Ijkuak Salomón opejki kinauatia altepetl Israel, Jehová okitlajtlani: “¿Tlen tikneki ma nimitsmaka?”. Salomón okinankili: “Ok nitelpochtli uan amo nikmati ken nikchiuas tlen moneki. Nimitstlatlaujtia, xinechmaka ixtlamatilistli para nikmaluis moaltepe”. Jehová okilui: “Nimitsmakas ixtlamatilistli ijkon ken otinechilui. Tiyetos okachi tiixtlamatki itech nochi Tlaltikpak. Noijki tikpias miak tomin uan tiyoltos miak xiuitl tla tinechtlakamatis”.

Salomón opejki kichijchiua teokali. Okitekitilti oro, plata, kuauitl uan tetl tlen okachi kuali. Miakej tlakamej uan siuamej tlen kuali otekitiayaj, otlapaleuijkej okichijchijkej teokali. Ouejkajkej chikome xiuitl okichijchijkej teokali. Ijkuakon, oajsik tonal ijkuak teokali okimaktilijkej Jehová, ik non, okitlalijkej tlamanali ipan altar. Salomón omotlankuaketski ixpan altar, omotlatlaujti uan okijto: “Oh Jehová, moneki tikpias se teokali okachi ueyi uan okachi kuajkualtsin amo ken nin. Pero, nimitstlatlaujtia, xikseli ken timitsueyichiuaj uan techkaki ijkuak timitstlatlaujtiaj”. ¿Tikneltoka Jehová okipakti teokali? ¿Okikak itlatlaujtilis Salomón? Ijkuak Salomón otlanki omotlatlaujti, oualtemok tlitl desde iluikak uan okitlati tlamanali. Ijkon Jehová okiteititi okipakti teokali. Ijkuak israelitas okitakej non, sapanoa oyolpakej.

Itech nochi Israel okixmatiayaj ueyi tekiua Salomón uan itech okseki altepemej porque okatka sapanoa ixtlamatki. Miakej oyayaj ixpan Salomón para ma kinpaleui kiyektlaliskiaj ouijkayotl tlen okipiayaj. Hasta siuatl ueyi tekiua itech Seba okitlajpaloto uan okitlajtlani miak tlamantli oui para kitaskia kox melauak ixtlamatki. Ijkuak okikak ken otlanankili Salomón, okijto: “Amo onikneltokaya tlen motech onechtlapouijkej, pero axkan yonikitak okachi tiixtlamatki amo ken onechiluijkej. MoDios Jehová yomitsteochi”. Itech Israel nochtin oyolpakiayaj uan kuali okatkaj. Pero satepan nochi omopatlak.

Israelitas okipixkej yolseuilistli ijkuak Salomón okiueyichiuaya Jehová. Pero satepan ye omonamikti iuan miakej siuamej tlen oualayaj itech okseki altepemej uan okinueyichiuayaj teotsitsintin. Salomón okipatlak iyelis uan noijki opejki kinueyichiua teotsitsintin. Jehová okualanki uan okilui: “Mokalchanejkauan ayakmo tlanauatiskej itech nochi Israel porque nikxelos tekiuajkayotl. Se motlakeual kinnauatis okachi miakej altepemej uan mokalchanejkauan amo miakej altepemej kinnauatiskej”.

Jehová okichi okse tlamantli para kuali ma kajsikamatikan tlen okijto. Se itlakeual Salomón tlen omotokayotiaya Jeroboán, okinamik itech ojtli teotlajtojki Ahíya. Nin teotlajtojki okonakijtoka se tlakemitl, okimokixtili uan okitsayanki 12 pedazos. Uan okilui Jeroboán: “Jehová ayakmo kinkauilis ikalchanejkauan Salomón ma tlanauatikan itech nochi Israel porque kixelos tekiuajkayotl. Nimitsmaka majtlaktli pedazos tlen okiskej itech nin tlakemitl, porque te tikinnauatis majtlaktli tlanechikolmej”. Ijkuak ueyi tekiua Salomón okimatki tlen opanok, okinekiaya kimiktis Jeroboán. Ik non, Jeroboán ocholo Egipto. Ijkuak Salomón omikik, ikone tlen omotokayotiaya Rehoboam opejki tlanauatia. Jeroboán okitak ayakmo itlaj kipanoskia uan omokuepki altepetl Israel.

Tlayekankej itech Israel okiluijkej Rehoboam: “Tla tikinpaleuia akinmej tikinnauatia, amo keman mitskauaskej”. Pero sekimej telpokamej tlen okatkaj iyolikniuan Rehoboam okiluijkej: “Xikintlajyouilti akinmej tikinnauatia. Xikinchiualti chikauak ma tekitikan”. Rehoboam okichi tlen okiluijkej iyolikniuan uan okintlajyouilti akinmej okinnauatiaya. Ik non, yejuan okualankej uan okitlalijkej Jeroboán ma kinnauati majtlaktli tlanechikolmej. Nonmej majtlaktli tlanechikolmej okitokayotijkej itekiuajkayo Israel. Uan ome tlanechikolmej tlen omokajkej okitokayotijkej itekiuajkayo Judá uan okinnauatiaya Rehoboam. Ijkon okinxelojkej 12 tlanechikolmej tlen okatkaj itech Israel.

Rehoboam okinauatiaya Jerusalén. Jeroboán amo okinekiaya ialtepe ompa ma kiueyichiua Jehová. ¿Tikmati tleka? Porque Jeroboán okinekiaya san ye ma kitlakamatikan uan amo Rehoboam. Ik non, okinchijchi ome torojkonemej ika oro uan okinmilui akinmej ochantiayaj ialtepe: “Jerusalén uejka. Okachi kuali, nikan xikinueyichiuakan ninmej torojkonemej”. Yejuan ijkon okichijkej uan oksepa okilkajkej Jehová.