¿Keski iTlaixpantijkauan Jehová tikinmixmati? Uelis sekimej tichantij kanin tejuatsin tichanti, mouan titekitij noso timomachtiaj uan noijki kanaj yotimitstlapouijkej itech Biblia. ¿Akinmej tiiTlaixpantijkauan Jehová uan tleka tikintlapouiaj tlaltikpaktlakamej itech tlen tikneltokaj?

TiiTlaixpantijkauan Jehová tikatej ijkon ken nochtin tlaltikpaktlakamej. Itech nin tlaneltokalistli tikatej tlakamej uan siuamej tlen tiuitsej itech tlatlamantli altepemej, sekimej tikpiaj miak tlamantli uan oksekimej amo. Sekimej otikpiayaj totlaneltokalis, oksekimej amo otitlaneltokayaj itech toTajtsin Dios, maski ijkon, achto timochiuaskiaj tiiTlaixpantijkauan Jehová kuali otimomachtijkej tlen Biblia tlamachtia (Hechos 17:11). Kuali otikselijkej tlen otimomachtijkej uan satepan toneuian otikpejpenkej tikueyichiuaskej toTajtsin Jehová.

Tlen timomachtiaj itech Biblia techpaleuia. Ken nochtin tlaltikpaktlakamej, tejuan noijki tikpiaj ouijkayotl uan kemantika noijki tikchiuaj tlen amo kuali, maski ijkon, ken timochijchikauaj pampa tiktlakamatiskej itlanauatiluan Biblia, axkan melauak okachi kuali tikpiaj tonemilis (Salmo 128:1, 2). Ik non, tikintlapouiaj oksekimej itech nochi tlamantli kuali tlen otimomachtijkej itech Biblia.

Itlanauatiluan toTajtsin Dios techyekanaj. Tlanauatilmej tlen katej itech Biblia, kichiuaj kuali ma timomachilikan. Noijki techpaleuiaj pampa ma tikintlakaitakan oksekimej, ma tiyetokan tiyolkualmej uan pampa amo ma titlakajkayauakan. Noijki kichiuaj ma tikinpaleuikan oksekimej, kuali ma tiyetokan iuan tokalchanejkauan uan chipauak ma tikpiakan tonemilis. Tejuan melauak tikneltokaj toTajtsin “Dios amo kintlasojtlaj san sekimej”. Pampa san se tlamantli tikneltokaj non techsetilijtok iuan tokniuan itech nochi Tlaltikpak, uan kuali timouikaj maski tlatlamantli totlajtol tikpiaj noso maski itech tlatlamantli altepetl tiuitsej. Maski tejuan noijki ken nochtin tlaltikpaktlakamej, tikatej itech se altepetl tlen amo okse ijkon kajki (Hechos 4:13; 10:34, 35).

• ¿Tleka tiiTlaixpantijkauan Jehová tikatej ijkon ken oksekimej tlaltikpaktlakamej?

• ¿Ken techpaleuiaj tlanauatilmej tlen katej itech Biblia?

Miakej tlaltikpaktlakamej kijtoaj yikin opejki intlaneltokalis iTlaixpantijkauan Jehová. Maski ijkon, yikipia kanaj 2,700 xiuitl, itech Biblia itekipanojkauan toTajtsin Dios okintokayotijkej “itlaixpantijkauan” (Isaías 43:10-12). Ijkuak ayamo oajsiaya xiuitl 1931 otechtokayotiayaj “akinmej Momachtiaj Biblia”. ¿Tleka axkan timotokayotiaj iTlaixpantijkauan Jehová?

Pampa kitematiltia akin toTajtsin Dios. Itoka toTajtsin Dios, onesiaya sapanoa miakpa itech Biblia, ijkon ken kiteititiaj miakej tlajkuilolmej tlen yiuejkika omoijkuilojkej. Itech miakej Biblias, san okijkuilojkej toTeko noso Dios. Maski ijkon, akin melauak toTajtsin Dios omotematilti ika itoka ixpan Moisés uan okili: “Notoka Jehová, uan nin notoka tlen nochipa nikpias” (Éxodo 3:15). Ijkon omoteititi ye amo ken teotsitsintin tlen amo melauak. Uan melauak tikpatioitaj ijkon timotokayotiaj.

Pampa kiteititia toteki. Abel akin okatka yolkuali, ye achto okiteititi itlaneltokilis itech Jehová, uan satepan miakej tlaltikpaktlakamej noijki ijkon okiteititijkej itlaneltokilis itech Jehová ken Noé, Abrahán, Sara, Moisés uan David (Hebreos 11:4–12:1). Ijkon ken ikaj kijtoa ixpan tekiuajkej tlen melauak itech ikaj tlen amo itlaj okichi, tejuan noijki tiknekij tikijtoskej tlen melauak itech toTajtsin Dios.

Pampa tikchiuaj ken Jesús. Biblia kitokayotia Jesús “katlej kijtoa tlen melauak” (Apocalipsis 3:14). Jesús okijto ye okitematilti itoka iTajtsin uan noijki ‘ouala ixko yin Tlaltikpak pampa kitematiltis tlen melauak’ (Juan 17:26; 18:37). Ik non, akinmej melauak kichiuaj ken ye, moneki kipiaskej itoka Jehová uan kitematiltiskej. Non tlen timochijchikauaj tikchiuaskej nochtin tiiTlaixpantijkauan Jehová.

• Maski achto otimotokayotiayaj “akinmej Momachtiaj Biblia”, ¿tleka axkan timotokayotiaj iTlaixpantijkauan Jehová?

• ¿Keman opejki kipia Jehová iTlaixpantijkauan nikan Tlaltikpak?

• ¿Akin okachi ueyi itlaixpantijka Jehová?

Biblia okijto satepan mikiskia Cristo, itech akinmej okichiuayaj ken Cristo kisaskiaj miakej tlen tlamachtiskiaj tlen amo melauak itech Biblia (Hechos 20:29, 30). Uan non tlen opanok: sekimej tlakamej okinelojkej itlamachtiluan Jesús ika tlamachtilmej tlen okijtoayaj akinmej amo otlaneltokayaj itech toTajtsin Dios, uan ijkon omochijkej akinmej amo melauak kichiuaj ken Cristo (2 Timoteo 4:3, 4). Ika nochi tlen yotikitakej, ¿tleka tikijtoaj tlen axkan tikmatij yekmelauak tlen tlamachtia Biblia?

Oajsik tonal pampa Jehová okitematilti tlen melauak. Biblia okijto itech itlamian tonalmej “tlen melauak tlamatilistli momiakilis” (Daniel 12:4). Itech xiuitl 1870 sekimej tlakamej tlen okinekiayaj kimatiskej tlen melauak, okitakej nochi tlen otlamachtiayaj tlaneltokalismej amo melauak okisaya itech Biblia. Ik non, yejuan opejkej momachtiaj tlen melauak otlamachtiaya iTlajtol toTajtsin Dios, uan Jehová okinteochi pampa ma kajsikamatikan.

Tlakamej yolkualmej kuali omomachtijkej Biblia. Nonmej akinmej okintokayotiayaj “akinmej Momachtiaj Biblia”, omomachtiayaj Biblia ijkon ken axkan tejuan timomachtiaj: achto se tlamachtil uan satepan okse. Ijkuak okajsiayaj se tlamachtil oui, okintemoayaj oksekimej tlaxelolmej pampa kinpaleuiskia ma kajsikamatikan, uan ijkuak kuali okajsikamatiayaj ijkon ken okijtoayaj oksekimej tlaxelolmej, okijkuiloayaj. Ijkon okitekauilijkej Biblia ma kitematilti tlen melauak, ijkon okajsikamatkej tlen itoka toTajtsin Dios uan noijki tlen iTekiuajkayo toTajtsin Dios, tlen itlanekilis pampa tlaltikpaktlakamej uan Tlaltikpak, ken katej akinmej yomikej uan noijki chialistli itech yolitilistli. Pampa yejuan melauak omomachtijkej Biblia, non okinpaleui pampa ayakmo ma kineltokakan uan ayakmo ma kichiuakan tlen amo kuali tlen achto okichiuayaj (Juan 8:31, 32).

Itech xiuitl 1879 okimatkej omonekiaya kitematiltiskej ninmej tlajtolmej itech nochi Tlaltikpak. Itech non xiuitl opejki moijkuiloa revista Akin Tetlapouijtok. Kitematiltia iTekiuajkayo Jehová, tlen noijki axkan moijkuiloa. Axkan tiktematiltiaj tlen melauak itech Biblia itech 240 uejueyij altepemej uan itech kanaj 750 tlatlamantli tlajtolmej. ¡Amo keman okachi omotematilti tlen melauak!

• Satepan ijkuak omikik Jesús, ¿tlen opanok ika tlamachtilmej tlen melauak tlen kisaj itech Biblia?

• ¿Ken omonextijkej tlamachtilmej tlen melauak itech iTlajtol toTajtsin Dios?

Itech miak xiuitl tiiTlaixpantijkauan Jehová otikintekitiltijkej, otikinchijchijkej uan otikinxexelojkej tlatlamantli Biblias. Maski ijkon, satepan otikitakej omonekiaya ma motlajtolkuepa se Biblia tlen kinpaleuiskia tlaltikpaktlakamej “ma kixmatikan katlej ya nele melauak”, non kijtosneki tlaltikpaktlakamej ma kimatikan itlanekilis toTajtsin Dios (1 Timoteo 2:3, 4). Ik non, itech xiuitl 1950 otikpejkej tiktlajtolkuepaj san seki iaxkayo Biblia ika inglés tlen amo okachi oui moajsikamatiskiaj, tlen itoka Traducción del Nuevo Mundo. Nin Biblia kuali yomotlajtolkuepki ijkon ken achto omoijkuilo itech kanaj 130 tlatlamantli tlajtolmej.

Omonekiaya se Biblia tlen amo oui moajsikamatiskiaj. Tlajtolmej mopapatlatiuij uan miakej Biblias kitekitiltiaj tlajtolmej tlen tlaltikpaktlakamej ayakmo kijtoaj, ik non, amo uelij kajsikamatij. Noijki omoajsikej tlajkuilolmej tlen yiuejkika omoijkuilojkej tlen okachi ajsitok kijtoaj tlen achto omoijkuilo itech Biblia. Ika ninmej tlajkuilolmej okachi moajsikamatij tlajtolmej tlen ika omoijkuilo Biblia ken hebreo, arameo uan griego.

Omonekiaya se Biblia tlen amo kipatlaskia iTlajtol toTajtsin Dios. Akinmej kitlajtolkuepaj Biblia moneki kijkuiloskej ijkon ken omoijkuilo achto itech Biblia, uan amo ma kipatlakan tlen toTajtsin Dios okinmili tlakamej ma kijkuilokan. Uan itech miakej Biblias itoka toTajtsin Dios akin okachi ueyititok, Jehová, amo nesi.

Omonekiaya se Biblia tlen kuali kijtoskia akin itlajtol (2 Samuel 23:2). Itech Traducción del Nuevo Mundo tokayotl Jehová oksepa omoijkuilo, itech tlajkuilolmej tlen yiuejkika omoijkuilojkej, tokayotl Jehová onesiaya kanaj 7,000 veces, ijkon ken tikitaj itech tlaixkopinal (Salmo 83:18). Akinmej okitlajtolkuepkej nin Biblia omomachtijkej uan omochijchikajkej miak, ik non, axkan tejuan techpaktia tiktlajtoltiskej nin Biblia pampa kuali kijtojtok tlen toTajtsin Dios kijtoa. Maski tikpia noso amo Traducción del Nuevo Mundo ika motlajtol, timitsyoleuaj xiktlajtolti mojmostla iTlajtol Jehová (Josué 1:8; Salmo 1:2, 3).

• ¿Tleka otikitakej omonekiaya se yankuik Biblia?

• Tla ikaj kineki kimatis tlen itlanekilis toTajtsin Dios, ¿tlen moneki kichiuas mojmostla?