porque otechpaleuijkej. Axkan tlakualtsin kanin tikueyichiuaj Jehová”.

Sekimej tokniuan tlen chantij Sri Lanka amo kipiaj tlen kikuaskej porque onka kokolistli coronavirus. Ompa chanti tokni Imara Fernando uan ichokotsin tlen itoka Enosh. Yejuan okinpaleuijkej porque tokniuan tlen chantij itech okseki altepemej okitemakakej tomin. Imara uan ichokotsin okijkuilojkej se amatl tlen okijtouaya: “Timechtlasojkamatiliaj tokniuan porque nankiteititiaj nantechtlasojtlaj axkan ijkuak titlajyouiaj. Tipakij porque timechitaj ken tofamilia. Tiktlatlaujtiaj Jehová ma kinpaleui nochtin tokniuan itlamian ninmej tonalmej”.

Nochtin tokniuan kinpaktia kitemakaskej tlen kipiaj maski san kanin chantij. Enosh okitlali se cajita kanin kitlatis tomin para kitemakas uan ijkon kinpaleuis akinmej kinpoloua. Okse tokni tlen itoka Guadalupe Álvarez noijki kipaktia kitemakas tlen kipia. Ye chanti México kanin amo okachi kitlanij tomin uan amo patio tetlaxtlauiaj, pero ye mochijchikaua kinpaleuis oksekimej. Ye okijto: “Niktlasojkamatilia Jehová porque nechtlasojtla uan yolkuali. Ne nikmati tomin tlen tiktemakaj kinpaleuis tokniuan tlen tlajyouiaj”.

Tokniuan tlen katej Betel pakij ijkuak kintitlaniliaj tomin oksekimej tokniuan. Tokni Anthony Carvalho tlen poui inuan tokniuan tlen tlayekanaj Betel ompa Brasil, okijto: “Miak xiuitl otechpaleuijkej tokniuan tlen katej itech okseki kalmej Betel, ik non, axkan okachi titetlapouiaj. Axkan tikseliaj okachi miak tomin uan ueli tikinpaleuiaj oksekimej. Tokniuan kitaj titetlapouiaj ipan nochi tlaltikpak uan kinekij kinpaleuiskej oksekimej”.

¿Ken mopaleuiaj iTlaixpantijkauan Jehová? Moneki kitemakaskej tomin para ma motetlapoui ipan nochi tlaltikpak, uan amo ma kititlanikan itech kalmej Betel tlen katej itech okseki altepemej. Ma kitemakakan tomin itech caja kanin kijtoua “Tekitl tlen mochiua itech nochi tlaltikpak” noso itech donate.jw.org. Tikpatioitaj nochi tomin tlen nankitemakaj.