Elías okiyoliti ikone se iknosiuatl

Ijkuak amo okiauik, Jehová okilui Elías: “Xio altepetl Sarepta. Ompa kajki se iknosiuatl tlen mitstlamakas”. Ijkuak Elías oajsito itech non altepetl, okitak se iknosiuatl okololojtoka kuauitl uan okilui ma kimaka atl. Ijkuak okikuito atl, Elías okilui: “Nimitstlatlaujtia, noijki xinechmaka se pedazo pan”. Pero iknosiuatl okilui: “Amo nikpia pan, amo itlaj uelis nimitsmakas. San nikpia tepitsin harina uan aceite para nokone uan ne”. Elías okilui: “Jehová okijto tla tinechchijchiuilis se pantsi, tikpias aceite uan harina hasta ijkuak oksepa kiauis”.

Iknosiuatl oyajki ikalijtik uan okichijchi se pan para Elías. Iknosiuatl uan ikone nochipa okipixkej tlen kikuaskiaj ijkuak amo okiauik, ijkon ken okijto Jehová. Amo keman otlanki harina uan aceite tlen okipiayaj.

Satepan opanok itlaj tlen melauak teyolkoko. Ikone iknosiuatl chikauak omokoko uan omikik. Ye okilui Elías ma kipaleui. Ijkuakon, Elías okinapalo ikone iknosiuatl uan okiuikak ijtik se cuarto tlen okatka ikuapak kali. Satepan okitekak ipan se tlapechtli uan omotlatlaujti: “Jehová, nimitstlatlaujtia, xikyoliti nin chokotsin”. ¿Tikmati tleka tetlajtlachialti tla Jehová kiyolitiskia? Porque itech nonmej tonalmej amo ikaj yokiyolitiaya. Uan noijki porque iknosiuatl uan ikone amo okatkaj israelitas.

Ijkuakon, ikone iknosiuatl opejki mijyotia uan oksepa oyoltoka. Elías okilui iknosiuatl: “¡Xikita! Mokone yoltok”. Ye sapanoa oyolpakik uan okilui Elías: “Axkan nikmati melauak omitsualtitlanki toTajtsin Dios. Tikijtoa san tlen Jehová mitsiluia, ik non, melauak mochiua”.