¿Okachi kuali tiyetoskej tla itlaj tikchixtokej?

SE CHOKOTSIN tlen omotokayotiaya Daniel yikin okipiaya majtlaktli xiuitl uan yisexiuitl okipiaya cáncer. Itatajuan uan tepajtijkej okijtouayaj ayakmo pajtiskia, pero ye amo ijkon omokuayejyekouaya. Okijtouaya ijkuak moskaltiskia momachtiskia para kajsiskia ipajyo cáncer. Ye okichixtoka se tepajti tlen okixmatiaya cáncer tlen okipiaya. Pero ijkuak oajsik tonal tepajti amo ueli oyajki. Ik non, Daniel sapanoua omoyolkoko uan okualanki. San opanok seki tonalmej uan oixpoliuik.

Tlen okipanok Daniel okijto se ixtlamatki tlen kita kox techpaleuia ijkuak itlaj tikchiaj uan ijkuak ayakmo itlaj tikchia. Xamo ijkon okipanok ikaj tlen tikixmati. Ma tikijtokan se siuatl tlen yikipia miak xiuitl uan ayakmo miak poliui para ixpoliuis, kichia ikaj ma kitlajpaloti noso ok itlaj kichixtok. Ijkuak panoua tlen okichixtoka, siuatsintli ixpoliui. ¿Tlen okipaleui ma tlaxiko? ¿Techpaleuia ijkuak itlaj tikchiaj?

Sekimej ixtlamatkej kijtouaj timoyolchikauaj uan okachi tichikajtokej ijkuak itlaj tikchiaj. Pero amo nochtin ixtlamatkej ijkon mokuayejyekouaj. Yejuan kijtouaj amitlaj kiteititiaj kox techpaleuia ijkuak itlaj tikchiaj. Noijki kijtouaj ikaj amo uelis pajtis san porque itlaj kichixtok.

Yiuejkika sekimej noijki ijkon omokuayejyekouayaj. Yikipia miak xiuitl se ixtlamatki tlen oneski ompa Grecia, okijto akin itlaj kichixtok san temiki. Se tlakatl tlen amo yiuejkika okatka, okijto ikaj amo kipias tlen kineki tla san mochixtos.

Ik non, xamo timotlajtlaniaj, ¿kox ipati itlaj tikchixtoskej? ¿Noso melauak techpaleuis ma tiyolpakikan uan ma tichikajtokan tla itlaj tikchixtokej?

¿Tleka moneki itlaj tikchiaskej?

¿TLEN kipanoskia Daniel tla ok tepitsin moyolchikauaskia? ¿Pajtiskia? ¿Ok yoltoskia? Amo tikmatij. Nion akinmej kineltokaj okachi kuali timomachiliaj ijkuak itlaj tikchiaj, amo uelis kijtoskiaj kox Daniel ok yetoskia. Amo ma timokuayejyekokan nochipa tipajtiskej noso ayakmo titlajyouiskej tla itlaj tikchixtokej.

Itech seki noticias se tepajti tlen itoka Nathan Cherney okijto ijkuak ikaj sapanoua mokokoua, amo kipaleuis tla san kichixtos itlaj ma pano. Noijki okijto: “Ualeua tlakamej kinmajuaj insiuauan porque amo moyolchikauaj nion amitlaj kichiaj. Akinmej ijkon mokuayejyekouaj kineltokaj ikaj amo pajti porque amo mochijchikaua yolpakis. Pero amo melauak tlen mokuayejyekouaj”.

Akinmej sapanoua mokokouaj moneki mochijchikauaskej miak para moyolchikauaskej. Ik non, infamilia uan akinmej inmiuan mouikaj, amo ma kiluikan tleka amo moyolchikauaj. Pero axkan xamo timotlajtlaniaj: ¿amitlaj ipati itlaj tikchiaskej?

Amo ijkon ma timokuayejyekokan. Tepajti tlen yotikijtojkej kinpaleuia akinmej chikauak mokokouaj para amo okachi ma tlajyouikan ijkuak kitaj ayakmo pajtiskej. Tepajtijkej kineltokaj tla kuali momachilis uelis pajtis maski sapanoua mokokoua. Yimiakej ijkon okinpanok.

Mitspaleuis tla itlaj tikchia

Se tepajti tlen itoka W. Gifford-Jones okijto: “Uelis pajtis akin itlaj kichia”. Ye okitak ken kinpaleuia ijkuak kinyolchikauaj akinmej sapanoua mokokoua uan yiixpoliuiskej. Ijkuak kinyolchikauaj, okachi tlaxikouaj. Itech xiuitl 1989 tepajtijkej okitakej akinmej okinyolchikajkej okachi uejkika otlaxikojkej pero amo kijtosneki ok miak xiuitl oyoltokaj. Ixtlamatkej kijtouaj akinmej kinyolchikauaj amo okachi motekipachouaj nion tlajyouiaj.

Ixtlamatkej kijtouaj tlen kinpanoua akinmej ijyotlamij tla moyolkokouaj noso yolpakij. Okintlajtlanijkej kanaj mil trescientos tlakamej kox kuali omomachiliayaj. Opanok kanaj majtlaktli xiuitl uan oksepa okintlajtlanijkej ken omomachiliayaj uan kanaj ciento sesenta okijtojkej oijyotlamiayaj. Miakej ijkon okinpanok porque omoyolkokouayaj. Se siuatl tepajti okijto: “Tla amo timoyolkokouaj, okachi kuali timomachiliskej”.

Ixtlamatkej kijtouaj okachi totoka pajtij akinmej amo okachi motekipachouaj ijkuak kinchiuiliaj se operación. Akinmej yolpakij okachi miak xiuitl yoltokej. Sekimej tlen yikipiaj miak xiuitl okintlajtlanijkej ken momachiliaj uan omoyolchikajkej ijkuak okinmiluijkej yejuan okachi ixtlamatkej. Tlen okinmiluijkej okinpaleui ken yetoskia okichijkej ejercicio doce semanas.

¿Tleka okachi kuali momachiliaj akinmej yolpaktokej? Xamo nion tepajtijkej nion ixtlamatkej kajsikamatij tleka. Pero sekimej ixtlamatkej kijtouaj tleka ualeua ijkon panoua. Se tepajti okijto: “Akin yolpaki amo motekipachoua, ik non, amo okachi mokokoua. Ik non, miak ipati timochijchikauaskej para amo timokokoskej”.

Xamo ixtlamatkej yikin okimatkej tlen okitakej. Pero yiuejkika toTajtsin Dios okinauati se ueyi tekiua tlen omotokayotiaya Salomón ma kijkuilo: “Akin yolpaki chikajtok pero akin moyolkokoua kipoloua ichikaualis” (Proverbios 17:22). Melauak tlen kijtoua nin texto. Biblia amo kijtoua pajtis akin yolpaki san kijtoua kipaleuis.

Tla tipajtiskiaj san porque kuali timomachiliaj, nochtin tepajtijkej techpaleuiskiaj kuali ma timomachilikan. Pero tla itlaj tikchiaj, techpaleuis kuali ma timomachilikan.

Techpaleuis tla tiyolpakij

Ixtlamatkej kijtouaj akinmej yolpakij okachi miak tlamantli kichiuaj. Okachi kuali momachtiaj, tekipanouaj uan mauiltiaj. Ma tikitakan tleka ijkon tikijtouaj. Okintlajtlanijkej sekimej ichpokamej tlen motlalouaj. Akinmej kinpaleuiaj ma motlalokan okitakej sejse tlen uelis kichiuaskiaj uan okintlajtlanijkej kox tlatlaniskiaj. Ijkuak omotlalojkej, ichpokamej sapanoua omochijchikajkej amo ken okijtouayaj akinmej okinpaleuiayaj. Ken tikita timoyolchikauaj tla itlaj tikchiaj.

Ixtlamatkej yokitakej tlen kinpanoua akinmej san motekipachojtokej. Yikipia kanaj cincuenta xiuitl ixtlamatkej okitakej yolkamej uan noijki tejuan tla san timoyolkokojtokej, amo tichikajtoskej. Okintlalijkej sekimej tlakamej uan okinmiluijkej ijkuak kinkuejsoskia tlen okikaktokaj uelis kiseuiskiaj tla kilnamikiskiaj ken seui. Nochtin okiseuijkej.

Satepan oksekimej okinmiluijkej ijkon ma kichiuakan pero amo ueli okiseuijkej uan ayakmo omochijchikajkej. Ijkuak oksepa ijkon okichijkej sekimej okineltokaya amo uelis seuiskia, ik non, amo omochijchikajkej. Pero oksekimej omochijchikajkej porque omokuayejyekouayaj uelis kiseuiskiaj.

Ijkuak ijkon okichijkej doctor Martin Seligman otlapaleui uan okitak miak ipati momachtiskia tlen panoua ijkuak ikaj yolpaktok noso san motekipachouaj. Okitak akinmej san motekipachouaj ualeua amo ueli itlaj kichiuaj. Ye okijto: “Yikipia veinticinco xiuitl nikita tlen kinpanoua akinmej san motekipachouaj, yejuan kineltokaj intlajtlakol nochi tlen kinpanoua uan maski san tlen kichiuaskej nochipa ijkon kinpanos. Yonikitak akinmej ijkon mokuayejyekouaj okachi tlajyouiaj amo ken akinmej yolpakij”.

Ken yotikijtojkej akinmej timomachtiaj Biblia tikmatokej techpaleuia tla tiyolpakij. Xikita tlen kijtoua Proverbios 24:10: “Tla timoyolkokoua ijkuak timotekipachoua, amo tiyolchikajtos”. Biblia kijtoua tla san timotekipachojtokej amo tiyolpakiskej uan amitlaj tikchiuaskej. ¿Tlen techpaleuis amo san ma timotekipachojtokan?

[Foto]

Techpaleuis tla itlaj tikchixtokej

¿Tlen techpaleuis amo san ma timotekipachojtokan

¿TLEN tikchiuaj ijkuak titlajyouiaj? Tlen tikchiuaj kiteititia kox timochijchikauaj noso san timotekipachojtokej. Tinochtin titlajyouiaj, pero ¿tleka sekimej sapanoua motekipachouaj ijkuak itlaj kinpanoua uan oksekimej amo?

Ma tikijtokan tejuatsin tiktemoua kanin titekipanos. Maski yotikijto tlen tikmati tikchiua amo mitstlakeuaj. ¿Ken timomachilis? Xamo timokuayejyekos nochipa ijkon mitspanoua uan amo keman tikpias tekitl. Noso uelis timokuayejyekos amitlaj mopati porque amo omitsmakakej tekitl. Tla ijkon timokuayejyekoua kijtosneki san timotekipachojtok.

¿Tlen mitspaleuis amo san ximotekipachojto?

Achto moneki tikmatis keman ijkon mitspanoua. Satepan ximochijchikaua amo ijkon ximokuayejyeko uan xikita tleka ijkon mitspanoua. Ximokuayejyeko, ¿amo omitstlakejkej porque amo tikmati titekipanoua noso porque yikipiaj akin kichiua?

Para tikmatis kox san timotekipachojtok, xikita tlen timokuayejyekoua uan tlen melauak tikmati. ¿Timokuayejyekoua amitlaj mopati ijkuak amo mitstlakeuaj? ¿Noso timokuayejyekoua tlen tikmati tikchiua, ken kuali timouika iuan toTajtsin Dios , mofamilia uan moyolikniuan? Amo ximokuayejyeko nochipa amo kuali tlen tikchiuas. ¿Ken tikmati amo keman tikajsis tekitl? Axkan ma tikitakan tlen techpaleuis amo san ma timokuayejyekojtokan techpanos tlen amo kuali.

Uelis tikchiuaskej tlen tiknekij

Ixtlamatkej amo kuali kajsikamatij tlen kijtosneki itlaj tikchiaskej, san kijtouaj uelis tikchiuaskej noso tikpiaskej tlen tikchiaj. Itech okse tlamachtil tikitaskej amo san moneki tikneltokaskej uelis tikchiuaskej tlen tiknekij, pero tlen kijtouaj ixtlamatkej techyolchikaua para ma tikneltokakan uelis itlaj tikchiuaskej.

Achto ma timokuayejyekokan itlaj tlen amo oui tikchiuaskej. Uan ijkuak yotikchijkej, ma timokuayejyekokan tlen okseki uelis tikchiuaskej. Tla tikita amo tikchiua tlen tikijtoua, ximokuayejyeko tleka ijkon mitspanoua. Achto ximotlajtlani tlen tikneki tikchiuas, porque xamo tikchiua miak tlamantli uan amo timajxilia tikchiuas tlen mitspaktiskia. Tlen kijtoua Biblia techpaleuia, ompa kijtoua: “Ijkó nochipa nonkimatiskeh ken ijki nonkipejpenaskeh tlan okachi kuali” (Filipenses 1:10).

Achto moneki tikajsikamatiskej tlen okachi ipati ijkuak tiktekichiuiliaj toTajtsin Dios, ijkuak tikatej iuan tofamilia noso kanin titekipanouaj. San ma tikpejpenakan tlen uelis tikchiuaskej, tla amo san timosotlauaskej uan amitlaj tikchiuaskej. Tla achto tikchiuaj tlen amo oui, satepan uelis tikchiuaskej tlen okachi oui.

Miakej kijtouaj tla melauak tiknekij itlaj tikchiuaskej, timochijchikauaskej hasta tikchiuaskej. Tla timokuayejyekouaj ken techpaleuis tlen tiknekij tikchiuaskej, okachi timochijchikauaskej uan amitlaj tikkauiliskej ma techtsakuili.

Ma timokuayejyekokan ken uelis tikchiuaskej tlen tiknekij. Ixtlamatki tlen itoka C. Rick Snyder okijto moneki itlaj tikchiaskej, noijki okijto moneki timokuayejyekoskej tla itlaj amo ueli tikchiuaj, ma tiktemolikan ken uelis tikchiuaskej. Ijkon tla itlaj amo techpaleuia, okse tlamantli ma tikchiuakan hasta tikchiuaskej tlen tiknekij.

Snyder noijki okijto moneki tikmatoskej keman tikpatlaskej itlaj tlen otiknekiayaj tikchiuaskej. Tla amo ueli tikchiuaj itlaj, san timoyolkokoskej. Pero tla tikpatlaj tlen tiknekij tikchiuaskej, timochijchikauaskej ijkon tikchiuaskej.

Biblia techiluia tlen uelis techpaleuis. Yiuejkika okatka se ueyi tekiua tlen itoka David. Ye okinekiaya kichijchiuilis toTajtsin Dios iteokal. Pero toTajtsin Dios okijto kichijchiuaskia ikone David tlen omotokayotiaya Salomón. David amo okualanki porque ye amo kichijchiuaskia. Opejki mokuayejyekoua ken uelis tlapaleuiskia, ik non, opejki kinechikoua tomin uan okseki tlamantli tlen Salomón ika kichijchiuaskia teokali (1 Reyes 8:17-19; 1 Crónicas 29:3-7).

Maski itlaj tikchiaj uan timochijchikauaj tiyolpakiskej, xamo amo ueli tikchiuaj tlen tiknekij. Xamo ijkon techpanoua porque amo ueli tikyektlaliaj nochi tlen techyolkokoua. Xamo timokuayejyekouaj amo uelis itlaj kuali tikchiuaskej porque miakej kichiuaj tlen amo kuali, onka guerras, miakej mokokouaj uan ixpoliuij. Ik non, ¿tlen techpaleuis amo ma timosotlauakan?

[Foto]

Tla amo omitstlakejkej, ¿kijtosneki amo keman tikajsis tekitl?

[Foto]

David okipatlak tlen okinekiaya kichiuas

¿Tlen techpaleuis ma tikchiakan itlaj tlen kuali?

MA TIKIJTOKAN tikpia se reloj uan ijtlakaui. Katej miakej tlen kijtouaj uelis kiyektlaliskej. Satepan tikmati se tlakatl tlen chanti ik kanin tichanti, ye okichijchi reloj tlen tikpia uan mitsiluia mitsyektlalilis uan amitlaj tiktlaxtlauilis. San niman ye tikiluis ma mitsyektlalili.

Ijkuak itlaj tikchia, yetoskia ken timochixtok ma kiyektlalikan moreloj. Tla timokuayejyekoua ayakmo panos tlen tikchixtok, ¿tlen uelis mitspaleuis? Miakej kijtoskej uelis mitspaleuiskej pero tlen mitsiluiskej xamo mitstlapololtis. Ik non, okachi kuali ma tikitakan tlen techiluia toTajtsin Dios, porque ye otechchijchi uan san ye uelis techpaleuis. Biblia kijtoua “Dios amo wejka kajki de tejwah tinochteh” uan kineki techpaleuis (Hechos 17:27; 1 Pedro 5:7).

¿Tlen kijtosneki itlaj tikchiaskej?

Biblia okachi kuali techyekiluia tlen kijtosneki itlaj tikchiaskej uan amo ken kijtouaj ixtlamatkej uan akinmej tlapajtiaj. Ijkuak Biblia kijtoua itlaj tikchiaj ma pano, kijtosneki tikchiaj ika nochi toyolo ma pano tlen kuali. Noijki tikchiaj porque onka seki tlamantli tlen kiteititia melauak mochiuas. Tlen Biblia kijtoua melauak mochiuas porque onka miak tlamantli tlen ijkon kiteititia.

Ijkuak tikchiaj itlaj ma pano, noijki ijkon ken ijkuak titlaneltoka porque tikmatokej melauak mochiuas tlen tikneltokaj (Hebreos 11:1). Pero Biblia kijtoua se tlamantli kijtosneki titlaneltokaskej uan okse tlamantli kijtosneki itlaj tikchiaskej (1 Corintios 13:13).

Para tikajsikamatiskej, ma tikijtokan akin iuan timouikaj tikiluiaj ma techpaleui, ijkon tikiluiaj porque tikmatokej techpaleuis. Ijkon tikneltokaj porque tikixmatij uan achto yotechpaleui uan tikmatokej yolkuali. Ken yotikijtojkej, amo san se tlamantli kijtosneki itlaj tikneltokaskej uan itlaj tikchiaskej. Ik non, ¿tlen techpaleuis ma tikchiakan toTajtsin Dios kichiuas nochi tlen yokijto?

¿Tleka itlaj tikchiaj?

Tikchiaj tlen toTajtsin Dios Jehová yokijto kichiuas. Yiuejkika israelitas okineltokayaj ye kichiuaskia tlen okijto (Jeremías 14:8). Nochi tlen okichiayaj toTajtsin Dios okinmilui, ik non, okineltokayaj san ye uelis kinpaleuiskia. Amo san okichiayaj ma pano, okineltokayaj panoskia porque toTajtsin Dios okinmititi melauak mochiuaskia. Ye nochipa okichiuaya tlen okijtouaya, ik non, uelis kineltokaskiaj tlen okinmiluiaya. Se tlakatl tlen omoyokayotiaya Josué uan okinyekanaya israelitas okijto: “Namejuan kuali nankimatij [...] nion se tlajtoli opoliuik tlen okijto Jehová namoDios” (Josué 23:14).

Axkan noijki mochiua nochi tlen kijtoua Jehová. Biblia kijtoua seki tlamantli tlen toTajtsin Dios okijto kichiuaskia uan noijki kijtoua ken omochi. Ualeua itech Biblia kijtoua ken yimochiuaskia porque melauak ijkon panos.

Tlen kijtoua Biblia techpaleuia ma tikmatikan tlen panos satepan. Okachi tikneltokaskej tlen kijtoua toTajtsin Dios, tla okachi timomachtia nochi tlen yokichi. Tlatitlanil Pablo okijto: “Nochi tlan yowejka omoijkuilo itech tiotlajkuíloli, omoijkuilo para matimoixtlamachtikah, para matikchiakah ika yolsewílistli tlan Ye yokijto techmakas” (Romanos 15:4).

¿Tlen techiluia toTajtsin Dios kichiuas?

¿Keman okachi tiknekiskiaj ma pano tlen kuali? Ijkuak ixpoliui ikaj tlen tiktlasojtlaj. Pero miakej ijkuak ikaj ixpoliui san moyolkokojtokej uan mokuayejyekouaj ayakmo keman kuali yetoskej. Ijkuak ikaj ixpoliui sapanoua timoyolkokouaj uan tinochtin ijkon techpanoua. Xamo ijkon timomachiliaj uan amitlaj ueli tikchiuaj. Ik non, Biblia kijtoua mikilistli yetoskia ken ikaj akin techkokolia (1 Corintios 15:26).

¿Tlen uelis techyolseuis ijkuak ikaj ixpoliui? Versículo noijki kijtoua toTajtsin Dios kipojpolos mikilistli. Ye yotechititi kipia okachi miak chikaualistli, ik non, uelis kipojpolos mikilistli. Ijkon tikijtouaj porque Biblia kijtoua sekimej okinyoliti.

Se tonal okipaleui iKone uan okiyoliti se iyolikni tlen omotokayotiaya Lázaro, maski yokipiaya naui tonal yoixpolijka. Jesús okiyoliti Lázaro inmixpan miakej (Juan 11:38-48, 53; 12:9, 10).

Xamo timokuayejyekoua tleka okinyolitijkej tla satepan oksepa oixpolikej. Pero tlen opanok techpaleuia ma tikneltokakan melauak kinyolitiskej akinmej yoixpolikej. Uan amo san timokuayejyekouaj ijkon panos, melauak panos.

Jesús okijto: “Ne niktemaka nemílistli iwa yolílistli” (Juan 11:25). ToTajtsin Dios kimakas chikaualistli Jesús para miakej kinyolitis. Noijki Jesús okijto: “Ajsiki n ora ijkuak nochteh non yomikkeh iwa tooktokeh kikakiskeh itlajtol [Jesús]. Iwa kisaskeh de inmiketekochwah” (Juan 5:28, 29). Akinmej yoixpolikej kinyolitiskej uan uelis yoltoskej itech xochitlali.

Tlatitlanil Pablo okijto: “Moyolitiskeh, akimeh otlájtlakolchijkeh iwa akimeh amó” noso akinmej yolmelauakej uan akinmej amo yolmelauakej (Hechos 24:15).

Ijkuak ikaj tsaktok ifamilia amo kilkaua uan kichixtokej ma kisa, noijki ijkon Jehová kinmilnamiktok akinmej yoixpolikej (Lucas 20:37, 38). Ijkuak tlaltikpak mokopas se xochitlali kinyolitiskej akinmej yoixpolikej uan infamilia yolpakiskej ijkuak kinseliskej.

¿Ken techpaleuia ijkuak itlaj tikchiaj ma mochiua?

Pablo okijto sapanoua techpaleuia tla itlaj tikchiaj. Okijto yetoskia ken casco tlen okimotlaliliayaj soldados (1 Tesalonicenses 5: 8). Ijkon okijto porque yiuejkika soldados okimotlaliliayaj ken se casco tlen okichijchiuayaj ika tepostli uan tlatlanpa okimotlaliliayaj se tsotsoli. Uan okinpaleuiaya ijkuak omoteuiayaj para amo ma kinkojkokan. Ijkon ken casco okinpaleuiaya soldados, tlen tikchiaj techpaleuia amo san ma timoyolkokojtokan. Tla melauak tikneltokaj tlen toTajtsin Dios kichiuas, techpaleuis amo sapanoua ma timotekipachokan maski titlajyouiskej. Tinochtin tiknekij ma techyolchikaua tlen tikchiaj.

Pablo okse tlamantli okineskayoti tlen tikchiaj. Ye okijto: “Tlan tejwah tikchiah, tikchiah ika totlaneltokalis, kemi se tépostli ankla non kitsoponia ijtik atl iwa amo kikawilia mamolini n barko” (Hebreos 6:19). Pablo okimatoka tleka miak ipati se barco ma kipia ancla porque miak uelta oapolakej ijkuak oyayaj itech barco. Tla ancla otlakitskijtoka uejkatlan, ejekakiauitl amo kixijxitiniskia barco nion kiuikaskia itempa atl kanin uelis motlauitekiskia itech uejueyij tetl.

Tla tejuan melauak tikneltokaj tlen toTajtsin Dios kichiuas, techpaleuis ma tikxikokan nochi tlen axkan tikixnamikij. Jehová techiluia san niman ayakmo yetos guerras, ayakmo yetoskej akinmej amo yolkualmej, ayakmo ikaj tlajyouis uan ayakmo ikaj ixpoliuis (xikita recuadro tlen kajki itech página 10). Tla tikilnamiktoskej tlen toTajtsin Dios kichiuas, techpaleuis amo ma titlajtlakolchiuakan ken axkan miakej kichiuaj.

Tejuatsin noijki uelis tikitas tlen toTajtsin Dios kichiuas. Ye kineki nochipa xiyolto ijkon ken achto okinekiaya ma tiyetokan. Biblia kijtoua “Ye kineki mamomakixtikah nochteh”. ¿Ken uelis momakixtiskej? Moneki ma momachtikan iTlajtol toTajtsin Dios (1 Timoteo 2:4). Timitsyoleuaj ximomachti iTlajtol toTajtsin Dios. Tlen ye techiluia techmakas, okachi kuali amo ken tlen oksekimej kijtouaj techmakaskej.

ToTajtsin Dios techpaleuis ma tikchiuakan tlen ye kipaktia uan ijkon timoyolchikauaskej (2 Corintios 4:7; Filipenses 4:13, TNM). ¿Amo melauak tinochtin techpaleuia tikmatiskej tlen kichiuas toTajtsin Dios? Tla tejuatsin tikneki tikmatis itlaj tlen mitsyolchikauas, amo ximosojsotlaua, uelis tikmatis.

[Recuadro uan foto]

¿Tleka uelis tikneltokaskej kuali tiyetoskej?

Textos tlen nikan katej techpaleuiaj ma tikchiakan tlen kuali.

◼ ToTajtsin Dios techiluia tinochtin tiyolpakiskej.

ITlajtol kijtoua tlaltikpak mokopas se xochitlali uan tinochtin san sekan tiyetoskej uan tiyolpakiskej (Salmo 37:11, 29; Isaías 25:8; Apocalipsis 21:3, 4).

◼ ToTajtsin Dios amo tlakajkayaua.

Ye amo kipaktia ma titlakajkayauakan. Jehová santo, ik non, amo tlakajkayaua (Proverbios 6:16-19; Isaías 6:2, 3; Tito 1:2; Hebreos 6:18).

◼ ToTajtsin Dios kipia sapanoua miak chikaualistli.

San ye Jehová akin sapanoua chikauak. Amikaj nion amitlaj kitsakuilis para kichiuas tlen yokijto (Éxodo 15:11; Isaías 40:25, 26).

◼ ToTajtsin Dios kineki nochipa ma tiyoltokan.

(Juan 3:16; 1 Timoteo 2:3, 4.)

◼ ToTajtsin Dios kita toyolo.

ToTajtsin Dios kita tlen kuali tikchiuaj uan amo tlen amo kuali tikchiuaj (Salmo 103:12-14; 130:3; Hebreos 6:10, TNM). Ye kichia ma tikchiuakan tlen kuali uan yolpaki ijkuak ijkon tikchiuaj (Proverbios 27:11).

◼ ToTajtsin Dios techpaleuis ma tikchiuakan tlen tiknekij.

Tiitekipanojkauan toTajtsin Dios amo toselti tikatej. Ye techpaleuia ika iespíritu santo tlen sapanoua chikauak (Filipenses 4:13, TNM).

◼ ToTajtsin Dios kinamiki itech ma titlaneltokakan.

ToTajtsin Dios nochipa kichiua tlen kijtoua uan amo keman techyolkokos (Salmo 25:3).

[Foto]

Ijkon ken soldados okinpaleuiaya casco, noijki ijkon ijkuak itlaj tikchiaj techpaleuia amo sapanoua ma timotekipachokan

[Foto]

Ijkuak tikneltokaj tlen toTajtsin Dios kichiuas, techpaleuia ijkon ken se ancla kipaleuia se barco

[Foto]

Okitemakak René Seindal/Su concessione del Museo Archeologico Regionale A. Salinas di Palermo