José oneski ijkuak Jacob yokipiaya miak xiuitl. Ikniuan José tlen okachi yiuejueyij okitakej intajtsin okachi okitlasojtlaya José. ¿Ken omomachiliayaj? Okikokoliayaj José. Se tonal, José okochtemik seki tlamantli uan okinmilui ikniuan. Yejuan omokuayejyekojkej tlen José okochtemik okijtosnekiaya se tonal motlankuaketsaskiaj ixpan José, ik non, okachi okikokolijkej.

Se tonal, ikniuan José okinmaluijtokaj ichkamej ik altepetl Siquem. Uan Jacob okilui José ma kinmitati ken okatkaj ikniuan. Ijkuak ikniuan José okitakej, okijtojkej: “Ompa uits akin kochtemiki. ¡Ma tikmiktikan!”. Ik non, okitlamotlakej ijtik se tekochtli uejkatlan. Pero se ikni tlen omotokayotiaya Judá, okijto: “Amo xikmiktikan. Okachi kuali, ma tiknemakakan para ma yeto tlakeuali”. Uan ijkon okichijkej. Okinemakakej innauak sekimej tlakamej tlen otlanemakayaj, ika 20 platajtomin. Yejuan oualayaj itech altepetl Madián uan oyayaj Egipto.

Satepan, ikniuan José okitlalilijkej itlaken ieso se tentso uan okiuikilijkej intajtsin uan okiluijkej: “¿Amo nin iaxka mokone?”. Jacob omokuayejyeko se yolkatl okimikti José uan sapanoa omoyolkoko. Amo ikaj ueli okiyolseuiaya.

Itech Egipto, se tlakatl ueyititok tlen omotokayotiaya Potifar okiko José para yetoskia itlakeual. Pero Jehová okatka iuan José. Potifar okitak José kuali otekitiaya uan itech otlaneltokaya. San niman, José okiyekanaya nochi tlen okipiaya Potifar.

Isiua Potifar okipaktiaya José porque kuajkualtsin omotaya uan okatka chikauak. Ik non, okiluiaya iuan ma moteka. ¿Tlen okichiuaya José? Okixtopeuaya uan okiluiaya: “Non amo kuali. Noteko notech tlaneltoka uan te tiisiua. Nitlajtlakolchiuas ixpan toTajtsin Dios tla mouan nimotekas”.

Se tonal, isiua Potifar okinekiaya kichiualtis José iuan ma moteka. Okikitskili itlaken, pero José san niman ocholo. Ijkuak Potifar oajsito ikalijtik, isiua okikajkaya uan okilui José okinekiaya kichiualtis iuan ma moteka. Potifar sapanoa okualanki uan otlanauati ma kitsakuakan José. Pero Jehová amo okilka José.

Ijkuak José otsaktoka, faraón akin otlanauatiaya Egipto, okochtemik itlaj tlen amo ikaj okimatiaya tlen okijtosnekiaya. Pero se itlakeual okilui faraón se tlakatl tlen omotokayotiaya José uelis kiluiskia tlen okijtosnekiaya ikochtemikilis. Ik non, faraón otlanauati san niman ma kinotsatij José.

Faraón okitlajtlani José: “¿Tikmati tlen kijtosneki tlen onikochtemik?”. José okinankili: “Chikome xiuitl itech Egipto yetos miak tlakuali uan satepan yetos apistli chikome xiuitl. Xikpejpena se tlakatl ixtlamatki uan ye ma kitlati tlakuali uan ijkon altepetl amo apismikis”. Faraón okilui: “¡Te nimitspejpena! Te noijki tiueyititos nikan Egipto”. Pero ¿tleka José okimatki tlen okijtosnekiaya tlen okochtemik faraón? Jehová okipaleui.

Chikome xiuitl José okikololo tlakuali. Satepan, omochi tlen ye okijto. Itech nochi Tlaltikpak amo okipiayaj tlen kikuaskej uan nochtin oyayaj Egipto kikoatiuij tlakuali. Jacob, itajtsin José, okimatki itech Egipto okatka tlakuali, ik non, okintitlanki majtlaktli ikoneuan ma kikoatij tlakuali.

Ikoneuan Jacob okitatoj José uan ye san niman okinmixmatki. Pero ikniuan amo okixmatkej. Omotlankuaketskej ixpan José ijkon ken ye okochtemik ijkuak okatka telpochtli. José okinekiaya kimatis kox ikniuan okipatlakej inyelis, ik non, okinmilui: “Namejuan san onantlachiakoj kox amo chikauak toaltepe”. Yejuan okinankilijkej: “¡Amo san otitlachiakoj! Tiuitsej itech Canaán. Otikatkaj 12 tiiknimej, pero se yomikik uan tokni xokoyotl kajki iuan totajtsin”. José okinmilui: “Xikualikakan namokni xokoyotl uan namechneltokas”. Ijkuakon, omokuepkej ikalijtik intajtsin.

Ijkuak ikalchanejkauan Jacob oksepa amo okipiayaj tlen kikuaskej, Jacob okinmilui ikoneuan oksepa ma yakan Egipto. Yejuan okiuikakej inmikni xokoyotl tlen omotokayotiaya Benjamín. José okinyejyeko ikniuan. Ye otlanauati ma kitlalikan icopa de plata ijtik ipoxa Benjamín kanin okiuikaya tlakuali uan ma kijtokan ye okichteki. Ijkuak itlakeualuan José okajsikej copa ijtik ipoxa Benjamín, ikniuan omotlajtlachialtijkej. Okiluijkej José yejuan ma kintlajyouilti uan amo Benjamín.

Ijkon José okimatki ikniuan okipatlakej inyelis. Ayakmo okixiko uan opejki choka uan okijto: “Ne niJosé, namokni. ¿Ok yoltok notajtsin?”. Ikniuan sapanoa omotlajtlachialtijkej. Pero José okinmilui: “Amo ma namechyolkoko tlen amo kuali onankichijkej. ToTajtsin Dios onechualikak nikan para namechmakixtis. Pero ¡totoka! Xiknotsatij notajtsin”.

Ikniuan José oyajkej inkalijtik uan okiluijkej ninmej kuali tlajtolmej intajtsin uan okiuikakej Egipto. Maski opanok miak xiuitl, José oksepa okitak itajtsin.