TLAMACHTIL 5
Ma kinpaleuikan akinmej yikipiaj miak xiuitl
¿AKIN MONEKI KINPALEUIS KONEMEJ?
Tetajmej moneki kinpaleuiskej uan kinnojnotsaskej. Pero noijki uelis kinpaleuiskej akinmej yikipiaj miak xiuitl.
¿TLEKA MIAK IPATI?
Itech seki altepemej telpokamej uan ichpokamej, amo okachi motlapouiaj iuan akinmej yikipiaj miak xiuitl. Ma tikitakan tleka ijkon tikijtoaj:
Konemej uejkika katej escuela uan ompa okachi mouikaj iuan oksekimej konemej. Ompa amo miakej katej akinmej tlamachtiaj noso tlen yikipiaj miak xiuitl.
Noijki ijkuak kisaj escuela uan yauij inkalijtik, amikaj kinchia porque intatajuan tekipanoaj.
Ompa Estados Unidos, ixtlamatkej okitakej konemej tlen kipiaj kanaj chikueyi xiuitl hasta doce xiuitl, kitaj kanaj chikuase horas televisión, kikakij tlatsotsonali noso mauiltiaj ika videojuegos.a
Amochtli Hold On to Your Kids (Aférrese a sus hijos) kijtoa: “Axkan telpokamej uan ichpokamej kintlajtlaniaj inyolikniuan tlen kichiuaskej. Ayakmo motlapouiaj iuan intatajuan, akinmej tlamachtiaj noso akinmej yikipiaj miak xiuitl”.
¿KEN NANKINPALEUISKEJ?
Xiyetokan iuan namokoneuan
PRINCIPIO BÍBLICO KIJTOA: “Kuali xikmachti telpochtli para kuali ma uia uan maski kipias miak xiuitl kichiuas tlen kuali” (Proverbios 22:6).
Konemej kinekij ma kinpaleuikan intatajuan. Miakej ixtlamatkej kijtoaj ijkuak moskaltiaj okachi kipatioitaj tlen kinmiluiaj intatajuan uan amo tlen kinmiluiaj inyolikniuan. Se tlakatl tlen tlamachtia Psicología tlen itoka Laurence Steinberg, itlaj okijkuilo itech amochtli You and Your Adolescent (Su hijo adolescente y usted). Okijkuilo: “Ijkuak konemej moskaltijtiuij, noijki ok kichiuaj tlen kinmiluiaj intatajuan uan kichiuaj ken yejuan”. Noijki okijto: “Konemej kipatioitaj tlen nankinmiluiaj, maski amo namechiluiaj uan maski amo kinpaktia”.
Namokoneuan kinekij xikinyekanakan, ik non, ximochijchikauakan xikinpaleuikan. Inmiuan xiyetokan. Xikinmiluikan ken nankitaj seki tlamantli, tlen okachi nankipatioitaj uan xikintlapouikan tlen yonamechpanok.
Ma namechpaleuikan akinmej yikipiaj miak xiuitl
PRINCIPIO BÍBLICO KIJTOA: “Akin nemi iuan akin ixtlamatki ye noijki yetos ixtlamatki” (Proverbios 13:20).
¿Nankinmixmatij akinmej yikipiaj miak xiuitl tlen uelis kinpaleuiskej namokoneuan? ¿Uelis nankinyoleuaskej inmiuan ma motlapouikan? Xikilnamiktokan moneki namejuan nankimachtiskej namokoneuan. Pero noijki uelis namechpaleuiskej akinmej yikipiaj miak xiuitl tlen yolkualmej. Yejuan namechpaleuiskej kuali xikinmachtikan namokoneuan. Biblia kijtoa se telpochtli itoka Timoteo okipaleui ijkuak okatka iuan tlatitlanil Pablo uan Pablo noijki omoyolchika (Filipenses 2:20, 22).
Axkan miakej konemej amo chantij iuan inkalchanejkauan porque uejka katej. Tla uejka chantij namokalchanejkauan, xikinpaleuikan namokoneuan ma motlapouikan iuan akinmej yikipiaj miak xiuitl tlen kipiaj kualtsin inyelis. Ijkon namokoneuan noijki kipiaskej kualtsin inyelis.
a Noijki okitakej telpokamej uan ichpokamej, mojmostla kitaj kanaj chiknaui horas inteléfono, intableta uan okseki tlamantli. Pero ixtlamatkej amo okijtojkej keski horas kitekitiltiaj Internet ijkuak katej escuela uan ijkuak kichiuaj intarea.