Tlamachtilmej para Toteki akinmej tikchiuaj ken Cristo
3-9 DE MAYO
KEN TECHPALEUIA BIBLIA | NÚMEROS 27-29
“Jehová amo techikoita uan ma tikchiuakan ken ye”
w13-S 15/6 pág. 10 párr. 14
Jehová amo techikoita
14 Makuili iknimej siuamej okiluijkej Moisés: “¿Tleka itoka totajtsin poliuis porque amo okipixki nion se ikone tlakatl?”. Ik non, okiluijkej Moisés: “Techmaka tlali ijkon ken tikinmakas ikniuan totajtsin”. ¿Tlen okichi Moisés? ¿Okinmilui amo uelis ijkon kichiuaskia? Amo. “Okilui Jehová tlen okitlajtlanilijkej” (Núm. 27:2-5). ¿Tlen okijto Jehová? Ye okilui Moisés: “Melauak tlen kijtouaj ichpokauan Zelofehad. Xikinmaka tlali ijkon ken tikinmakas ikniuan itajtsin uan moneki tikinmakas tlali tlen itajtsin kiseliskia”. Noijki Jehová okitlali se tlanauatil uan okilui Moisés: “Tla se tlakatl ixpoliui uan amo okipixki nion se ikone tlakatl, namejuan moneki ichpoch nankimakaskej tlali” (Núm. 27:6-8; Jos. 17:1-6). Non tlanauatil tlen okijto Jehová kinpaleuiskia nochtin siuamej israelitas tla kinpanoskia ijkon ken ichpokauan Zelofehad.
w13-S 15/6 pág. 11 párr. 15
Jehová amo techikoita
15 Tlen Jehová okichi okiteititi tetlasojtla uan amo techikoita. Jehová okinpaleui ichpokauan Zelofehad ijkon ken kinpaleuiskia oksekimej israelitas (Sal. 68:5). Tlen opanok kiteititia ken okinchiuili oksekimej itekipanojkauan uan ijkon okiteititi ye amikaj kichikoita (1 Sam. 16:1-13; Hech. 10:30-35, 44-48).
w13-S 15/6 pág. 11 párr. 16
Jehová amo techikoita
16 Jehová amo techikoita, ¿ken uelis tikchiuaskej ijkon ken ye? Uelis tikteititiskej ika ome tlamantli. Tla amo timokuayejyekouaj ken akinmej techikoitaj, amo titechikoitaskej. Tinochtin techpaktia timokuayejyekoskej amo titechikoitaj uan nochtin tikinseliaj. Pero ualeua oui tikitaskej tlen melauak tikmachiliaj. Ik non, ¿ken uelis tikitaskej kox nochtin tikintlakaitaj? Ijkuak Jesús okinekiaya kimatis tlen omokuayejyekouayaj oksekimej itech ye, okintlajtlani iyolikniuan: “¿Tlan kimoliah n tlakah de Ne Non onimochi ni tlakatl?” (Mat. 16:13, 14). Ma tiktlajtlanikan akin iuan timouikaj kox ikaj tikchikoitaj. Tla techiluia mota ikaj tikchikoitaj porque amo kipia miak tlamantli noso porque oksekan ialtepe, ¿tlen moneki tikchiuaskej? Ma tiktlatlaujtikan Jehová ma techpaleui para amo titechikoitaskej ijkon ken ye amo kichiua (Mat. 7:7; Col. 3:10, 11).
Ma tiktemokan ken techpaleuia Biblia
it-2-S pág. 525
Tlamanali
Tlamanali tlen okinokiayaj. Israelitas okitemakayaj tlamanali, noijki okitemakayaj tlamanali tlen okinokiayaj, okachi ijkon okichijkej ijkuak yochantiayaj itech tlali tlen Jehová okinmilui kinmakaskia (Núm. 15:2, 5, 8-10). Okitekitiltiayaj vino, okinoki itech altar (Núm. 28:7, 14; noijki xikita Éx. 30:9; Núm. 15:10). Apóstol Pablo okintlajkuilili tokniuan tlen ochantiayaj Filipos, ye okinmilui: “Maski nechnokiskej ken se tlamanali tlen kinokiaj, nikchiuas tekitl santo, ik non, ne namouan niyolpaki porque nantlaneltokaj uan noijki ijkon nankichijtokej”. Ijkuak ijkon okijto, okiteititi melauak okinekiaya kinpaleuis tokniuan (Filip. 2:17, TNM). Ijkuak yikimiktiskiaj okilui Timoteo: “Yinechnokijtokej ken tlamanali tlen kinokiaj uan san niman nimomakixtis” (2 Tim. 4:6, TNM).
10-16 DE MAYO
KEN TECHPALEUIA BIBLIA | NÚMEROS 30, 31
“Ma tikchiuakan tlen tikiluiaj Jehová”
it-2-S pág. 1213 párr. 1
Moneki tikchiuaskej tlen otikijtojkej
Tla ikaj okiluiaya Jehová itlaj kichiuas, omonekiaya kichiuas. Amikaj okichiualtiayaj ijkuak ikaj okijtouaya itlaj kichiuas pero Tlanauatil okijtouaya omonekiaya kichiuas tlen okijto. Kixpoloskiaj tlamo kichiuaskia (Núm. 30:2; noijki xikita Rom. 1:31, 32). Ik non, iTlajtol toTajtsin Dios okijtouaya omonekiaya kuali mokuayejyekoskia ijkuak kijtoskia tlen kichiuaskia. Tlanauatil okijtouaya: “Tla tikiluis Jehová moDios itlaj tikchiuas, san niman xikchiua porque Jehová moDios melauak mitstlajtlanilis uan tlamo ijkon tikchiuas, titlajtlakolchiuas. Tla amitlaj tikiluis tikchiuas, amo titlajtlakolchiuas” (Deut. 23:21, 22).
“Tlen tikiluiaj Jehová tikchiuaskej, ma tikchiuakan”
2 Itech Biblia kijtoa ijkuak tikiluiaj Jehová itlaj tikchiuaskej, tikijtojtokej melauak tikchiuaskej. Se neskayotl, uelis tikiluiskej itlaj tikchiuaskej, itlaj tikmakaskej, peuas okachi tiktekichiuiliskej noso tikiluiaj ayakmo tikchiuaskej seki tlamantli. Ijkuak ijkon tikiluiaj kisa itech toyolo uan amo ikaj techchiualtia. Pero tla tikiluiaj Jehová tikchiuaskej tlen otikiluijkej, ma tikilnamiktokan moneki tikchiuaskej porque ye amo san kajauilmati. Para toTajtsin Dios melauak tikiluijtokej tikchiuaskej. Nin tlamantli ken ijkuak ikaj kijtoa melauak kichiuas noso amo kichiuas tlen kijtojtok (Génesis 14:22, 23; Hebreos 6:16, 17). Ijkon ken kijtoa Biblia, ¿tleka moneki tikpatioitaskej tlen tikiluiaj Jehová tikchiuaskej?
w04-S 1/8 pág. 27 párr. 3
Tlen okachi ipati tlen omotlajtolti itech Números
30:6-8 ¿Uelis se tlakatl kiluis isiua ayakmo ma kichiua tlen okilui Jehová? Jehová kimati sejse uelis kijtos ken kitekichiuilis. Ijkuak tikiluiaj tiktekichiuiliskej amikaj techchiualtia (Gálatas 6:5). Se tlakatl amo uelis kiluis isiua ayakmo ma kichiua tlen okilui Jehová. Siuatl amo kijtos itlaj kichiuas tlen amo kajki itech Biblia noso itlaj tlen kichiuas amo kuali ma mouika iuan inamik.
Ma tiktemokan ken techpaleuia Biblia
it-2-S pág. 26 párr. 3
Jefté
Yiuejkika tetajmej uelis kimakaskiaj Jehová inkoneuan para ma kitekichiuilikan itech tabernáculo. Ijkon okipanok Samuel, ijkuak ayamo onesiaya inantsin okilui Jehová kimakaskia para ma kitekichiuili itech tabernáculo. Inamik Ana tlen omotokayotiaya Elcaná, okipaleui ijkon ma kichiua. Ijkuak Ana ayakmo okichichitiaya Samuel, san niman okiuikak tabernáculo. Noijki okiuikak se yolkatl uan okitlamanili Jehová (1 Sam. 1:11, 22-28; 2:11). Sansón noijki okimaktilijkej Jehová uan okitekichiuili ken nazareo (Juec. 13:2-5, 11-14; noijki xikita ken se teta uelis kiluis ichpoch ijkon ken kijtoua Núm. 30:3-5, 16).
17-23 DE MAYO
KEN TECHPALEUIA BIBLIA | NÚMEROS 32, 33
“Moneki nankinkixtiskej nochtin akinmej ompa chantij”
w10-S 1/8 pág. 23
¿Otikmatiaya?
¿Tlen kijtosneki ijkuak Escrituras Hebreas kijtoua “kanin otlaueyichiuayaj”?
Ijkuak israelitas yichantiskiaj itech tlali tlen Jehová okinmilui kinmakaskia, okinmilui: “Moneki nankinkixtiskej nochtin akinmej ompa chantij uan moneki nankipojpoloskej nochi tlen chijchitok ika tetl, nochi estatuas tlen chijchitokej ika tepostli uan moneki nankipojpoloskej kanin tlaueyichiuaj” (Números 33:52). Non xamo kijtosneki otlaueyichiuayaj kiauak noso ipan tepetl uan okinchijchiuayaj altares itlampa se kuauitl noso itech se altepetl (1 Reyes 14:23; 2 Reyes 17:29; Ezequiel 6:3). Okipiayaj altares, teotsitsintin, tlaketsalmej uan okseki tlamantli tlen okitekitiltiayaj.
w08-S 15/2 pág. 27 párrs. 5, 6
Amo ma tikchiuakan ken okichiuayaj israelitas
Axkan onka miak tlamantli, ik non, uelis techpanos ken israelitas. Itech ninmej tonalmej miakej kipatioitaj miak tlamantli uan yetoskia ken indios: tomin, akinmej panouaj itech televisión noso akinmej mauiltiaj, tekiuajkej, akinmej tlayekanaj itech religiones noso infamilia. Tlamo timomaluiaj, non okachi tikpatioitaskej. Tla timouikaj iuan akinmej amo kitekichiuiliaj Jehová, uelis kichiuas ayakmo iuan ma timouikakan.
Yiuejkika israelitas oauilnemiayaj uan noijki ijkon okiueyichiuayaj Baal uan ijkon miakej israelitas okichijkej. Axkan miakej itekipanojkauan Jehová kinpanoua ijkon ken yejuan. Xamo katej inkalijtik uan amikaj kita ijkuak kitekitiltijtokej se computadora, tlamo momaluiaj, uelis kitaskej itlaj tlen amo kuali uan ayakmo kuali kipiaskej intlalnamikilis. Teyolkoko tla se tokni peua kita pornografía.
it-1-S pág. 410 párr. 4
Canaán
Josué okichi nochi tlen Jehová okilui Moisés, okinpojpolo akinmej ochantiayaj Canaán (Jos. 11:15). Pero israelitas amo okichijkej tlen ye okinnauati uan amo okipojpolojkej nochi tlen amo kuali. Omouikayaj iuan Cananeos, ik non, israelitas okichijkej tlen amo kuali uan oixpolikej (omoteuiayaj, oauilnemiayaj uan okiueyichiuayaj teotsitsintin). Pero amo ijkon kinpanoskia tla kinmixpoloskiaj Cananeos (Núm. 33:55, 56; Juec. 2:1-3, 11-23; Sal. 106:34-43). Jehová yokinmiluijka israelitas amo san kinpejpenaskia akinmej kinmixkomakaskia. Ik non, tla yejuan mouikaskiaj iuan Cananeos, inmiuan monamiktiskiaj, kinueyichiuaskiaj inteotsitsiuan uan tla kichiuaskiaj okseki tlamantli amo kuali, Jehová noijki kinmixpoloskia (Éx. 23:32, 33; 34:12-17; Lev. 18:26-30; Deut. 7:2-5, 25, 26).
Ma tiktemokan ken techpaleuia Biblia
it-2-S pág. 238 párr. 2
Kanin otlamiaya intlal
Ijkuak yokichijkej sorteo uan yokitakej tlen tlali kinmakaskiaj, satepan okitayaj kanin tlamiskia intlal. Pero noijki okitayaj kox ueyi intribu. Jehová okinmilui ma kinxexelilikan tlali ika sorteo pero omonekiaya kitaskej kox miakej itech intribu. Akinmej okachi miakej okachi ueyi tlali kinmakaskiaj uan akinmej amo miakej amo okachi ueyi kinmakaskiaj. Kanin kinmakaskiaj ompa mokauaskiaj (Núm. 33:54). Ijkuak okichiuayaj sorteo amo uelis kipatlaskiaj kanin chantiskiaj pero kema okinmakayaj okachi tlali tla miakej itech intribu. Ik non, itribu Judá okikuilijkej seki tlali uan okimakakej itribu Simeón (Jos. 19:9).
24-30 DE MAYO
KEN TECHPALEUIA BIBLIA | NÚMEROS 34-36
“Ma tikkauilikan Jehová ma techpaleui”
¿Timopaleuiaj itech Jehová?
4 ¿Tlen opanoaya tla se israelita amo okinekiaya temiktis? Maski amo okinekiaya temiktis, itlajtlakol okatka porque okimikti se akin amo itlaj okichi (Gén. 9:5). Pero ken amo okinekiaya temiktis, Jehová okitekauiliaya ma kiknomatikan. Akin otemikti omonekiaya yas itech se altepetl kanin omopaleuiayaj akinmej amo okinekiayaj temiktiskej uan ijkon amo ikaj kimiktiskia. Pero amo uelis kisaskia itech non altepetl hasta ijkuak mikiskia ueyi teopixki (Núm. 35:15, 28).
¿Timopaleuiaj itech Jehová?
6 Tla se israelita amo okinekiaya temiktis omonekiaya yas itech altepetl kanin mopaleuiskia uan ijkuak ompa ajsiskia omonekiaya kinmiluis tlayekankej uan kipaleuiskiaj (Jos. 20:4). Satepan, omonekiaya kikuepaskej kanin otemikti uan kixkomakaskiaj tlen otlayekanayaj itech non altepetl (xiktlajtolti Números 35:24, 25). Tla ninmej tlayekankej okitayaj melauak amo okinekiaya temiktis, okikauiliayaj ma mokuepa itech altepetl kanin omopaleuito.
¿Timopaleuiaj itech Jehová?
13 Amo itlaj uelis kichiuiliskia akin otemikti ijkuak yokalakiaya itech altepetl kanin sekimej omopaleuiayaj. Jehová okijto: “Nonmej altepemej kipaleuiskej” (Jos. 20:2, 3). Jehová amo okinekiaya oksepa ma kixkomakakan akin otemikti. Uan ikalchanejka akin okimiktijkej amo okikauiliayaj ma kalaki itech non altepetl para kimiktis. Tla akin otemikti okatka itech non altepetl kanin omopaleuiayaj, toTajtsin Dios okimaluijtoka uan amo itlaj kimouiliskia. Amo otsaktoka akin otemikti, ye uelis tekitiskia, uelis kinpaleuiskia oksekimej uan kitekichiuiliskia Jehová ika yolseuilistli. Okichiuaya miak tlamantli uan oyolpakiaya.
Ma tiktemokan ken techpaleuia Biblia
w91-S 15/2 pág. 13 párr. 13
Jesús topatka omotemakak para ma timomakixtikan
13 Imikilis Jesús amo okinpaleui Adán uan Eva. Tlanauatil tlen okijkuilo Moisés ijkin okijtouaya: “Amitlaj xikseli para ma momakixti akin otemikti porque moneki mikis” (Números 35:31). Adán amo okikajkayajkej, ye okinek tlajtlakolchiuas (1 Timoteo 2:14). Ik non, nochtin ikoneuan tlajtlakolejkej uan ixpoliuij. Adán amo okatka tlajtlakole, amo okinek kitlakamatis toTajtsin Dios, ik non, omonekiaya mikis. ToTajtsin Dios kixnamikiskia itlanauatiluan tla kitemakaskia iKone ipatka Adán para ma momakixti. ¡Ye okitemakak iKone para kinmakixtis nochtin ikoneuan Adán! (Romanos 5:16). Jehová okitemakak iKone, ijkon uelis kitlajtlamis nochi tlen techtlajyouiltia. Jesús topatka okimiktijkej uan yetoskia ken kiuika nochi totlajtlakol (Hebreos 2:9; 2 Corintios 5:21; 1 Ped. 2:24).
31 DE MAYO-6 DE JUNIO
KEN TECHPALEUIA BIBLIA | DEUTERONOMIO 1, 2
“San toTajtsin Dios kinamiki tlaixkomakas”
w96-S 15/3 pág. 23 párr. 1
Jehová nochi kichiua ken moneki uan ika melajkayotl
Tlayekankej moneki kiyektlaliskej ikaj tlen otlajtlakolchi (1 Corintios 5:12, 13). Ijkuak tlayekankej ijkon kichiuaj, kilnamikij ijkuak Jehová itlaj kichiua ika melajkayotl, noijki teiknomati. Pero amo kiknomati akin tlajtlakolchiua uan amo moyolkopa. Tlayekankej kikixtiaj akin tlajtlakolchiua pero non amo kijtosneki ijkon kichiuaj porque momakopaj. Yejuan kikixtiaj porque kinekij ma tlalnamiki (noijki xikita Ezequiel 18:23). Tlayekankej kikauiliaj Jesús ma kinyekana, ik non, kichiuaj tlen kuali uan yejuan yetoskiaj ken “itlaj kanin ikaj motlatis ijkuak ejeka” (Isaías 32:1, 2). Ik non, moneki teajsikamatiskej uan amo techikoitaskej (Deuteronomio 1:16, 17).
w02-S 1/8 pág. 9 párr. 4
Ma tikkauilikan Jehová ma techyekana
4 Israelitas tlen okatkaj jueces omonekiaya kimatiskej tlen okijtouaya Tlanauatil. Israelitas tlen yokipiayaj miak xiuitl, ken noijki okatkaj tlajtlakolejkej, amo omonekiaya kichiuaskej seki tlamantli: amo omonekiaya tlaixnekiskej, techikoitaskej nion san intech motekipachoskej para ijkon kuali teixkomakaskiaj. Moisés okinmilui: “Ijkuak ikaj nankixkomakaskej, amo xikchikoitakan. Xikkakikan akin amo kipia miak tlamantli uan akin kipia miak tlamantli. Amikaj xikmauilikan porque Jehová kinamiki tlaixkomakas”. Jueces tlen okatkaj ompa Israel, otlaixkomakayaj ipatka toTajtsin Dios, ik non, omonekiaya kichiuaskej ken ye okijtouaya (Deuteronomio 1:16, 17).
Ma tiktemokan ken techpaleuia Biblia
w13-S 15/ 9 pág. 9 párr. 9
Tlen techiluia Jehová melauak
9 Yiuejkika israelitas opejkej yauij kanin tlauaki, ompa okatka tlaueyi uan temomojti uan ompa panoskiaj kanaj 40 xiuitl. Jehová amo okinmilui ken kinyekanaskia uan ken kinmaluiskia. Pero nochipa okinmititi uelis kineltokaskiaj tlen okinmiluiaya uan kinpaleuiskia. Jehová okinmititi okinpaleuijtiaya ijkuak opanotiayaj kanin tlauaki porque tlajka okitlaliaya se ueyi mixtli uan youak okitlaliaya tlitl (Deut. 1:19; Éx. 40:36-38). Noijki okinmakak tlen ika mopanoltiskiaj, “amitlaj okinpolo, amo otlajtlanki intlaken uan inmikxiuan amo opojposauakej” (Neh. 9:19-21).
7-13 DE JUNIO
KEN TECHPALEUIA BIBLIA | DEUTERONOMIO 3, 4
“ITlanauatiluan Jehová techpaleuiaj ma tiyetokan tiixtlamatkej”
it-1-S pág. 821 párr. 6
Akin kajsikamati tlen moneki
Ikaj akin kimachtiaj uelis yetos okachi ixtlamatki uan uelis kajsikamatis tlen moneki maski ayamo kipia miak xiuitl tla nochipa momachtia uan kichiua tlen kijtoua iTlajtol toTajtsin Dios (Sal. 119:99, 100, 130; noijki xikita Luc. 2:46, 47). Ijkon kipanoua porque kintlakamati itlanauatiluan. Tla israelitas ijkon kichiuaskiaj, oksekimej altepemej kitaskiaj okatkaj ixtlamatkej uan okajsikamatiayaj tlen omonekiaya (Deut. 4:5-8; Sal. 111:7, 8, 10; noijki xikita 1 Rey. 2:3). Akin kajsikamati tlen moneki, kajsikamati amo kichijtok tlen kijtoua iTlajtol toTajtsin Dios uan kineki kichiuas tlen ye kijtoua, ik non, kiluia ma kipaleui (Sal. 119:169). Noijki kikauilia iTlajtol toTajtsin Dios ma kalaki tlaijtik (Mat. 13:19-23), kikauilia ma ajsi itech iyolo (Prov. 3:3-6; 7:1-4) uan kikokolia nochi tlen amo kuali (Sal. 119:104). Ijkuak iKone toTajtsin Dios okatka nikan tlaltikpak okiteititi okatka ixtlamatki. Amo okijto amo ma kimiktikan itech se kuauitl porque iTlajtol toTajtsin Dios okijtouaya omonekiaya ijkon kimiktiskej (Mat. 26:51-54).
w99-S 1/11 pág. 20 párrs. 6, 7
Ijkuak Jehová ikaj kiteochiua
Siuatl tlen otlanauatiaya ompa Saba okitlajtlachialti tlen okitak, ik non, okilui tekiua Salomón: “Yolpakij tlakamej uan motlakeualuan tlen nochipa mouan katej porque kikaktokej moixtlamatilis” (1 Reyes 10:4-8). Amo okijto oyolpakiayaj porque okipiayaj miak tlamantli, okijto oyolpakiayaj porque nochipa okikakiayaj ixtlamatilis tlen toTajtsin Dios okimakak Salomón. Axkan itekipanojkauan Jehová kichiuaj ken siuatl tlen otlanauatiaya Saba, kikakij ixtlamatilis toTajtsin Dios uan ixtlamatilis Jesucristo.
Noijki ma tikitakan tlen okseki okilui siuatl Salomón: “Ma moueyichiua Jehová moDios” (1 Reyes 10:9). Okitak Jehová okimakak ixtlamatilis uan nochi tlen okipiaya. Ijkon opanok tlen Jehová okinmiluijka israelitas. Ye okinmilui: “Moneki nankichiuaskej nochi tlen namechnauatia porque ijkon okseki altepemej nankinmititiskej nanixtlamatkej uan nankajsikamatij tlen moneki porque nankipiaj nonmej tlanauatilmej, ik non, yejuan kijtoskej: ‘Nin altepetl ixtlamatki uan kajsikamati tlen moneki’” (Deuteronomio 4:5-7).
w07-S 1/8 pág. 29 párr. 13
¿Kuali timouikaj iuan Jehová?
13 Ijkuak Jehová kinteochiua itekipanojkauan nochipa kinmaka tlen okachi kuali (Santiago 1:17). Ma tikilnamikikan kanin okinmakak tlali israelitas, okatka “leche uan neujtli”. Noijki israelitas okijtojkej nonmej tlajtolmej ijkuak okijtojkej ken okatkaj ompa Egipto. Pero tlali tlen Jehová okinmakak israelitas okse tlamantli okatka. Moisés okinmilui israelitas Jehová okimaluiaya non tlali. Kijtosneki israelitas kuali yetoskiaj porque Jehová kinmaluiskia. Uan ijkon opanok, ijkuak okitlakamatiayaj ye sapanoua okinteochiuaya uan kuali okatkaj, amo ken oksekimej tlen ochantiayaj itech okseki altepemej. Non kiteititia “itlateochiualis Jehová non tlen okachi tlapaleuia” (Números 16:13; Deuteronomio 4:5-8; 11:8-15).
Ma tiktemokan ken techpaleuia Biblia
w04-S 15/9 pág. 25 párr. 3
Tlen okachi ipati tlen omotlajtolti itech Deuteronomio
4:15-20, 23, 24. Jehová amo kipaktia ma tikinchijchiuakan teotsitsintin, ¿kijtosneki non amo kuali tikinchijchiuaskej estatuas para ika titlachijchiuaskej tokalijtik? Amo. ToTajtsin Dios okinnauati israelitas amo ma kinchijchiuakan teotsitsintin para ma kinueyichiuakan, amo inmixpan ma ‘motlankuaketsakan nion ma kintekichiuilikan’. Pero Biblia amo kijtoua tlajtlakoli ma tikinchijchiuakan estatuas para ika titlachijchiuaskej tokalijtik (1 Reyes 7:18, 25).
14-20 DE JUNIO
KEN TECHPALEUIA BIBLIA | DEUTERONOMIO 5, 6
“Tetajmej xikinmachtikan namokoneuan ma kitlasojtlakan Jehová”
w05-S 15/6 pág. 20 párr. 11
Tetajmej xikinpaleuikan namofamilia
11 Itech iTlajtol toTajtsin Dios, tlen kijtoua Deuteronomio 6:5-7 noijki ijkuilitok itech okseki versículos. Xiktlajtoltikan nonmej versículos. Ompa kiteititia tetajmej achto moneki kitlasojtlaskej Jehová uan kitlakamatiskej. Namejuan moneki nochipa nankitlajtoltiskej uan nanmokuayejyekoskej tlen kijtoua iTlajtol toTajtsin Dios uan ijkon nankajsikamatiskej, nankipatioitaskej itlanauatiluan uan principios bíblicos. Ijkon itech namoyolo nankipiaskej tlen tlamachtia Biblia, non namechpaleuis xiyolpakikan uan okachi nankitlasojtlaskej Jehová uan ijkon uelis nankinmachtiskej namokoneuan miak tlamantli kuali (Luc. 6:45).
w07-S 15/5 pág. 15 párr. 5
¿Ken kuali nankinmachtiskej namokoneuan?
Ika tlen nankijtouaj uan ika tlen nankichiuaj nankiteititiaj tlen okachi nanmokuayejyekouaj uan tlen nankipatioitaj (Romanos 2:21, 22). Ijkuak namokoneuan tsikitsitsintin peuaj kichiuaj seki tlamantli porque nanmechitaj ijkon nankichiuaj. Namokoneuan kitaj tlen nankipatioitaj uan ijkuak moskaltiaj ualeua non kipatioitaj. Yejuan kitaskej nankitlasojtlaj Jehová porque nankipatioitaj nankitlajtoltiskej uan nanmomachtiskej Biblia. Noijki kitaskej nankipatioitaj nankitekichiuiliskej (Mateo 6:33). Ijkuak nochipa nanmonechikouaj uan nantetlapouiaj, namokoneuan kitaskej nankipatioitaj nankiueyichiuaskej Jehová (Mateo 28:19, 20; Hebreos 10:24, 25).
w05-S 15/6 pág. 21 párr. 14
Tetajmej xikinpaleuikan namofamilia
14 Deuteronomio 6:7 kiteititia tetajmej nochipa moneki kintlapouiskej inkoneuan tlen kichiua toTajtsin Dios. Maski kanaj yajtoskej, tlachipajtoskej inkalijtik noso moseuijtoskej, uelis kinmachtiskej ken mouikaskej iuan toTajtsin Dios. Non amo kijtosneki san nankinmiluijtoskej tlen kijtoua Biblia, moneki kinyolchikauas uan kinpaleuis ma mouikakan iuan Jehová. Revista ¡Ma titlachixtokan! tlamachtia miak tlamantli tlen namechpaleuis inmiuan ximotlapouikan, ken okichijchi yolkamej toTajtsin Dios, ken okichijchi nochi tlen onka tlaltikpak, ken tlatlamantli mokuayejyekouaj tlaltikpaktlakamej uan tlen kichiuaj. Tla ijkon nankitlapouiaj namokoneuan, okachi kinekiskej kintlajtoltiskej amatlajkuilolmej tlen techmaka “tlakeuali yolmelajki uan ixtlamatki” (Mateo 24:45-47, TNM).
Ma tiktemokan ken techpaleuia Biblia
Jehová okintlasojtlaya israelitas uan okiteititi melajkayotl
11 ¿Tlen techmachtia? Jehová kimati tlen tikpiaj itech toyolo uan tlen tikmachiliaj (1 Sam. 16:7). Amo uelis itlaj tiktlatiliskej porque kimati tlen timokuayejyekoaj, tlen tikmachiliaj uan tlen tikchiuaj. Ye kitemoa tlen kuali tikchiuaj uan techpaleuia nochipa ma tikchiuakan tlen kuali. Pero kineki ma tikitakan tlen amo kuali timokuayejyekoaj uan san niman ma tikixtopeuakan non tlamantli (2 Crón. 16:9; Mat. 5:27-30).
21-27 DE JUNIO
KEN TECHPALEUIA BIBLIA | DEUTERONOMIO 7, 8
“Amo ximokauakan inmiuan nanmonamiktiskej”
w12-S 1/7 pág. 29 párr. 2
¿Tleka toTajtsin Dios okinmilui israelitas san inmiuan ma monamiktikan?
ToTajtsin Dios okimatiaya Satanás kichiuaskia san tlen tlamantli uan ijkon israelitas kinueyichiuaskiaj teotsitsintin. ToTajtsin Dios okinnejmachti israelitas, okinmilui tla monamiktiskiaj iuan akinmej amo okiueyichiuayaj, ayakmo kitekichiuiliskiaj uan kinueyichiuaskiaj teotsitsintin. Tla ijkon kinpanoskia, Jehová ayakmo kinseliskia uan ayakmo kinmaluiskia uan ijkon akinmej okinkokoliayaj amo oui kinmoaxkatiskiaj. Uan tla ijkon panoskia, ¿ken nesiskia Mesías itech altepetl Israel? Ik non, Satanás okinekiaya israelitas ma monamiktikan iuan akinmej amo okitekichiuiliayaj Jehová.
Ximonamikti san iuan akin “kineltoka Toteko Dios” ¿uelis ijkon tikchiuas?
Pero Jehová kijtoa san moneki timonamiktiskej iuan akin kitekichiuilia. ¿Tleka? Pampa ye kimati tlen uelis techpaleuis uan noijki kineki techmaluis. Ye amo kineki ma tikpejpenakan tlamantli tlen techtlajyouiltis. Ijkuak okatka teotlajtojki Nehemías miakej israelitas omonamiktijkej iuan siuamej akinmej amo okitekichiuiliayaj Jehová. Ik non, Nehemías okinmilnamikti tlen okipanok ueyi tekiua Salomón. Okinmilui toTajtsin Dios okitlasojtlaya Salomón uan okitlali ken ueyi tekiua. Pero Salomón omonamikti iuan siuamej akinmej amo okitekichiuiliayaj Jehová, uan okichijkej ma tlajtlakolchiua (Nehemías 13:23-26). Jehová san kineki kuali ma tiyetokan. Ik non, ye techiluia san moneki ma timonamiktikan iuan akinmej kitekichiuiliaj (Salmo 19:7-10; Isaías 48:17, 18). Tikmatij ye kinamiki techiluis tlen uelis tikchiuaskej uan tlen amo moneki ma tikchiuakan. Noijki tiktlasojkamatiliaj nochi tlen techiluia, pampa techtlasojtla uan kineki kuali ma tiyetokan (Proverbios 1:5).
Kuali xikinpejpena moyolikniuan itech saiktlami tonalmej
12 Tla tiknekij timonamiktiskej moneki ma timomaluikan. Biblia techiluia amo ma tinemikan iuan akin amo kitekichiuilia Jehová, pampa tikatej ken “tláwili iwa n tleyuálistli” (2 Corintios 6:14). Biblia noijki kijtoa san moneki ma timonamiktikan iuan akin “kineltoka Toteko Dios” (1 Corintios 7:39). Nin kijtosneki san moneki timonamiktiskej iuan se iTlaixpantijka Jehová tlen yomoapolakti uan kitlakamati itlanauatiluan toTajtsin Dios. Tla timonamiktiaj iuan akin kitlasojtla Jehová, uelis techpaleuis ma tiyetokan tiyolmelajkej iixpan Jehová.
Ma tiktemokan ken techpaleuia Biblia
w04-S 1/2 pág. 13 párr. 4
Jehová mojmostla techmaka tlen ika timopanoltiskej
4 Ijkuak tikiluiaj Jehová ma techmaka tlen ika timopanoltiskej noijki moneki tikilnamiktoskej mojmostla moneki timomachtiskej. Maski Jesús oapismikiaya, tetl amo okikopki pan ken okilui Satanás. Jesús okilui: “Itlajkuilol Dios kijtoa: ‘N tlakatl amo san ika paj yolitok, yej noiwa ika nochi tlájtoli non Dios kijtoa’” (Mateo 4:4). Ijkuakon Jesús okijto tlen okijtojka profeta Moisés, ye okinmilui israelitas: “Omitspinaui uan okika xiapismiki uan omitsmakak maná tlen motatajuan uan te amo onankixmatiayaj, para ijkon tikmatiskia tlaltikpaktlakatl amo san moneki kipias tlen kikuas, noijki moneki kikakis nochi tlen kijtoua Jehová” (Deuteronomio 8:3). Jehová okinmakak israelitas maná para kipiaskiaj tlen kikuaskiaj pero noijki okinmakak para itlaj kinmachtiskia. Mojmostla omonekiaya kololoskiaj san tlen kikuaskiaj. Tla miak okololouayaj, tlen omokauaya mostlatika otsojyaya uan ochakalouaya (Éxodo 16:4, 20). Pero amo ijkon opanouaya ijkuak oajsiaya chikuase tonal, se tonal achto ajsiskia tonal sábado omonekiaya kololoskiaj miak para ijkon kipiaskiaj tlen kikuaskiaj non tonal (Éxodo16:5, 23, 24). Maná tlen Jehová okinmakak israelitas okinmilnamiktiaya omonekiaya kitlakamatiskej uan amo san kipiaskiaj tlen kikuaskiaj, noijki omonekiaya kikakiskiaj nochi tlen Jehová okijtouaya.
28 DE JUNIO-4 DE JULIO
KEN TECHPALEUIA BIBLIA | DEUTERONOMIO 9, 10
“¿Tlen mitsiluia Jehová xikchiua?”
w09-S 1/10 pág. 10 párrs. 3, 4
¿Tlen techiluia Jehová ma tikchiuakan?
¿Tlen techyolinis ma tiktlakamatikan Jehová? Deuteronomio 10:12 kijtoua: “Xiktlakamati Jehová moDios”. Moisés amo okijto ma timomojtikan porque titlajtlakolejkej. Kijtosneki moneki tikintlakamatiskej itlanauatiluan Jehová uan ijkon amo tikchiuaskej itlaj tlen kiyolkokos.
¿Tlen mitsyolinis xiktlakamati toTajtsin Dios? Moisés okijto moneki tiktlakamatiskej Jehová ika nochi toyolo uan toyolilis (versículo 12). Kijtosneki moneki tiktlakamatiskej porque tiktlasojtlaj. Pero tiktlasojtlaskej toTajtsin Dios amo san kijtosneki itlaj tikmachiliskej. Se amochtli kiyekijtoua “itech hebreo ijkuak ikaj itlaj kimachilia ualeua noijki kiyolinia itlaj ma kichiua”. Ik non, ijkuak ikaj kitlasojtla toTajtsin Dios kiteititia ika tlen kichiua. Tla melauak tiktlasojtlaj, nochipa tikchiuaskej tlen kipaktia (Proverbios 27:11).
w09-S 1/10 pág. 10 párr. 6
¿Tlen techiluia Jehová ma tikchiuakan?
Tla tiktlakamatij Jehová, kuali tiyetoskej. Itech Deuteronomio 10:13 Moisés okijto: “Xikintlakamati itlanauatiluan Jehová [...] para kuali tiyetos”. Maski san tlen techiluis Jehová ma tikchiuakan, non techpaleuis. Ma tikilnamikikan toTajtsin Dios “Ye n tlasojtlálistli” (1 Juan 4:8). Tlen technauatia ma tikchiuakan techpaleuia axkan uan noijki techpaleuis satepan (Isaías 48:17). Tla tiktlakamatij tlen techiluia, amo titlajyouiskej uan satepan toTajtsin Dios techteochijtos ika iTekiuajkayo.
cl-S pág. 16 párr. 2
¿Uelis timouikaskej iuan toTajtsin Dios?
2 Yiuejkika Abrahán kuali omouikaya iuan toTajtsin Dios, ik non, ye okijto “Abrahán noyolikni” (Isaías 41:8). Ye okitaya Abrahán ken iyolikni, iuan omouikaya porque itech otlaneltokak (Santiago 2:23). Axkan Jehová noijki mouika iuan akinmej kitekichiuiliaj porque kitlasojtlaj (Deuteronomio 10:15). ITlajtol toTajtsin Dios techyoleua itIaj ma tikchiuakan uan noijki ye techiluia tlen kichiuas. Ompa kijtoua: “[Ximotokikan] inawak Dios, iwa Ye [motokis] nomonawak” (Santiago 4:8).
Ma tiktemokan ken techpaleuia Biblia
it-1-S pág. 133
Anaquim
Anaquim okatkaj tlakamej uejkapantikej uan ochantiayaj itech tepeyo Canaán. Itempa mar uan ik sur Canaán. Ahimán, Sesai uan Talmai ochantiayaj Hebrón uan miakej okinmixmatiayaj (Núm. 13:22). 12 tlakamej tlen okintitlankej ma tlachiatij Canaán amo keman okinmitayaj tlakamej uejkapantikej. Majtlaktli tlakamej okinmojtijkej nonmej tlakamej, ik non, okijtojkej okatkaj inkoneuan nefilim tlen oixpolikej ijkuak oatemik tlaltikpak uan inmixpan israelitas omotayaj ken chapulimej (Núm. 13:28-33; Deut. 1:28). Ik non, hasta okijtouayaj Emim uan Refaím okatkaj uejkapantikej ken tlakamej anaquim. Ken sapanoua chikauakej okatkaj, okijtouayaj: “¿Akin uelis kinmixnamikis ikoneuan Anac?” (Deut. 2:10, 11, 20, 21; 9:1-3).