¿Tlen mitspaleuis tla mitstlajyouiltiaj?
Akinmej pouij itech Organización Mundial de la Salud (OMS) kijtouaj ipan nochi tlaltikpak kintlajyouiltiaj siuamej. Nin panoua ken se kokolistli porque moxitinijti, ik non, moneki san niman itlaj makichiuakan. Akinmej pouij itech Organización Mundial de la Salud kijtouaj: “Kanaj 30% siuamej yokintlajyouiltijkej uan sekimej yokinchiualtijkej mamotekakan iuan innamik”. Noijki akinmej pouij itech ONU okijtojkej yisexiuitl mojmostla okinmixpolojkej kanaj 137 siuamej uan ijkon okinchiuili innamik noso se infamiliar.a
Nin kiteititia sapanoua tlajyouiaj akinmej katej kalijtik. Pero amo ueli kijtouaj tlen kimachiliaj uan tlen kinyolkokoua.
¿Tejuatsin ijkon mitstlajyouiltiaj? ¿Tikixmati ikaj ijkon kitlajyouiltiaj? Xamo mitspaleuis tlen techiluia Biblia.
Ajsis tonal ijkuak ayakmo ikaj kitlajyouiltiskej
¿Ken uelis tikinpaleuis akinmej kintlajyouiltiaj?
Amo tejuatsin motlajtlakol
Biblia kijtoua: “Tosejselti tikmokuitiskeh inawak Dios nochi tlan otikchijkeh” (Romanos 14:12).
Xikilnamikto nin tlamantli: ToTajtsin Dios amo kipaktia ijkuak ikaj tetlajyouiltia.
Tla monamik mitsiluia mitstlajyouiltia porque motlajtlakol, amo xikneltokili. Porque nochtin siuamej moneki makintlasojtlakan uan amo makintlajyouiltikan (Colosenses 3:19).
Ualeua sekimej tetlajyouiltiaj porque mokokouaj, ik non, amo kuali mokuayejyekouaj. Noijki oksekimej tetlajyouiltiaj porque okintlajyouiltijkej ijkuak okinmiskaltijkej uan oksekimej ijkon kichiuaj porque tlauanaj. Pero toTajtsin Dios amo kipaktia ijkuak ikaj tetlajyouiltia, ik non, ayakmo moneki ijkon makichiua.
Xiktemo ikaj mamitspaleui
Biblia kijtoua: “Nochi kuali kisa ijkuak kintlajtlaniaj oksekimej tlen kichiuaskej” (Proverbios 15:22).
Xikilnamikto nin tlamantli: Tla tikmachilia uelis mitschiuiliskej tlen amo kuali uan amo tikmati tlen tikchiuas, xikilui ikaj mamitspaleui.
¿Tleka moneki mamitspaleuikan? Porque tla mitstlajyouiltiaj xamo miak tlamantli mitstekipachoua uan xamo amo tikmati tlen tikchiuas. Xamo amo tikmati tlen tlamantli tikchiuas tlen nikan moijtoua:
Kox tikmaluis moyolilis
Kox tikinmaluis mokoneuan
Kox tikpias tlen ika timopanoltis
Kox tiktlasojtlas monamik
Amo tikneki tikkauas monamik porque timokuayejyekoua ayakmo mitstlajyouiltis.
Ijkuak ikaj kitlajyouiltiaj xamo kimachilia sapanoua oui tlen kipanotok uan amo kimati tlen kichiuas. Tla ijkon mitspanotok, ¿akin uelis tikiluis mamitspaleui?
Uelis tikiluis se mofamiliar noso akin iuan timouika. Yejuan uelis mitspaleuiskej para tikmatis tlen tikchiuas uan noijki mitsyolseuiskej. Tla tikiluis akin kitekipachoua tlen mitspanoua, mitspaleuis.
Uelis titlanotsas kanin kinpaleuiaj akinmej kintlajyouiltiaj. Ompa totoka uelis mitspaleuiskej. Akinmej ompa tlapaleuiaj mitsiluiskej tlen tikchiuas para amitlaj mamitspano. Tla monamik mokuayejyekoua moneki makipaleuikan uan melauak kineki kipatlas iyelis, ompa uelis kipaleuiskej.
Noijki uelis titlanotsas oksekan kanin noijki tepaleuiaj. Ompa uelis san niman mitspaleuiskej tla kinekij itlaj mitschiuiliskej uan mitspaleuiskej mamitspajtikan tla yomitskojkojkej.
Amo tika moselti
Biblia kijtoua: “Jehováb kajki inmiuan akinmej moyolkokouaj; ye kinmakixtia akinmej yolpatlachitokej” (Salmo 34:18).
Xikilnamikto nin tlamantli: ToTajtsin Dios mitspaleuis.
Jehová kitekipachoua tlen mitspanotok (1 Pedro 5:7). Ye kimatok ken timomachilia uan melauak mitsajsikamati. Ye mitsyolseuis ika Biblia uan mitsyoleua xiktlatlaujti uan xikilui mamitspaleui para tikmatis tlen tikchiuas uan noijki xikilui mamitspaleui xitlaxiko (Isaías 41:10).
Ajsis tonal ijkuak ayakmo ikaj kitlajyouiltiskej
Biblia kijtoua: “Yejuan motlaliskej itlampa uvas uan itlampa higos uan amikaj kinmomojtis” (Miqueas 4:4).
Xikilnamikto nin tlamantli: Biblia kijtoua amo miak poliui ayakmo ikaj techtlajyouiltis.
San Jehová uelis kiyektlalis nochi tlen techtlajyouiltia. Biblia kijtoua: “Ye kinmixayowajwatsas nochteh, iwa ayakmó yetos mikílistli, nion chokílistli, nion neyolkókoli, nion tekipanólistli” (Apocalipsis 21:4). Ijkuakon ayakmo tikilnamikiskej nochi tlen amo kuali otechpanok uan san tikilnamiktoskej tlen kuali techpanos (Isaías 65:17). Biblia techiluia ijkon tiyetoskej.
a Itech nin tlamachtil titlajtoskej itech siuamej tlen kintlajyouiltiaj pero noijki kinpaleuis tlakamej tlen kintlajyouiltiaj.
b Biblia kiteititia toTajtsin Dios itoka Jehová.