Tlakuikalmej techpaleuiaj okachi matimouikakan iuan Jehová

Tlatsotsonali uelis kichiuas kuali matimokuayejyekokan, kuali matiyetokan uan matiyolpakikan. Tlatsotsonali techtliokolia Jehová. Ijkuak tikinkakij tlakuikalmej tlen katej itech JW Broadcasting® kuali timomachiliaj uan techpaleuiaj okachi matimouikakan iuan Jehová.

Yokinchijchijkej kanaj 70 tlakuikalmej desde xiuitl 2014 uan se tlakuikali kajki kanaj ika 500 tlajtolmej. Xamo tejuatsin timotlajtlania: “¿Ken kinchijchiuaj tlakuikalmej? ¿Akinmej kinchijchiuaj?”.

Tekitl tlen kichiuaj tokniuan

Tokniuan tlen tekitij itech audio uan video uan tlatsotsonaj, kinchijchiuaj tlakuikalmej tlen katej itech JW Broadcasting uan okseki tlakuikalmej. Tekitl tlen kichiuaj kitaj tokniuan akinmej kiyekanaj tlamachtilistli tlen kinyekana Cuerpo Gobernante. 13 tokniuan kitaj ken kinchijchiuaskej tlakuikalmej uan kitaj okseki tlamantli tlen moneki. Tokniuan akinmej kiyekanaj tlamachtilistli noijki kinkauiliaj oksekimej tokniuan tlen chantij ipan nochi tlaltikpak matlapaleuikan maski katej uejka. Sekimej kinchijchiuaj tlakuikalmej, oksekimej tlatsotsonaj uan oksekimej tlakuikaj. Yejuan kuali tlapaleuiaj pero yolyamankej uan amo kinekij makinueyitlalikan.

¿Ken kinchijchiuaj tlakuikalmej? Achto, tokniuan akinmej kiyekanaj tlamachtilistli kinpejpenaj textos bíblicos para kinchijchiuaskej tlakuikalmej. Noijki kitaj tlen kinekij makimachilikan akinmej kinkakiskej. Satepan tokniuan kipejpenaj akin kijkuilos tlakuikali uan akin tlatsotsonas. Achto kichiuaj se grabación uan satepan tokniuan akinmej kiyekanaj tlamachtilistli kikakij uan kinmiluiaj tlen moneki kipatlaskej. Tokniuan tlen kinchijchiuaj tlakuikalmej kipatlaj tlen moneki uan kichiuaj okse grabación. Grabaciones kinchiuaj Betel noso tekalijtik.

Tokniuan kipiaj kanin kinchijchiuaj audios, kanin tlajkuilouaj uan okseki tlamantli. Noijki kitekitiltiaj teposmej tlen ika tlatsotsonaj, tlen ika mokaki audio uan micrófonos. Se micrófono ipati kanaj 2,000 pesos noso 20 mil pesos (100 noso 1,000 dólares). Itech xiuitl 2020 okitlaxtlajkej dos millones trescientos veinte mil pesos (noso 116,000 dólares) para kinchijchiuaskej grabaciones.

Sekimej tokniuan tlapaleuiaj maski uejka inchan uan ijkon amo miakej tokniuan katej Betel. Kitlaliaj tlatsotsonali itech programas tlen kinpiaj computadoras uan amo tokniuan tlatsotsonaj.

“Tlakuikalmej sapanoua nechpaleuiaj”

Tokniuan kinpaktia kinkakiskej tlakuikalmej. Se tokni tlen itoka Tara uan chanti Alemania okijto: “Tlakuikalmej nechyolchikauaj ijkuak sapanoua nimotekipachoua. Yetoskia ken Jehová nechnapaloua ijkuak nikinkaki tlakuikalmej ika notlajtol”. Okse tokni tlen itoka Dimitri uan chanti Kazajistán okijto: “Nechpaktia nikinkakis tlakuikalmej porque nikmati nochi tlen kijtoua kisa itech Biblia. Noijki nechpaleuiaj okachi maniktekichiuili Jehová”.

Se tokni tlen itoka Delia uan chanti Sudáfrica okijto tlen kimachilia ijkuak kinkaki tlakuikalmej: “Tlakuikalmej sapanoua nechpaleuiaj ijkuak nimoyolkokoua noso nitlajyouia. Kuali nimomachilia ijkuak nikinkaki”.

Miakej kinpaktia nonmej tlakuikalmej. Se tokni tlen itoka Lerato uan noijki chanti Sudáfrica okijto: “Ijkuak nikinkaki tlakuikalmej Ayakmo miak poliui uan Melauak tiyolpakiskej, nimokuayejyekoua yokiyolitijkej nonantsin. Nikita ompa uits uan nechnapaloua”.

Se ichpochtli tlen chanti Sri Lanka sapanoua okiyolchika se tlakuikali. Ye okijto: “Akin onechmachtiaya escuela onechilui miak tlamantli inmixpan oksekimej porque niiTlaixpantijka Jehová. Amitlaj onikilui porque sapanoua onimomojti. Ijkuak oniajsito nokalijtik, nonantsin onechilui manikkaki tlakuikali Fuerte tú serás. Non tlakuikali onechpaleui manikajsikamati omonekiaya nimomachtis para uelis nitlanankilis ijkuak ikaj itlaj nechiluia. Mostlatika onimotlapoui iuan akin onechmachtiaya uan onechilui okachi okajsikamatki tlen nikneltoka. Niktlasojkamatilia ialtepe Jehová porque kinchijchiua tlakuikalmej tlen techyolchikauaj”.

¿Kanin kikuitiuij tomin para kinchijchiuaskej tlakuikalmej? Tomin tlen nankitemakaj ika nochi namoyolo tlapaleuia makinchijchiuakan. Timechtlasojkamatiliaj porque nankitemakaj namotomin. Nin tomin miakej kitemakaj kanin kijtoua donate.jw.org.