¡Xochitlal amo uejka yetok!

Tlamantli tlen amo kuali mochijtok itech Tlaltikpak, techititia ke Xochitlal amo uejka yetok. Achto mochiuas Xochitlal, Biblia okijto panoskia tonalmej tlen oui yetoskia. Axkan tiyetokej itech non tonalmej. Nikan tikitaskej san sekimej tlamantli tlen Biblia okijto panoskia:

Uejueyi guerras. “Se país momakas iuan okse país, iuan se pueblo momakas iuan okse pueblo.”(Mateo 24:7.) Nin tlajtol yomochi. Ipan xiuitl 1914 pampa tlayekapa yomochijkej ome uejueyi guerras uan noijki oksekimej guerras tlen amo uejueyi. Sapanoa miakej tlaltikpaktlakamej yomikej itech yejuan.

Sentetl onka kokolismej. “Yetos kokolistle” (Lucas 21:11). ¿Yomochi nin tlajtol? Kema. Cáncer, diabetes, tuberculosis, paludismo, sida uan oksekimej kokolismej yokinmiktijkej sapanoa miakej tlaltikpaktlakamej.

Amo yetos tlakuali. Ipan nochi Tlaltikpak, tlaltikpaktlakamej amo kipiaj tlen kikuaskej. Nochtin xiuitl sapanoa miakej tlaltikpaktlakamej mikij ika apistli. Nin noijki kiteititia ke Xochitlal amo uejka yetok. Biblia kijtoa: “Yetos apistle” (Marcos 13:8).

Chikauak tlalolinis. “Tlalolinis [chikauak] nian nepa.” (Mateo 24:7.) Nin tlajtol noijki yomochi ipan totonaluan. Ipan xiuitl 1914 pampa tlayekapa kanaj se millón tlaltikpaktlakamej yomikej ijkuak chikauak tlalolini.

Tlaltikpaktlakamej amo yolkualmej. Tlaltikpaktlakamej “kiuelistaskej tomin” uan “yeskej tsotsokamej”. “Kinekiskej san [...] mopaktiskej iuan mach kinekiskej kiueyikixtiskej in toTajtsin Dios.” Uan konemej “mach kintlakitaskej intajuan” (2 Timoteo 3:1-5). ¿Amo tikita tejuatsin axan ijkon kichiuaj miakej tlaltikpaktlakamej? Amo kitlakaitaj toTajtsin Dios uan kintlajyouiltiaj akinmej kinekij kixmatiskej.

Tlachiualismej tlen amo kuali. Noijki “sa tekitl momiekilis miek tlajtlakole” (Mateo 24:12). Uelis noijki tejuatsin tikijtos ke itech nin tonalmej okachi mochijtok tlamantli tlen amo kuali. Melauak, nochtin tlaltikpaktlakamej majmauij pampa uelis kintlachtekiliskej, kinkajkayauaskej noso kinkojkokoskej.

Nochi nin tlamantli kinextia ke amo uejka yetok iTekiuajkayo toTajtsin Dios. Biblia kijtoa: “Ijkon noijki, nijkuak ankitaskej peuas panoskej in yonmej tlamantin, xikmatikan ya [...] peuas tlanauatis in toTajtsin Dios” (Lucas 21:31). ¿Tlen kijtosneki iTekiuajkayo toTajtsin Dios? Ye se tekiuajkayotl tlen toTajtsin Dios yokitlali itech iluikak tlen kichiuas Tlaltikpak ma mokuepa se Xochitlal. ITekiuajkayo toTajtsin Dios kinkixtis nochtin akinmej tlanauatiaj ipan Tlaltikpak (Apocalipsis 11:15).