Moneki tikixmatiskej toTajtsin Dios

Pampa timochiuaskej tiiyolikniuan toTajtsin Dios, moneki tikixmatiskej. Toyolikniuan kimatij totokayo uan ijkon technotsaj, ¿amo melauak? Noijki ijkon, toTajtsin Dios kineki ma tikixmatikan uan ma tiknotsakan ika itoka. ToTajtsin Dios itoka Jehová (Salmo 83:18, Mateo 6:9). Noijki, moneki tikmatiskej tlen kipaktia uan tlen amo kipaktia, akinmej iyolikniuan uan akinmej kinkokolia. Ijkon ken panoa miak kauitl pampa akaj tikixmatiskej, Biblia kijtoa moneki tikxeloskej kauitl pampa tikixmatiskej Jehová (Efesios 5:15, 16).

Iyolikniuan toTajtsin Dios kichiuaj tlen ye kipaktia. Ximokuayejyeko ipan moyolikniuan. Tla tikinchiuilia tlen amo kuali uan tikchiua tlen amo kinpaktia, ¿ok yetoskej moyolikniuan? ¡Amo! Noijki ijkon, tla tiknekij timochiuaskej tiiyolikniuan toTajtsin Dios moneki tikchiuaskej tlen kipaktia (Juan 4:24).

Amo nochtin tlaneltokalismej techpaleuiaj ma timochiuakan tiiyolikniuan toTajtsin Dios. Jesús, akin okachi kuali iyolikni toTajtsin Dios, otlajto itech ome ojtli. Se ojtli patlauak kanin yauij miakej tlaltikpaktlakamej. Nin ojtli teuika itech mikilistli. Okse ojtli pitsauak kanin amo miakej tlaltikpaktlakamej yauij. Nin ojtli teuika itech nemilistli tlen amo keman tlamis. Nin kijtosneki ke tla tiknekij timouikaskej iuan toTajtsin Dios, moneki tikmatiskej ken kineki ma tikueyichiuakan (Mateo 7:13, 14).