Daniel okijto panoskiaj 7 semanas uan 62 semanas, nochi nin mochiuaj 69 semanas. Ninmej semanas opejkej itech xiuitl 455 a.i.x. 1 uan tlamiskiaj ijkuak ualaskia Mesías. ¿Keski uejkauaskiaj ninmej semanas? Ijkon ken kijtoaj okseki biblias, ninmej semanas amo kijtosnekij semanas tlen kipiaj chikome tonalmej, ninmej semanas kijtosneki xiuitl. Nin kijtosneki se semana kipia chikome xiuitl. Judíos tlen yiuejkika okatkaj kuali okimatiayaj tlen kijtosneki semanas ika xiuitl, noso chikome xiuitl. Se neskayotl, ijkuak oajsiaya xiuitl chikome judíos omoseuiayaj sábado (Éxodo 23:​10, 11). Ik non, 69 semanas tlen okijto Daniel kijtosneki xiuitl, nochi kichiuaj 483 xiuitl.

Axkan san moneki ma tikpoakan nochi. Tla tejuan peua tikpoaj ninmej 483 xiuitl itech xiuitl 455 a.i.x. 1 tiajsij itech xiuitl 29, ijkuak omoapolakti Jesús uan omochi Mesías (Lucas 3:​1, 2, 21, 22).a ¿Amo melauak nochi tlen okijto Daniel omochi?

TOTAJTSIN JEHOVÁ okinmilui iteotlajtojkej miak tlamantli itech Mesías, akin Techmakixtia tlen omoijto ualaskia. Pampa omoijto kanin nesiskia, tekitl tlen kichiuaskia uan ken mikiskia, amo oui kimatiskiaj akin yetoskia Mesías. Melauak tetlajtlachialtia tikmatiskej ken nochi tlen omoijto itech Jesús omochi. Ma tikitakan tlen omoijto itech kanin nesiskia uan tlen panoskia ijkuak ye okatka chokotsin, uan tikitaskej ken melauak omochi nochi tlen omoijto.

Teotlajtojki Isaías yiuejkika okijto se ixui ueyi tekiua David yetoskia Mesías (Isaías 9:7). Uan ijkon omochi: Jesús melauak okatka se ixui ueyi tekiua David (Mateo 1:1, 6-17).

Miqueas, se iteotlajtojki toTajtsin Dios okijto Jesús nesiskia itech “Belén Efrata” uan noijki okijto yetoskia ueyi tekiua (Miqueas 5:2). Ijkuak Jesús oneski, okatkaj itech Israel ome altepemej tlen omotokayotiayaj Belén. Se okatka norte ik Nazaret uan okse itech Judá ik Jerusalén. Non omokauaya okachi ik Jerusalén achto omotokayotiaya Efrata. Uan ompa oneski Jesús, ijkon omochi tlen okijtojkej teotlajtojkej (Mateo 2:1).

Itech Biblia techiluia tlen okse tlamantli panoskia, okijto toTajtsin Dios kinotsaskia iKone pampa ma kisa itech “Egipto”. Uan ijkon opanok, Jesús okiuikakej Egipto ijkuak ok chokotsin okatka, uan satepan, ijkuak omikik tekiuaj Herodes Jesús oksepa oyajki ialtepe. Uan ijkon omochi tlen omoijto (Oseas 11:1; Mateo 2:15).

Itech página 200 tikitas se recuadro tlen itoka “Tlen omoijto”, ompa katej seki tlaxelolmej tlen katej itech Biblia tlen kijtoa tlen panoskia ijkuak ualaskia Mesías. Noijki timitsyoleuaj xikita kox san se tlamantli kijtoaj tlaxelolmej tlen katej kanin kijtoa “Ken omochi”. Ijkon okachi kuali tikmatis itlajtol toTajtsin Dios melauak.

Ijkuak tikintlajtoltis ninmej tlaxelolmej, amo xikilkaua nin omoijto miak xiuitl achto nesiskia Jesús nikan Tlaltikpak. Jesús okijto: “Nochi tlan ijkuilitok itech itlanawatil Moisés iwa itech intlajkuilolwah n profetas iwa itech salmos, ye tlan nimochiwaskia” (Lucas 24:44). Ken uelis tikitas itech moBiblia, nochi omochi ken omoijto.

AKINMEJ tlaneltokaj itech Trinidad kijtoaj itech toTajtsin Dios katej eyi: toTajtsin, teKone uan Espíritu Santo. Uan kijtoaj ninmej eyi san sekan katej, nochi ueli kichiuaj uan amo ikaj okinchijchi. Ik non, akinmej tlaneltokaj itech Trinidad kijtoaj toTajtsin Dios, teKone Dios uan Espíritu Santo noijki Dios, maski ijkon, kijtoaj yejuan eyi mochiuaj san se Dios.