Okipojpolojkej Jerusalén

Akinmej ochantiayaj Judá miak uelta okikajkej Jehová uan okinueyichiuayaj teotsitsintin. Ijkuakon, Jehová okintitlanki teotlajtojkej para kinpaleuiskiaj. Pero yejuan amo okinkakej uan okinpinauiayaj. Jehová okinekiaya kinmixpolos akinmej okinueyichiuayaj teotsitsintin. ¿Ken okichi?

Ueyi tekiua Nabucodonosor akin otlanauatiaya Babilonia, okinmoaxkatijtiaya miakej altepemej. Ijkuak achto okimoaxkati Jerusalén, okikitski ueyi tekiua Joaquín, noijki okinkitski príncipes, soldados uan akinmej kuali otlachijchiuayaj uan okinuikak Babilonia. Noijki okiuikak miak tlamantli ipati tlen okatka itech iteokal Jehová. Satepan, Nabucodonosor okitlali Sedequías ma tlanauati itech Judá.

Ueyi tekiua Sedequías okitlakamatiaya Nabucodonosor. Pero akinmej amo melauak okatkaj teotlajtojkej uan akinmej ochantiayaj ik Judá okiluiayaj Sedequías ma kixnamiki Babilonia. Jeremías okilui: “Tla tikixnamikis Babilonia, itech Judá yetos apistli, miakej mokokoskej uan mikiskej”.

Chikueyi xiuitl satepan, ueyi tekiua Sedequías okixnamik Babilonia uan okinmilui soldados egipcios ma kipaleuikan. Nabucodonosor okintitlanki isoldados para kipojpoloskiaj Jerusalén. Ninmej soldados okiyaualojkej altepetl. Jeremías okilui Sedequías: “Jehová okijto tla amo timoteuia iuan babilonios, nanmomakixtiskej te uan altepetl. Pero tla inmiuan timoteuia, yejuan kitlatiskej Jerusalén uan mitstsakuaskej”. Sedequías okijto: “¡Inmiuan nimoteuis!”.

Ijkuak opanok se xiuitl uan tlajko, babilonios okitlamotlakej se tepamitl tlen okiyaualoaya Jerusalén. Ijkon okalakej itech altepetl uan okitlatijkej. Noijki okitlatijkej teokali, sekimej okinmiktijkej uan miakej okintsakej.

Sedequías okiski Jerusalén uan ocholo. Pero babilonios okitojtokakej uan okikitskijkej ik Jericó, satepan okiuikakej ixpan ueyi tekiua Nabucodonosor. Ueyi tekiua okichiualti Sedequías ma kita ken okinmiktiayaj ikoneuan. Satepan, okichi ayakmo ma tlachia uan okitsak. Ompa omikik Sedequías. Pero Jehová okinmilui akinmej ochantiayaj Judá: “Nanmokuepaskej Jerusalén ijkuak panos 70 xiuitl”.

¿Tlen kinpanoskia telpokamej tlen okinuikakej Babilonia? ¿Kikauaskiaj Jehová?