¿KEN TLAPALEUIA TOMIN TLEN TIKTEMAKAJ?
JW Broadcasting mota itech televisión maski amo onka internet
1 DE ABRIL DE 2021
Sejse metstli tikchiaj tikinmitaskej tlamachtilmej uan videos tlen kisa itech JW Broadcasting. Pero sekimej tokniuan ompa África amo ueli kinmitaj. ¿Tleka?
Ompa África amo nochtin kipiaj internet uan kanin kipiaj, amo okachi onka señal noso patio. Se tokni tlayekanki itech circuito tlen chanti Madagascar se tonal okikixti se video itech JW Broadcasting kanin kintetlanetiaj computadoras uan okitlaxtla 16 dólares.a Nin tlen kitlani akin tekipanoua se semana.
Maski amo kipiaj internet, miakej tlen chantij África ueli kinmitaj videos itech JW Broadcasting. ¿Ken kichiuaj?
itech 2017, akinmej chantij África subsahariana ueli kinmitaj videos itech JW Broadcasting itech se canal de televisión. Ika nin canal amo itlaj kitlaxtlauaj, kipanoltia videos nochi tonal, nochi semanas uan ika 16 tlatlamantli tlajtolmej.
Tokniuan tlen chantij Mozambique kiyektlaliaj antena itech kali kanin timonechikouaj (2018).
ITlaixpantijkauan Jehová kitlaxtlauaj se canal de televisión kanin kinpanoltiaj videos. Kanaj 35 altepemej itech África subsahariana kipiaj nin señal. Itech se metstli nin canal kitlaxtlauaj kanaj 12,000 dólares. Ualeua okachi patio porque kitlaxtlauaj okse canal tla kinekij kipanoltiskej okseki tlamantli. Axkan miakej yiueli kitaj uejueyij nechikolmej regionales uan ijkuak se tokni tlen tlapaleuia itech kali kanin kinyekana iTlaixpantijkauan Jehová kintlajpaloti oksekimej tokniuan itech okse kali Betel.
Tokniuan tlen tlapaleuiaj para kinchiuaskej kalmej ompa Malaui kitaj programa Jw Broadcasting ika antena (2018).
Miakej tokniuan uan noijki akinmej amo, kitaj nin canal. Pero miakej tokniuan amo kipiaj tomin para kikouaskej tlen moneki para kitaskej non canal. Ik non, okitlalijkej tlen moneki itech 3,670 kalmej kanin monechikouaj tokniuan para uelis kitaskej JW Broadcasting. Nochi nin ipati kanaj 70 dólares tla yikipiaj se televisión noso se proyector. Tla amo, kitlaxtlauaj hasta 530 dólares.
Tokniuan motlasojkamati kipia nin canal. Se tlayekanki tlen chanti Camerún okijto: “Nofamilia uan ne, nochi nin tikitaj ken maná ik kanin tlauaki”. Se tokni itoka Odebode tlen chanti Nigeria, kijtoua: “Ne uan nofamilia tikita nin canal eyi uelta itech se semana. Tokoneuan san kinektokej kitaskej nin canal. Ualeua techiluia oksepa ma tikinmititikan”. Rose noijki chanti Nigeria, okijto: “¡Niyolpaki! Achto sapanoua onikitaya noticias, pero axkan okachi nechpaktia nikitas canal JW. Ijkuak onikitaya noticias san onikualaniaya uan amo kuali onimomachiliaya. Pero canal JW nechyolchikaua uan kichiua kuali ma nimomachili... Nin canal sapanoua nechpaktia. Nin se tlateochiuali tlen techmaka Jehová”.
Se familia tlen chanti malaui kitaj se video para konemej itech Jw ika antena.
Ompa Mozambique, se tlayekanki itech circuito kijtoua okitlalijkej tlen moneki itech kalmej kanin monechikouaj para uelis kitaskej canal JW. Tokniuan ajsitiuij se hora achto peuas innechikol noso satepan para kitaskej JW Broadcasting.
Se tlanechikol ompa Etiopía okitakej JW Broadcasting tlen kisa sejse metstli uan amo ika internet (2018).
Itech ueyi nechikol internacional tlen omochi 2019 ompa Johannesburgo (Sudáfrica), itech nin canal okinpanoltijkej itech chiknaui altepemej tlen otlamachtijkej tokniuan tlen pouij itech Cuerpo Gobernante. Sphumelele tlapaleuia itech Departamento Local de Broadcasting ompa Sudáfrica, ye okijto: “Tlamachtilmej otikinpanoltiayaj ika internet. Pero omonekiaya kuali internet uan patio otiktlaxtlauayaj. Axkan ika canal JW okachi kuali tikinpanoltia tlamachtilmej uan amo patio tiktlaxtlauaj”.
Timechtlasojkamatiliaj porque nantlapaleuiaj ika tomin tlen nankitemakaj ika nochi namoyolo, tokniuan tlen chantij África ueli kitaj canal JW Broadcasting. Sapanoua tiktlasojkamatij nanmochijchikauaj nankipaleuiskej iTekiuajkayo toTajtsin Dios ika tomin tlen nankitemakaj itech donate.jw.org.
a Itech nin tlamachtil, ijkuak tikijtoskej dólares kijtosneki tomin tlen kipiaj Estados Unidos.