¿Techpaleuia Biblia matiteajsikamatikan?

“Kuali timouikaj inuan oksekimej tla tikinmajsikamatij” (1995 Unesco okinmijto principios tlen techpaleuiaj matiteajsikamatikan).

Ijkuak ikaj amo teajsikamati, amo tetlakaita uan kinkokolia oksekimej. Ijkuak ikaj ijkon kichiua teuijuikaltia, techikoita uan tetlajyouiltia.

Miakej tlatlamantli mokuayejyekouaj tlen kijtosneki titeajsikamatiskej. Sekimej kijtouaj akinmej teajsikamatij moneki kuali kitaskej tlen kichiuaj oksekimej uan amitlaj kinmiluiskej. Pero oksekimej mokuayejyekouaj ken kijtoua Biblia: akin teajsikamati kitlakaita tlen kineltokaj oksekimej uan ken mokuayejyekouaj maski ye amo kichiua ken yejuan.

¿Uelis techpaleuis Biblia matiteajsikamatikan itech ninmej tonalmej?

Biblia kijtoua ken titeajsikamatiskej

Biblia techmachtia matiteajsikamatikan, ompa kijtoua: “Nochtin makimatikan namejuan nanteajsikamatij” (Filipenses 4:5). Noijki kijtoua matitetlasojtlakan, matiyetokan tiyolkualmej uan matikchiuakan tlen kuali. Akinmej kichiuaj tlen kijtoua Biblia maski amo kinpaktia tlen oksekimej kichiuaj amo kinmiluiaj ayakmo makichiuakan.

Biblia techmachtia toTajtsin Dios techiluia tlen moneki tikchiuaskej, ompa kijtoua matikchiuakan tlen kuali (Miqueas 6:8). Itech Biblia, toTajtsin Dios techiluia tlen moneki tikchiuaskej para tiyolpakiskej (Isaías 48:17, 18).

Noijki toTajtsin Dios amo techkauilia matikinteneuakan oksekimej. Biblia kijtoua: “San toTajtsin Dios kintemaka tlanauatilmej uan san ye Juez [...] ¿akin te para tikinteneuas oksekimej?” (Santiago 4:12). Ye kinkauilia nochtin makipejpenakan tlen kichiuaskej uan makinpano ijkon ken okipejpenkej (Deuteronomio 30:19).

Matitetlakaitakan ken kijtoua Biblia

Biblia kijtoua nochtin matikintlakaitakan (1 Pedro 2:17). Akinmej kintlakamatij itlanauatiluan toTajtsin Dios, kintlakaitaj nochtin maski san tlen kineltokaj noso kichiuaj (Lucas 6:31). Non amo kijtosneki moneki kiseliskej nochi tlen kineltokaj noso kijtouaj oksekimej, nion amo kipaleuiskej tlen kipejpenaj oksekimej. Pero yejuan mochijchikauaj kinchiuiliskej tlen kuali uan kintlakaitaskej ijkon ken okichi Jesús.

Se tonal Jesús okixmatki se siuatl tlen okse tlamantli otlaneltokaya. Non siuatl ochantiaya iuan se tlakatl tlen amo inamik, uan Jesús amo kuali okitaya ijkon makichiua. Pero Jesús okitlakaitak non siuatl (Juan 4:9, 17-24).

Jesús kiteititia tetlakaita ijkuak motlapouia iuan se siuatl inakastlan se atekochtli.

Tejuan titetlakaitaj ijkuak tikinmiluiaj oksekimej tlen tikneltokaj ijkon ken okichi Jesús (1 Pedro 3:15). Biblia techiluia amo matikinchiualtikan oksekimej makineltokakan tlen tejuan tikneltokaj. Kijtoua akinmej kichiuaj ken Cristo amo moneki mokualaniskej uan moneki nochtin makinyeknotsakan, hasta akinmej amo mokuayejyekouaj ken yejuan (2 Timoteo 2:24).

Biblia techmachtia amo matitekokolikan

Biblia kijtoua: “Xiktemokan ken kuali nanmouikaskej inuan nochtin” (Hebreos 12:14). Akinmej yolkualmej amo tekokoliaj uan mochijchikauaj kuali mouikaskej inuan oksekimej. Pero nochipa kitlakamatij tlen kijtoua toTajtsin Dios (Mateo 5:9). Biblia noijki techiluia matikintlasojtlakan akinmej techkokoliaj. Non kijtosneki tikintlakaitaj hasta akinmej techtlajyouiltiaj (Mateo 5:44).

Itech Proverbios 6:16-19, Biblia kijtoua toTajtsin Dios amo kipaktia oksekimej matetlajyouiltikan uan matepinauikan. Non kijtosneki toTajtsin Dios kikokolia tlen amo kuali, pero amo kinkokolia personas. Biblia techmachtia toTajtsin Dios kintlapojpoluia uan kinpaleuia akinmej kinekij kipatlaskej innemilis uan kintlakamatiskej itlanauatiluan (Isaías 55:7).

Biblia kijtoua matiteajsikamatikan uan matitetlakaitakan

Tito 3:2: “Mateajsikamatikan uan nochipa mayetokan yolyamankej inuan oksekimej”.

Akin teajsikamati amo kualani ijkuak oksekimej tlatlamantli mokuayejyekouaj uan mochijchikaua nochtin mamotlakaitakan.

Mateo 7:12: “Xikchiuakan nochi tlen namechpaktiskia manamechchiuilikan oksekimej”.

Nochtin techpaktia matechtlakaitakan uan makajsikamatikan tlen timokuayejyekouaj uan tlen tikmachiliaj. Tla tikneki tikmatis ken uelis tikchiuas tlen Jesús otechnauati, xikita tlamachtil “¿Qué es la Regla de Oro?”.

Josué 24:15: “Xikpejpenakan akin nankitekichiuiliskej”.

Kuali timouikaj tla tiktlakaitaj tlen oksekimej kipejpena kichiuaskej.

Hechos 10:34: “ToTajtsin Dios amo techikoita”.

ToTajtsin Dios amikaj kichikoita maski tlatlamantli incostumbres, maski tlakatl noso siuatl, maski tlatlamantli inmialtepe, tlatlamantli tlachixtokej, tlatlamantli omoskaltijkej noso tlatlamantli tlen kinpanotok. Kichiuaj ken toTajtsin Dios akinmej nochtin kintlakaitaj.

Habacuc 1:12, 13: “[ToTajtsin Dios] amo tikkaua mayeto tlen amo kuali”.

ToTajtsin Dios amo nochipa tlaxikojtos. Ye amo kitekauilis oksekimej nochipa makichijtokan tlen amo kuali. Tla tikneki tikmatis okachi, xikita video ¿Tleka toTajtsin Dios ok kikajtok ma titlajyouikan?

Romanos 12:19: “Xikkauilikan toTajtsin Dios makiteititi ikualanilis. Porque ijkuilitok: “Jehováa kijtoua: ‘Ne nimomakopas uan ne nikintlajyouiltis’””.

Jehová amikaj kikauilia mamomakopa. Ye yokijto keman kiyektlalis nochi tlen amo kuali. Tla tikneki tikmatis okachi, xikita tlamachtil “¿Alguna vez se hará justicia en el mundo?”.

a ToTajtsin Dios itoka Jehová (Salmo 83:18). Xikita tlamachtil “¿Akin Jehová?”.

ITlaixpantijkauan Jehová, ¿kitlakaitaj tlen oksekimej kineltokaj?

Sekimej kijtouaj titetlapouiaj ika Biblia porque amo kuali tikitaj tlen oksekimej kineltokaj. Pero tejuan tikmatij nochtin uelis kipejpenaskej tlen kineltokaskej uan tikintlakaitaj. Noijki amikaj tikchiualtiaj mamokuayejyeko nion makichiua ken tejuan. Tla ijkon, ¿tleka tikintlapouiaj akinmej yikipiaj inreligión? Tla tikneki tikmatis, xikita tlamachtil “ITlaixpantijkauan Jehová, ¿kinchiualtiaj oksekimej makipatlakan inreligión?”.

Amikaj tikchiualtiaj mamochiua iTlaixpantijka Jehová nion touan mayeto. Tla ikaj ayakmo kineki yetos iTlaixpantijka Jehová, tejuan tiktlakaitaj tlen yokipejpenki. Pero uelis ikaj motlajtlanis: “Tla iTlaixpantijkauan Jehová kitlakaitaj tlen oksekimej kineltokaj, ¿tleka sekimej kinkixtiaj uan ayakmo inmiuan mouikaj?” (1 Corintios 5:11, 13). Tla tikneki tikmatis okachi, xikita tlamachtil “¿Ayakmo motlapouiaj iTlaixpantijkauan Jehová iuan akinmej ayakmo monechikouaj?”.