¿Tlen mokuayejyekouaj iTlaixpantijkauan Jehová ijkuak ikaj ixpoliui uan ijkuak kitokaj?
Tejuan tiktlakamatij Biblia. Ikinon kisa itech Biblia nochi tlen timokuayejyekouaj ijkuak ikaj ixpoliui uan ijkuak kitokaj. Matikitakan seki tlamantli:
Tinochtin timoyolkokouaj ijkuak ixpoliui se tofamiliar. Idiscípulos Jesús okinchokilijkej infamiliares ijkuak oixpolikej (Juan 11:33-35, 38; Hechos 8:2; 9:39). Ikinon ijkuak ikaj ixpoliui amo tikitaj ken se iluitl (Eclesiastés 3:1, 4; 7:1-4). Non tonal, timochijchikauaj tikinmajsikamatiskej akinmej moyolkokouaj (Romanos 12:15).
Akinmej yoixpolikej amitlaj kimachiliaj nion tlajyouiaj. Maski tlatlamantli toaltepe uan tlatlamantli tikchiuaj, amo tikchiuaj ken oksekimej ijkuak kijtouaj akinmej yoixpolikej ok kanaj yoltokej uan uelis itlaj techchiuiliskej. Porque Biblia amo tlamachtia non tlamantli (Eclesiastés 9:5, 6, 10). Amo tikintlamaniliaj akinmej yoixpolikej, amo tikinnotsaj uan amo tikinmiluiaj matechpaleuikan. Amitlaj tikchiuiliaj akin yoixpoliuik inamik nion amo tikinmiluichiuiliaj mikamej sejse xiuitl. Biblia kijtoua: “Xikinkakajtewakah [...] amo xiktelkokah tlan teyolijtlakoa”. Tejuan tiktlakamatij nin tlanauatil porque toTajtsin Dios amo kipaktia nin tlamantli (2 Corintios 6:17).
Oksepa kinyolitiskej akinmej yoixpolikej. Biblia kijtoua ajsis tonal kinyolitiskej akinmej yoixpolikej uan ijkuakon ayakmo ikaj ixpoliuis (Hechos 24:15; Apocalipsis 21:4). Nin sapanoua techyolchikaua ijkuak ikaj ixpoliui. Noijki okinyolchika tokniuan tlen okatkaj itech achto siglo (1 Tesalonicenses 4:13).
Biblia techpaleuia amo matimoueyinekikan (Proverbios 11:2). Ijkuak ikaj ixpoliui amo tikchiuaj miak tlamantli para tikintlajtlachialtiskej oksekimej uan ijkon makitakan tikpiaj miak tomin (1 Juan 2:16). Ikinon amo tiktekitiltiaj miak tomin para mamoyolpaktikan oksekimej uan amo tikinkouiliaj tlen sapanoua patio tlen ijtik kintokaskej. Noijki amo patio totlaken tikonakiaj non tonal.
Amo tikinchiualtiaj oksekimej makichiuakan ken tejuan ijkuak ikaj ixpoliui. Tejuan timoyekanaj ika nin principio: “Tosejselti tikmokuitiskeh inawak Dios nochi tlan otikchijkeh” (Romanos 14:12). Pero tikintlakaitaj ijkuak tikinyekiluiaj tlen tikneltokaj (1 Pedro 3:15).
¿Tlen tikchiuaj ijkuak ikaj ixpoliui?
¿Kanin tikchiuaj? Nin tlamantli kipejpenaj ifamiliares akin oixpoliuik. Tla yejuan kinekij, uelis kichiuaskej itech kali kanin timonechikouaj tiiTlaixpantijkauan Jehová, inkalijtik, itech se crematorio noso kanin kitokaskej akin oixpoliuik.
¿Tlen tikchiuaj? Tiktemakaj se tlapoualistli para tikinyolchikauaskej akinmej moyolkokouaj uan tikinmiluiaj Biblia kijtoua ken katej akinmej yoixpolikej. Noijki tikinmiluiaj toTajtsin Dios okijto ajsis tonal kinyolitis (Juan 11:25; Romanos 5:12; 2 Pedro 3:13). Noijki tikijtouaj ken okipiaya iyelis akin oixpoliuik uan noijki timotlapouiaj ken techpaleuis tlen ye okichi (2 Samuel 1:17-27).
Noijki uelis titlakuikaskej se tlakuikali tlen kisa itech Biblia (Colosenses 3:16). Saiktlami tikchiuaj se tlatlaujtilistli para mateyolchikaua (Filipenses 4:6, 7).
¿Namechtlaxtlauiaj noso nankololouaj tomin? Amo. Amo techtlaxtlauiaj ijkuak tiktemakaj se tlapoualistli. Noijki amo keman tikololouaj tomin kanin timonechikouaj (Mateo 10:8).
¿Akinmej uelis yaskej? Ijkuak tiktemakaj tlapoualistli itech kali kanin timonechikouaj ijkuak ikaj ixpoliui, nochtin uelis yaskej ijkon ken ijkuak nochipa timonechikouaj. Ikinon uelis yaskej akinmej amo iTlaixpantijkauan Jehová.
¿Tikintlajpalouaj oksekimej ijkuak akin oixpoliuik kipia okse religión?
Moneki tisejse tikpejpenaskej kox tiaskej pero ijkuak tikchiuaskej moneki tikilnamiktoskej tlen kijtoua Biblia uan tlen tikchiuaskej amo makikuejso totlalnamikilis (1 Timoteo 1:19). Pero amo tikchiuaj tlen okseki religiones kichiuaj. Porque tlen kichiuaj kixnamiki tlen kijtoua Biblia (2 Corintios 6:14-17).