Itech totlaneltokalis amo kintlaxtlauiaj tlayekankej. Ijkon ken ijkuak yikin opejki tlanechikol itech akinmej kichiuaj ken Cristo, axkan katej kuali tlayekankej pampa kimaluiskej inechikol toTajtsin Dios (Hechos 20:28). Ninmej tlakamej kipiaj chikauak intlaneltokilis, kiyekanaj uan kimaluiaj inechikol Jehová uan amo kichiuaj pampa ikaj ‘kinchiualtia ma kichiuakan non tekitl, nion amo kichiuaj pampa kinekij kitlaniskej tomin. Kimaluiaj ika pakilistli’ (1 Pedro 5:1-3). ¿Ken techpaleuiaj?

Techmaluiaj. Tlayekankej kiyekanaj uan kimaluiaj inechikol Jehová pampa chikauak ma yeto itlaneltokilis. Ken kuali kimatij toTajtsin Dios okinmakak nin tekitl tlen miak ipati, yejuan amo san tlanajnauatiaj, okachi kuali, techpaleuiaj pampa kuali ma tiyetokan uan ma tiyolpakikan (2 Corintios 1:24). Ijkon ken se tlajpixki kuali kinmaluia sejse ichkauan, tlayekankej kinekij kixmatiskej sejse tokniuan tlen katej itech inechikol toTajtsin Dios (Proverbios 27:23).

Techmachtiaj ken tikchiuaskej itlanekilis toTajtsin Dios. Nochi semanas, tlayekankej kiyekanaj nechikolmej tlen mochiuaj pampa chikauak ma yeto totlaneltokilis (Hechos 15:32). Ninmej tlakamej tlen tekitij miak noijki kiyekanaj tetlapouilistli, tetlapouiaj touan uan noijki techititiaj ken tlatlamantli uelis titetlapouiskej.

Techyolchikauaj sejse tejuan. Tlayekankej techpaleuiaj sejse tejuan pampa okachi kuali ma timouikakan iuan Jehová, uan noijki techtlajpaloaj tokalijtik noso motlapouiaj touan itech kali kanin timonechikoaj. Techpaleuiaj uan techyolchikauaj ika Biblia (Santiago 5:14, 15).

Yejuan amo san tekitij itech tlanechikol, noijki kixeloaj kauitl pampa kinmaluiskej uan kinmakaskej tlen okachi moneki ma kipiakan ikalchanejkauan. Moneki tikintlakaitaskej ninmej tokniuan tlen tekitij miak (1 Tesalonicenses 5:12, 13).

• ¿Tlen tekitl kichiuaj tlayekankej itech tlanechikol?

• ¿Ken kiteititiaj kinekij techpaleuiskej sejse tejuan?

Biblia kijtoa itech tlanechikol katej tlayekankej uan siervos ministeriales (Filipenses 1:1). Itech nochi tlanechikolmej katej ninmej tokniuan. ¿Tlen tekitl kichiuaj siervos ministeriales pampa techpaleuiskej?

Kinpaleuiaj tlayekankej. Siervos ministeriales kipiaj chikauak intlaneltokilis, kuali mokuayejyekoaj uan intech uelis timoyolchikauaskej, sekimej ok telpokamej uan oksekimej yiuejueyij. Yejuan kichiuaj tekitl tlen moneki nochipa ma mochiua itech tlanechikol uan noijki tlapaleuiaj itech kali kanin timonechikoaj uan maski nochipa kichiuaj, nin tekitl miak ipati. Ijkon tlayekankej okachi majxiliaj pampa tlamachtiskej uan kinmaluiskej tokniuan.

Kichiuaj tekitl tlen miak ipati. Sekimej siervos ministeriales kinseliaj akinmej yauij itech nechikol uan kinmiliaj kanin uelis motlaliskej. Oksekimej kitlaliaj sonido, kinxexeloaj amatlajkuilolmej, kijkuiloaj kenachi tomin motekitiltia uan noijki kinmiliaj tokniuan kanin uelis tetlapouiskej. Noijki tlapaleuiaj pampa kuali ma yeto kali kanin timonechikoaj uan noijki kinpaleuiaj tokniuan tlen yiuejueyij ijkon ken kinmiliaj tlayekankej. Maski san tlen tekitl kichiuaj, tekitij ika nochi inyolo, ik non, nochtin kintlakaitaj (1 Timoteo 3:13).

Ika inneskayo kiteititiaj kipiaj chikauak intlaneltokilis. Siervos ministeriales kinpejpenaj uan kinmakaj tekitl pampa kipiaj kuali inyelis. Ijkuak tlamachtiaj kichikauaj totlaneltokilis; pampa tetlapouiaj non kichiua ma titetlapouikan, uan pampa yejuan tlapaleuiaj non kichiua ma yeto yolpakilistli uan san sekan ma tiyetokan (Efesios 4:16). Satepan, noijki uelis tekitiskej ken tlayekankej.

• ¿Ken kipiaj iyelis siervos ministeriales?

• ¿Ken tlapaleuiaj siervos ministeriales pampa kuali ma yeto tlanechikol?

Escrituras Griegas Cristianas techtlapouiaj itech Bernabé uan tlatitlanil Pablo. Ninmej tlayekankej okintlajpaloayaj nechikolmej itech nonmej tonalmej. ¿Tleka ijkon okichiuayaj? Melauak okinekiayaj kinpaleuiskej inmikniuan pampa chikauak yetoskia intlaneltokilis. Pablo okijto okinekiaya oksepa kintlajpaloti ikniuan pampa kimatiskia ken okatkaj. Maski yaskia uejka, ye okinekiaya yas kinyolchikauati (Hechos 15:36). Axan itech ninmej tonalmej noijki ijkon kinekij kichiuaskej tlayekankej itech circuito.

Techyolchikauaj. Sejse tlayekanki itech circuito kintlajpaloa kanaj 20 tlanechikolmej, uan itech se xiuitl ojpa kintlajpaloa sejse tlanechikol uan ompa mokaua se semana. Melauak uelis techpaleuiskej ika inneskayo ninmej tokniuan iuan insiuauan, tla yomonamiktijkej. Yejuan mochijchikauaj pampa kinmixmatiskej telpokamej uan tlen okachi yiuejueyij, uan melauak kinekij kisaskej tetlapouitiuij touan uan kintlajpaloskej akinmej tejuan tikinmachtiaj. Ninmej tlayekankej itech circuito noijki yauij iuan tokniuan tlayekankej itech nechikol pampa kintlajpaloskej sekimej tokniuan; uan noijki techmachtiaj itech nechikolmej uan itech uejueyij nechikolmej pampa ijkon techyolchikauaskej (Hechos 15:35).

Motekipachoaj itech nochtin. Tlayekankej itech circuito melauak kinekij chikauak ma yeto intlaneltokilis tlanechikolmej. Monechikoaj iuan tlayekankej uan siervos ministeriales pampa kitaskej ken kajki nechikol uan pampa kinmiliskej tlen moneki kichiuaskej pampa okachi kuali kichiuaskej inteki. Kinpaleuiaj precursores pampa okachi kuali uan okachi miak ma tetlapouikan, uan melauak yolpakij kinmixmatiskej tlaltikpaktlakamej tlen yikin peuaj monechikoaj touan uan peua moskaltia intlaneltokilis. Sejse tokniuan tlayekankej itech circuito mochijchikauaj pampa techpaleuiskej (2 Corintios 8:23). Ma timochijchikauakan pampa ma tiktlasojtlakan toTajtsin Dios uan ma tikpiakan totlaneltokilis ijkon ken yejuan (Hebreos 13:17).

• ¿Tleka tlayekankej itech circuito kintlajpaloaj tlanechikolmej?

• ¿Ken timoyolchikauas ijkuak yejuan techtlajpaloaj itech tlanechikol?

Ijkuak mochiua se tlaxixinilistli, iTlaixpantijkauan Jehová san niman tikinpaleuiaj tokniuan tlen tlajyouiaj. Non kiteititia melauak tikintlasojtlaj tokniuan (Juan 13:34, 35; 1 Juan 3:17, 18). ¿Ken tikinpaleuiaj?

Tikinmakaj tlen moneki. Akinmej okichiuayaj ken Cristo itech Antioquía okintitlanilijkej tomin tokniuan tlen okatkaj itech Judea ijkuak otlapistik ompa (Hechos 11:27-30). Noijki ijkon, ijkuak tikmatij sekimej tokniuan sekan tlajyouijtokej miak, tiktemakaj tomin itech totlanechikol uan motitlani pampa tokniuan ma kipiakan tlen okachi moneki (2 Corintios 8:13-15).

Tikinpaleuiaj ika tekitl. Tlayekankej tlen katej kanin omochi se tlaxixinilistli kintemoaj uan kinpaleuiaj sejse tokniuan uan kitaj kuali ma yetokan. Uelis sekimej tokniuan tlayekankej kintlaliaj pampa ma kitakan nochtin ma kinmakakan tlakuali, atl pampa koniskej uan tlakentli, ma kinpajtikan uan noijki kanin mokalotiskej. Miakej iTlaixpantijkauan Jehová tlen kimatij ken tekitiskej, ika intomin yauij pampa kinpaleuiskej uan kinyektlaliskej inkaluan tokniuan noso kali kanin monechikoaj. Pampa tejuan nochipa san sekan titekitij uan yitikmatij ken uelis tikchiuaskej, ueli titekitij totoka ijkuak mochiua se tlaxixinilistli. Uan maski tikinpaleuiaj “tokniuan katlej tlaneltokaj inauak Cristo”, noijki ijkuak tiuelitij tikinpaleuiaj oksekimej tlaltikpaktlakamej, maski kipiaj okse intlaneltokalis (Gálatas 6:10).

Tikinyolseuiaj uan tikinyolchikauaj ika Biblia. Ijkuak sekimej tlajyouiaj miak, melauak moneki ma tikinyolseuikan. Ijkuak ijkon kinpanoa, Jehová, “toDios katlej nochipa techyolseuia”, kinyolchikaua (2 Corintios 1:3, 4). Ik non, ika miak pakilistli tikinmititiaj akinmej moyolkokoaj, tlen kijtoa Biblia panos satepan, pampa san iTekiuajkayo toTajtsin Dios kipojpolos nochi tlen axkan techyolkokoa uan techtlajyouiltia (Apocalipsis 21:4).

• ¿Tleka iTlaixpantijkauan Jehová tiuelitij totoka titekitij ijkuak mochiua se tlaxixinilistli?

• ¿Ken tikinyolseuiaj ika Biblia akinmej makisaj itech se tlaxixinilistli?

Ijkuak ayamo omikiaya Jesús omotlapoui san iuan naui itlatitlaniluan: Pedro, Santiago, Juan uan Andrés. Ijkuak Jesús okijto tlen panoskia itech itlamian tonalmej, okichi se tlajtlanilistli tlen miak ipati: “¿Akin tlakeuali yolmelajki uan ixtlamatki akin iteko okitlali ma tlayekana ipan nochi ikalijtik, pampa kitemakas tlakuali ijkuak moneki?” (Mateo 24:3, 45, NM; Marcos 13:3, 4). Ika ninmej tlajtolmej toteko Jesús okijto melauak kitlaliskia se nechikol pampa nochipa kinmakaskia tlakuali espiritual nochtin akinmej tlaneltokaskiaj itech ye itech itlamian tonalmej. ¿Akin “tlakeuali yolmelajki uan ixtlamatki”?

Ninmej tokniuan tlen kinpejpenaj ika espíritu santo amo miakej. “Tlakeuali” yejuan tokniuan Cuerpo Gobernante tlen kipiaj iTlaixpantijkauan Jehová. Uan kinmaka tlakuali espiritual ijkuak moneki inmikniuan tlen noijki kiueyichiuaj Jehová. San yejuan uelis techmakaskej tlakuali espiritual ijkuak moneki (Lucas 12:42).

Akin kimaluia nochi tlen iaxka toTajtsin Dios (1 Timoteo 3:15). Jesús okinmakak nin ueyi tekitl, ma kimaluikan tlen iaxka Jehová nikan Tlaltikpak, ma kimaluikan nochi tlen kipia, ma kiyekanakan tetlapouilistli uan ma techmachtikan itech tlanechikolmej. Ik non, pampa techmakas tlen moneki ijkuak moneki, “tlakeuali yolmelajki uan ixtlamatki” kixexeloa tlakuali espiritual ika amatlajkuilolmej tlen tiktekitiltiaj ijkuak titetlapouiaj uan ika tlamachtilmej tlen motemakaj itech tonechikoluan uan itech uejueyij nechikolmej.

“Tlakeuali”, yolmelajki pampa kitlakamati Biblia uan tetlapouia itech yankuik kuali tlajtolmej, uan ixtlamatki pampa kuali kitekitiltia tlen iaxka Cristo nikan itech Tlaltikpak (Hechos 10:42). Jehová kiteochijtok iteki pampa axkan okachi yimiakej iTlaixpantijkauan uan noijki onka sapanoa miak tlakuali espiritual (Isaías 60:22; 65:13).

• ¿Akin okitlali Jesús pampa ma kinmaka tlakuali espiritual imachtijkauan?

• ¿Tleka yolmelajki uan ixtlamatki nin “tlakeuali”?

Itech achto siglo tlatitlaniltin uan tlayekankej itech Jerusalén okinyekanayaj tokniuan, uan ijkuak omonekiaya mochiuas itlaj tlen miak ipati yejuan okijtoayaj tlen mochiuaskiaj uan nochtin oksekimej tlapejpenaltin ijkon okichiuayaj (Hechos 15:2). Uan pampa san se tlajtoli mokauaskia, kuali omomachtiayaj iTlajtol toTajtsin Dios uan omoyekanayaj ika iespíritu santo toTajtsin Dios (Hechos 15:25). Tokniuan tlen axkan tlayekanaj, tlen tiktokayotiaj Cuerpo Gobernante, noijki ijkon kichiuaj.

ToTajtsin Dios kitekitiltia pampa kichiuas itlanekilis. Tokniuan tlapejpenaltin tlen pouij itech Cuerpo Gobernante melauak motekipachoaj itech iTlajtol toTajtsin Dios, uan kimatij miak ken tlayekanaskej uan ken tlamachtiskej. Sejse semana monechikoaj pampa kitaskej tlen moneki kinmakaskej tokniuan itech nochi Tlaltikpak. Ijkon ken omochiuaya itech achto siglo, tlamachtiaj ika Biblia, ika amatlajkuilolmej, ika tokniuan tlayekankej itech circuito uan ika oksekimej tokniuan. Ik non, ialtepetl toTajtsin Dios san se tlamantli mokuayejyekoa uan kichiua (Hechos 16:4, 5). Noijki, techmakaj tlakuali espiritual, techyoleuaj pampa okachi ma tikpatioitakan tetlapouilistli itech Tekiuajkayotl uan kitaj akinmej uelis kiseliskej okachi tekitl itech ialtepetl toTajtsin Dios.

Moyekanaj ika iespíritu santo toTajtsin Dios. Cuerpo Gobernante kineki ma kiyekana akin Ueyi Tekiua itech nochi Tlaltikpak, Jehová, uan akin Kiyekana tlanechikol, Jesús (1 Corintios 11:3; Efesios 5:23). Yejuan kimatokej amo inmaxka ialtepetl toTajtsin Dios. Kichiuaj ijkon ken oksekimej tlapejpenaltin tlen kichiuaj ken Cristo, pampa “san kan yaui in Ichkatsin yejuan noijki ompa yauij” (Apocalipsis 14:4). Cuerpo Gobernante kitlasojkamati miak ijkuak timotlatlaujtiaj inpampa.

• ¿Akinmej otlayekanayaj itech achto siglo?

• ¿Ken kiteititia axkan Cuerpo Gobernante kineki ma kiyekana toTajtsin Dios?

Betel se tokayotl hebreo tlen kijtosneki “iKal toTajtsin Dios” (Génesis 28:17, 19). Nin tokayotl kuali kinnamiki kalmej kanin tekitij iTlaixpantijkauan Jehová itech nochi Tlaltikpak, kanin moyekana uan moita ken mochiua tetlapouilistli. Cuerpo Gobernante kajki Nueva York (Estados Unidos), uan ompa kiyekanaj nochi tekitl tlen mochiua itech oksekimej kalmej kanin tekitij iTlaixpantijkauan Jehová itech miakej oksekimej uejueyij altepemej. Nochtin tokniuan tlen ompa tekitij katej ken se ueyi kalchanejke tlen itoka Betel. Ijkon ken se kalchanejke nochtin yejuan san sekan tlakuaj, chantij, tekitij uan momachtiaj Biblia (Salmo 133:1).

Se kualtsin kali kanin nochtin tlen ompa chantij tekitij ika nochi inyolo. Itech sejse kali Betel katej tlakamej uan siuamej tlen kipiaj chikauak intlaneltokilis, tlen mochijchikauaj pampa mojmostla kichiuaskej itlanekilis toTajtsin Dios uan pampa kipaleuiskej Tekiuajkayotl (Mateo 6:33). Amo ikaj kitlaxtlauiaj, kipiaj kanin moseuiskej uan tlen kikuaskej, uan noijki kinmakaj tepitsin tomin pampa uelis kitekitiltiskej. Nochtin kipiaj inteki: sekimej itech oficinas, sekimej kanin tlakualchiuaj noso kanin tetlamakaj; oksekimej kanin kinchijchiuaj amatlajkuilolmej; sekimej tlachipauaj, sekimej tlapakaj, sekimej kiyektlaliaj kali pampa kuali ma yeto uan okseki tekitl kichiuaj.

Ompa mochiua miak tekitl pampa uelis okachi motetlapouis Tekiuajkayotl. Itech Betel tekitij pampa tlen okachi ipati: miakej tlaltikpaktlakamej ma kimatikan tlen kijtoa Biblia. Nin amatlajkuilol ijkon kiteititia. Cuerpo Gobernante otlayekanki pampa omoijkuilo, okintitlanilijkej itech Internet nochtin tokniuan tlen tlajtolkuepaj itech nochi Tlaltikpak, omochijchi ika prensas tlen totoka tekitij tlen onka itech miakej uejueyij altepemej uan omotitlanki itech kanaj 110,000 tlanechikolmej. Itech sejse tekitl tlen mochiua, nochtin akinmej tekitij itech Betel tlapaleuiaj pampa ma mochiua tekitl tlen okachi ipati: ma motetlapoui yankuik kuali tlajtolmej (Marcos 13:10).

• ¿Akinmej tekitij itech Betel, uan tlen kinmakaj ompa?

• Tekitl tlen mochiua Betel, ¿ken kipaleuia tekitl tlen okachi ipati?

Akinmej katej itech ueyi kalchanejke tlen itoka Betel kipiaj tlatlamantli tekitl tlen kipaleuia tetlapouilistli itech se noso miakej uejueyij altepemej; sekimej tlajtolkuepaj, sekimej kinchijchiuaj uan oksekimej kinnechikoaj amatlajkuilolmej, uan oksekimej kinchijchiuaj grabaciones de audio y video, uan okseki miak tekitl kichiuaj.

Nechikol tlen kiyekana tekitl tlen mochiua itech kali kanin tekitij iTlaixpantijkauan Jehová. Cuerpo Gobernante kintlalia eyi noso oksekimej tlayekankej tlen kimatij miak pampa ma kiyekanakan kali kanin tekitij iTlaixpantijkauan Jehová. Yejuan kimatiltiaj Cuerpo Gobernante nochi tekitl tlen mochijtok itech uejueyij altepemej tlen yejuan kiyekanaj uan tlen ouijkayotl uelis yetos, uan ijkon Cuerpo Gobernante uelis mokuayejyekos tlen kijtoskej amatlajkuilolmej tlen satepan motemakaskej, uan noijki tlen tlamachtil motemakas itech nechikolmej uan uejueyij nechikolmej. Sejse xiuitl Cuerpo Gobernante kintitlani inpatka sekimej tokniuan pampa ma kintlajpalokan tokniuan tlen tekitij itech kali kanin tekitij iTlaixpantijkauan Jehová uan noijki kinmiliaj tokniuan tlen tlayekanaj itech non kali tlen moneki kichiuaskej pampa kuali kichiuaskej inteki (Proverbios 11:14). Ijkuakon, mochiua se nechikol tlen miak ipati uan ompa tokni tlen uits inpatka Cuerpo Gobernante kitemaka se tlanojnotsalistli pampa kinyolchikauas nochtin akinmej chantij kanin tlayekana non kali.

Kinpaleuiaj nochtin tlanechikolmej. Itech kali kanin tekitij iTlaixpantijkauan Jehová sekimej tokniuan tlen kimatij miak kijtoaj tla mochiuaskej oksekimej tlanechikolmej. Noijki kitaj tekitl tlen kichiuaj precursores, misioneros uan tlayekankej itech circuito tlen ompa tekitij. Kichiuaj uejueyij nechikolmej, kitaj kanin uan ken mochiuaskej kalmej kanin monechikoaj iTlaixpantijkauan Jehová uan noijki kintitlaniliaj amatlajkuilolmej tlanechikolmej pampa kinpaleuiskej. Nochi tlen mochiua ompa tlapaleuia pampa okachi kuali ma titetlapouikan (1 Corintios 14:33, 40).

• Nechikol tlen kiyekana tekitl tlen mochiua itech kali kanin tekitij iTlaixpantijkauan Jehová, ¿ken kipaleuia Cuerpo Gobernante?

• ¿Tlen tekitl mochiua itech kali kanin tekitij iTlaixpantijkauan Jehová?

Pampa uelis kimatiskej “yankuik tlajtole” nochtin “tlaltikpaktlakaj, de nochtin paismej, de nochi tlatlamantin tlakajtin, de nochtin katlej tlapoaj tlatlamantle tlajtole, iuan de nochtin pueblojtin” tikinchijchiuaj amatlajkuilolmej ika kanaj 750 tlatlamantli tlajtolmej (Apocalipsis 14:6). ¿Ken mochiua non tekitl maski melauak oui? Miakej tokniuan itech nochi Tlaltikpak kijkuiloaj amatlajkuilolmej uan noijki katej tokniuan tlen kintlajtolkuepaj, nochtin yejuan noijki iTlaixpantijkauan Jehová.

Amatlajkuilolmej achto moijkuiloaj ika inglés. Cuerpo Gobernante kita tekitl tlen mochiua Kanin Moijkuiloaj amatlajkuilolmej, tlen kajki Estados Unidos. Yejuan kijtoaj tlen kijkuiloskej tokniuan tlen ompa tekitij uan noijki tlen kijkuiloskej tokniuan itech oksekimej kalmej kanin tekitij iTlaixpantijkauan Jehová. Pampa katej miakej tokniuan tlen uitsej itech miakej uejueyij altepemej, ik non, moijkuiloaj miak tlamachtilmej tlen tlajtoaj itech miak tlamantli, ik non, toamatlajkuiloluan kinpaktia tlaltikpaktlakamej itech miakej uejueyij altepemej.

Amatlajkuilolmej kintitlaniliaj akinmej tlajtolkuepaj. Ijkuak se amatlajkuilol yomoijkuilo uan yomoijto ma kisa, ika Internet kintitlaniliaj akinmej tlajtolkuepaj itech nochi Tlaltikpak, uan yejuan kitlajtolkuepaj, kitaj ken kisas uan kiyektlaliaj pampa kuali ma moita amatlajkuilol. Nochtin akinmej tlajtolkuepaj mochijchikauaj miak pampa kitlaliskej tlajtolmej tlen melauak, tlen kiteititis tlen kijtoa ika inglés (Eclesiastés 12:10).

Ika computadoras okachi totoka mochiua tekitl. Se computadora amo kinpatkayotia tokniuan tlen tlajkuiloaj noso tlen tlajtolkuepaj. Maski ijkon, okachi totoka mochiua tekitl ika computadoras uan amatlajkuilolmej tlen katej itech computadoras. ITlaixpantijkauan Jehová otikchijchijkej Sistema Electrónico de Edición Plurilingüe (MEPS, ken moijkuiloa ika inglés), non techpaleuia pampa tiktlaliskej itech computadora tlen yomotlajtolkuepki ika miakej tlatlamantli tlajtolmej, pampa tiktlaliliskej tlaixkopinalmej uan tikyektlaliskej pampa ma mochijchiuakan nonmej amatlajkuilolmej.

¿Tleka timochijchikauaj miak, maski kemantika amo miakej tlaltikpaktlakamej tlajtoaj nonmej tlajtolmej? Pampa Jehová “kineki nochtin in tlakaj ma momakixtikan iuan ma kixmatikan katlej ya nele melauak” (1 Timoteo 2:3, 4).

• ¿Tlen tekitl mochiua ijkuak moijkuiloaj toamatlajkuiloluan?

• ¿Tleka titlajtolkuepaj itech miakej tlatlamantli tlajtolmej?

Sejse xiuitl iTlaixpantijkauan Jehová tikinchijchiuaj uan tikinxexeloaj amatlajkuilolmej uan millones de biblias tlen amo monemakaj; tikinchijchiuaj uan tikinyektlaliaj kalmej kanin timonechikoaj uan titekitij iTlaixpantijkauan Jehová; tikinmakaj tlen kitekitiltiaj sapanoa miakej betelitas uan misioneros, uan tikintitlaniliaj tokniuan tlakuali uan okseki tlamantli kanin mochiua se tlaxixinilistli. ¿Kanin kisa tomin pampa motlaxtlauas nochi non?

Amo tiktlajtlanij tomin nion diezmos. Maski miak tomin moneki pampa titlamachtiskej, amo ikaj tiktlajtlaniliaj tomin. Yikipia kanaj 100 xiuitl, ojpa revista Akin Tetlapouijtok okijto melauak tikneltokaj Jehová techpaleuia. Satepan okijto: “Totlaneltokalis amo keman itlaj kipolos nion kinmilis tlaltikpaktlakamej ma kipaleuikan”. Uan ijkon mochijtok (Mateo 10:8).

Motlaxtlaua ika tomin tlen kitemakaj tlaltikpaktlakamej ika nochi inyolo. Miakej tlaltikpaktlakamej kipatioitaj tlamachtil tlen tiktemakaj ika Biblia uan techpaleuiaj pampa okachi ma mochiua nin tekitl ika tomin tlen yejuan kitemakaj. ITlaixpantijkauan Jehová tikxeloaj kauitl, tochikaualis uan tlen tikpiaj pampa tikchiuaskej ika pakilistli itlanekilis toTajtsin Dios itech nochi Tlaltikpak (1 Crónicas 29:9). Itech kalmej kanin monechikoaj iTlaixpantijkauan Jehová uan kanin mochiuaj uejueyij nechikolmej katej cajas kanin akin kinekis uelis kitlalis tomin. Noijki uelis kitemakaskej tomin ika nochi inyolo itech www.jw.org/ncx. Tomin tlen tikseliaj kitemakaj tlaltikpaktlakamej tlen amo kipiaj miak tomin, ijkon ken iknosiuatl tlen amo okipiaya tomin itech akin Jesús kualtsin otlajto pampa okitlali ome tomin itech cajas tlen okatkaj teokali (Lucas 21:1-4). Nochtin nochipa uelis tikxeloskej seki tomin pampa tiktemakaskej ‘tlen tikmachiliaj ipan toyolo’ (1 Corintios 16:2; 2 Corintios 9:7).

Melauak tikneltokaj Jehová kinyolinis akinmej kinekij kiueyichiuaskej ika intomin pampa ma kipaleuikan Tekiuajkayotl uan ijkon mochiuas itlanekilis (Proverbios 3:9).

• ¿Tleka totlaneltokalis amo ken oksekimej tlaneltokalismej?

• ¿Ken motekitiltia tomin tlen monechikoa?

Kanin tikueyichiuaj Jehová tiktokayotiaj Kali kanin Monechikoaj iTlaixpantijkauan Jehová. Ijkon tiktokayotiaj pampa tlen ompa timomachtiaj kisa itech Biblia uan tlajtoa itech iTekiuajkayo toTajtsin Dios, itech tlen otetlapoui Jesús (Lucas 8:1).

Itech ninmej kalmej tikueyichiuaj toTajtsin Dios ken moneki itech toaltepetl. Ompa moijtoa ken moneki titetlapouiskej itech toaltepetl (Mateo 24:14). Sekimej kalmej kanin timonechikoaj uejueyij uan oksekimej amo, uan tlatlamantli mochijchiuaj, amo okachi patiojkej; uan itech miakej kalmej monechikoaj ome noso okachi tlanechikolmej. Itech xiuitl tlen yopanokej yotikinchijchijkej sapanoa miakej kalmej kanin timonechikoaj (mochijchiuaj kanaj makuili itech se tonal) pampa mochijtokej oksekimej tlanechikolmej tlen moneki kipiaskej kanin monechikoskej. ¿Tlen otechpaleui ijkon ma tikchiuakan? (Mateo 19:26.)

Mochijchiuaj pampa onka tomin tlen motemakaj. Nochi tomin motitlani itech kali kanin tekitij iTlaixpantijkauan Jehová, uan nin kinmakaj tlanechikolmej tlen kinekij kichiuaskej se yankuik kali noso kinekij kiyektlaliskej.

Miakej tokniuan tlen kimatij kichiuaskej miak tlamantli kinchijchiuaj uan amo kintlaxtlauiaj. Itech miakej uejueyij altepemej katej Tokniuan tlen kinchijchiuaj kalmej kanin timonechikoaj. Nochtin tokniuan tlen ompa tekitij yetokej itech se tlanechikol uan satepan yauij itech okse tlanechikol itech ueyi altepetl kanin katej, maski moneki uejka yaskej, pampa kinpaleuiskej tokniuan tlen ompa chantij pampa kinchijchiuaskej Kali kanin monechikoskej. Itech oksekimej uejueyij altepemej ninmej tokniuan kitaj ken mochijchiuaj uan moyektlaliaj kalmej itech altepetl kanin yejuan katej. Maski miakej tokniuan tlen kimatij kinchijchiuaskej kalmej ika miak yolpakilistli tlapaleuiaj noijki miakej tokniuan tlapaleuiaj pampa kichijchiuaskej se Kali kanin Monechikoaj iTlaixpantijkauan Jehová satepan monechikoskej itech non kali. Iespíritu Jehová uan nochi tlen kichiuaj itekipanojkauan kichiuaj nochi nin (Salmo 127:1; Colosenses 3:23).

• ¿Tleka kanin tikueyichiuaj Jehová tiktokayotiaj Kali kanin Monechikoaj iTlaixpantijkauan Jehová?

• ¿Ken mochijchiuaj kalmej kanin timonechikoaj itech nochi Tlaltikpak?

Nochtin kalmej kanin timonechikoaj iTlaixpantijkauan Jehová kipiaj itoka toTajtsin Dios tlen melauak chipauak, ik non, nochtin timochijchikauaj pampa titlapaleuiskej pampa chipauak uan kuali ma yeto. Nin tekitl miak ipati, pampa ijkon noijki tikueyichiuaj Jehová.

Ma titlachipauakan ijkuak tlami tonechikol. Ijkuak tlami tonechikol nochtin akinmej tiauij ika miak pakilistli titlachipauaj; uan itech semana se tonal okachi titlachipauaj. Se tlayekanki noso se siervo ministerial kiyekana tekitl, uan kichiua tlen ijkuilitok itech se amatl: tlachpanaj, kinchipauaj uan kinyektlaliaj sillas; kinchipauaj baños; kinchipauaj ventanas uan teskatl; kitlamotlaj tlajsoli uan noijki tlachipauaj kaltempan. Itech se xiuitl se tonal okachi kuali titlachipauaj. Tla noijki konemej kinmakaj tekitl pampa ma tlapaleuikan, kitaskej ken moneki kitlakaitaskej kali kanin tikueyichiuaj Jehová (Eclesiastés 5:1).

Ma titlayejyektlalikan. Sejse xiuitl moita nochi kali kox moneki ma moyektlali noso tlen moneki pampa kuali ma yeto, uan ijkon satepan amo monekis okachi tomin pampa moyektlalis (2 Crónicas 24:13; 34:10). Tla kali kanin timonechikoaj chipauak uan kualtsin kajki, ijkon kuali yetos pampa ompa tikueyichiuaskej toTajtsin Dios. Tla titlapaleuiaj pampa kuali uan kualtsin ma yeto, ijkon tikteititiskej melauak tiktlasojtla Jehová uan tikpatioitaj kali kanin timonechikoaj (Salmo 122:1). Noijki nochtin tlaltikpaktlakamej kuali kitaskej kali kanin timonechikoaj (2 Corintios 6:3).

• ¿Tleka moneki nochipa kuali ma yeto kali kanin timonechikoaj?

• ¿Tlen tekitl mochiua pampa yetos chipauak kali kanin timonechikoaj?

¿Mitspaktiskia okachi tikmatis itech Biblia? ¿Mitspaktiskia okachi tikmatis itech se tlaxelol, itech ikaj, itech se altepetl noso itlaj tlen kijtoa Biblia opanok? ¿Kemantika yotimotlajtlani tla Biblia uelis mitspaleuis pampa tikyektlalis se ouijkayotl tlen tejuatsin tikpia? Tla tikijtoa kema, timitsyoleuaj xio itech kali kanin timonechikoaj uan xiktemo tlanankilistli itech amatlajkuilolmej tlen ompa tikpiaj.

Uelis tikajsiskej miakej amatlajkuilolmej tlen uelis techpaleuiskej. Uelis amo tikpia nochtin amatlajkuilolmej tlen yokinchijchijkej iTlaixpantijkauan Jehová ika motlajtol; maski ijkon, itech kali kanin timonechikoaj tikinpiaj miakej amatlajkuilolmej tlen yikin otikinchijchijkej. Uelis noijki tikajsis tlatlamantli Biblias, se diccionario noso oksekimej amatlajkuilolmej. Uelis ompa tiktlajtoltis se amatlajkuilol ijkuak ayamo peua tonechikol noso ijkuak tlamis. Tla onka se computadora, uelis kipia Watchtower Library tlen noijki kiualika miakej amatlajkuilolmej uan amo okachi oui tiktemos tlen tikneki tikmatis, uelis tiktlalis se tlajtoli noso se tlaxelol.

Melauak kinpaleuia akinmej panoaj itech Toteki akinmej tikchiuaj ken Cristo. Uelis tikintekitiltis amatlajkuilolmej tlen tikpiaj itech kali kanin timonechikoaj pampa timomachtis tlen tikijtos ijkuak titlanojnotsas. Tokni akin kiyekana Kaltlamachtil pampa tikchiuaskej iTeki toTajtsin Dios, ye iteki kiyektlalis nochtin amatlajkuilolmej uan kintlalis ompa tlen yikin kisaj. Ye noso akin mitsmachtia uelis mitsmachtiskej ken uelis tiktemos tlen tikneki tikmatis. San xikilnamiki, amo uelis tikinuikas amatlajkuilolmej mokalijtik, san uelis tikintlajtoltis itech kali kanin timonechikoaj, uan noijki moneki kuali tikintekitiltis uan amo tikintlapaluis.

Biblia kijtoa pampa okachi kuali tikmatis tlamachtil tlen toTajtsin Dios techmaka, moneki tiktemos ijkon ken tiktemoskia tomin (Proverbios 2:1-5). Itech kali kanin timonechikoaj katej miakej amatlajkuilolmej kanin uelis peuas timomachtis.

• ¿Tlen onka itech kali kanin timonechikoaj tlen mitspaleuis pampa timomachtis?

• ¿Akin uelis mitspaleuis pampa kuali timomachtis amatlajkuilolmej tlen katej itech kali kanin timonechikoaj?

Jesucristo okinmili imachtijkauan: “Ma tlaui namotlanex inmixpan nochtin in tlakaj, para ma kitakan tlan kuale ankichiuaj iuan ijkon ma kiueyikixtikan namoPapan Dios katlej kajki iluikak” (Mateo 5:16). Ik non, tiktekitiltiaj tlen okachi yankuik kisa ken Internet. Página oficial jw.org/ncx kijtoa tlen kineltokaj uan tlen kichiuaj iTlaixpantijkauan Jehová. ¿Tlen uelis tikajsis ompa?

Monankiliaj ika Biblia tlajtlanilmej tlen miakej motlajtlaniaj. Tikajsis itlanankilis tlajtlanilmej tlen miak ipati tlen nochtin tlaltikpaktlakamej motlajtlaniaj. Se neskayotl, amatsitsintin ¿Se tonal tlamis tlajyouilistli? uan ¿Uelis oksepa yoltoskej akinmej yomikej? katej ika kanaj 600 tlatlamantli tlajtolmej. Noijki tikajsis Traducción del Nuevo Mundo ika kanaj 130 tlatlamantli tlajtolmej; miakej amochtin tlen ika timomachtis Biblia, ken amochtli ¿Tlen melauak tlamachtia Biblia? uan revistas okachi yankuikej Akin Tetlapouijtok uan ¡Despertad! Miakej itech ninmej amatlajkuilolmej uelis tikintlajtoltis noso tikinkakis ompa itech Internet, noso tikinkixtis ika MP3, PDF noso EPUB. Tla ikaj kineki kimatis itech iTekiuajkayo toTajtsin Dios uelis tikinkixtis sekimej páginas ika itlajtol uan ijkon tikititis. Noijki onka miakej videos ika miakej tlatlamantli tlajtolmej de señas, noijki uelis tikixtis tlajtoltilistli tlen kisaj itech Biblia, tlamauisolmej uan kuajkualtsin tlakuikalmej tlen uelis tikakis ijkuak amo itlaj tikchiua.

Tikajsis tlen melauak itech iTlaixpantijkauan Jehová. Itech página oficial tlen tikpiaj uelis tikajsis videoclips uan tikmatis tlen tekitl tikchiuaj itech nochi Tlaltikpak, ouijkayotl tlen tikpiaj pampa tiiTlaixpantijkauan Jehová uan noijki ken tikinpaleuiaj oksekimej tlaltikpaktlakamej. Noijki ompa moijtoa keman mochiuaskej uejueyij nechikolmej uan noijki ken uelis titlanotsas noso titlajkuilos itech kali kanin tekitij iTlaixpantijkauan Jehová.

Ika nochi nin tikchiuaj ma momati tlen melauak ik kanin okachi uejka itech Tlaltikpak pampa nochtin tlaltikpaktlakamej ma kimatikan itech Jehová, noijki tlen katej itech ueyi altepetl Antártida. Timotlatlaujtiaj pampa ‘itlajtol Jehová totoka ma ajsi’ itech nochi Tlaltikpak uan ijkon nochtin ma kiueyichiuakan (2 Tesalonicenses 3:1).

• ¿Ken tlapaleuia jw.org/ncx pampa okachi tlaltikpaktlakamej ma kimatikan tlen melauak itech Biblia?

• ¿Tlen mitspaktiskia tiktemos itech nin página?