Miakej tlaltikpaktlakamej ayakmo yauij inteopan pampa tlayekankej amo kinnankiliaj tlajtlanilmej tlen okachi ipati nion amo kinyolseuiaj. Tla ijkon mitspanotok, ¿tleka moneki tias inechikoluan iTlaixpantijkauan Jehová? ¿Tlen tikajsis ompa?

Tiyolpakis pampa tiyetos iuan akinmej kinpaleuiaj oksekimej uan kintlasojtlaj. Itech achto siglo, akinmej okichiuayaj ken Cristo okipiayaj tlanechikolmej, uan ijkuak omonechikoayaj okiueyichiuayaj toTajtsin Dios, omomachtiayaj Biblia uan nochtin omoyolchikauayaj (Hebreos 10:24, 25). Ken omonechikoayaj iuan ikniuan tlen okiueyichiuayaj toTajtsin Dios, okimatiayaj okipiayaj melauak iyolikniuan pampa nochtin omotlasojtlayaj (2 Tesalonicenses 1:3; 3 Juan 14). Axkan, tejuan noijki ijkon tikchiuaj uan tiyolpakij.

Tikselis tlateochiualismej tla tikchiuas ijkon ken tlanauatia Biblia. Ijkon ken yiuejkika omonechikoayaj, axkan tlakamej, siuamej uan konemej noijki timonechikoaj pampa tikinkakiskej akinmej kuali tlamachtiaj, pampa uelis tikajsikamatiskej ken tikchiuaskej itech tonemilis tlen Biblia tlanauatia (Deuteronomio 31:12; Nehemías 8:8). Nochtin akinmej timonechikoaj uelis titlanankiliskej ijkuak akin panoa tlaixpan kijtoa ma titlanankilikan. Noijki uelis titlakuikaskej uan ijkon uelis tikteititiskej tlen tikchiaj tikseliskej akinmej tikchiuaj ken Cristo (Hebreos 10:23).

Motlaneltokilis itech toTajtsin Dios okachi chikauak yetos. Tlatitlanil Pablo okitlajkuilili se tlanechikol tlen okatka non tonal: ‘Nikneki namechitas [...] para ma timoyolchikauakan se iuan okse ika totlaneltokilis katlej tikpiaj’ (Romanos 1:11, 12). Tla nochipa timonechikos noso timouikas iuan tokniuan, okachi chikauak yetos motlaneltokilis uan tiktlakamatis itlanauatiluan Biblia.

¿Tleka amo timonechikoa touan uan moneuian tikita nochi tlen yotikijtojkej? Ika miak pakilistli timitsseliskej. Amo itlaj tiktlaxtlauas tla tias.

• ¿Ken akinmej tikchiuaj tonechikoluan?

• ¿Tlen tlateochiualismej tikseliaj pampa timonechikoaj iuan akinmej kichiuaj ken Cristo?

TiiTlaixpantijkauan Jehová nochipa timonechikoaj, maski kemantika moneki tiaskej uejka uan tona noso kiaui miak. Maski tikpiaj ouijkayotl noso tisotlauaj pampa titekitij, ¿tleka melauak timochijchikauaj tiiTlaixpantijkauan Jehová pampa timonechikoskej iuan tokniuan?

Techpaleuia kuali ma timomachilikan. Ijkuak tlatitlanil Pablo okijto miak ipati ma timonechikokan, ye okijkuilo: “Ma tiktemokan kenik uelis timopaleuiskej se iuan okse” (Hebreos 10:24). Nonmej tlajtolmej kijtosneki tinochtin kuali ma timoixmatikan. Ninmej tlajtolmej tlen Pablo okijto techyoleuaj ma timotekipachokan itech oksekimej. Ijkuak tikinmixmatij oksekimej tlen kichiuaj ken Cristo uan techiliaj ken okiyektlalijkej se ouijkayotl, non techyolchikaua pampa yitikmatij tlen uelis tikchiuaskej tla noijki ijkon techpanos.

Techpaleuia pampa tinochtin ma tiyetokan melauak tiyoliknimej. Akinmej inmiuan timonechikoaj amo san tikinmixmatij, yejuan melauak toyolikniuan. Kemantika noijki timosetiliaj inmiuan pampa timopakiltiskej ijkon ken toTajtsin Dios kineki. ¿Ken techpaleuia ma timosetilikan iuan oksekimej? Techpaleuia ma tikinpatioitakan tokniuan pampa kipiaj kuali inyelis uan non kichiua okachi ma timotlasojtlakan. Ik non, ijkuak tokniuan kipiaj se ouijkayotl ika miak pakilistli san niman tikinpaleuiaj pampa kuali timouikaj inmiuan (Proverbios 17:17). Ijkuak timonechikoaj inmiuan akinmej katej itech tlanechikol tikteititiaj timotekipachoaj itech nochtin yejuan (1 Corintios 12:25, 26).

Timitsyoleuaj xikintemo moyolikniuan tlen kichijtokej tlen kipaktia toTajtsin Dios. Kanin monechikoaj iTlaixpantijkauan Jehová tikinmajsis melauak moyolikniuan, amo xikaua itlaj ma mitstsakuili pampa timonechikos touan.

• ¿Tleka melauak techpaleuia ijkuak timonechikoaj iuan tokniuan itech nechikolmej?

• ¿Keman mitspaktiskia tikinmixmatis tokniuan itech totlanechikol?

Akinmej achto opejkej kichiuaj ken Cristo itech innechikoluan otlakuikayaj, omotlatlaujtiayaj, okitlajtoltiayaj uan omomachtiayaj Biblia (1 Corintios 14:26). Ijkuak timonechikos touan tikitas noijki ijkon tikchiuaj.

Tlen timomachtiaj kisa itech Biblia uan techpaleuia. Sábados noso domingos, tlanechikolmej monechikoaj pampa kikakiskej se Tlanojnotsal tlen kisa itech Biblia tlen uejkaua 30 minutos, tlen kinmititia ken kinpaleuia tlen kijtoa Biblia uan itech tlen tonalmej tikatej. Kinyoleuaj akinmej ompa tlakaktokej ma kitemokan uan ma kitlajtoltikan tlaxelolmej tlen kijtoa akin tlapojtok. Satepan, mochiua Tlamachtil ika revista Akin Tetlapouijtok, nin uejkaua se hora, uan ompa kinyoleuaj akinmej tlakaktokej ma tlanankilikan ika revista Akin Tetlapouijtok tlen ika timomachtiaj. Itech nin nechikol techititiaj ken uelis tikchiuaskej itech tonemilis tlen kijtoa iTlajtol toTajtsin Dios. Itech kanaj 110,000 tlanechikolmej tlen katej itech nochi Tlaltikpak, san se tlamantli timomachtiaj.

Techpaleuia pampa okachi kuali se tlamachtis. Noijki se yoak itech semana tikpiaj se nechikol tlen moxeloa ika eyi tlamachtilmej tlen itoka Toteki akinmej tikchiuaj ken Cristo tlen kisa itech amatlajkuilol Tlen tiktekitiltiskej itech nechikol tlen kisa sejse metstli. Achto tlamachtil itoka “Ken techpaleuia Biblia”, nin techpaleuia ma tikajsikamatikan seki tlaxelolmej itech Biblia tlen omotlajtolti itech non semana. Satepan, itech tlamachtil “Okachi kuali ma titlamachtikan”, mopanoltiaj seki neskayomej itech ken uelis tikintlapouiskej oksekimej itech Biblia. Se tokni techiluis tlen moneki tikchiuaskej pampa okachi kuali tiktlajtoltiskej se amatl uan titlajtoskej (1 Timoteo 4:13). Uan tlami ika tlamachtil “Tikchiuaj ken Cristo”, tlen techiluia ken uelis tikintlakamatiskej principios bíblicos itech nochi tonemilis. Noijki techchiuiliaj seki tlajtlanilmej uan titlanankiliaj, ijkon okachi tikajsikamatij Biblia.

Ijkuak tias itech tonechikoluan, mitspaktis pampa tikitas ken melauak kuali mitsmachtiskej ika Biblia (Isaías 54:13).

• ¿Tlen tikitas ijkuak tias itech nechikolmej tlen kipiaj iTlaixpantijkauan Jehová?

• ¿Itech katli achto nechikol tikneki tias?

¿Yotikitak itech nin amatlajkuilol ken iTlaixpantijkauan Jehová kuali timoyejyektlaliaj ijkuak tiauij tonechikoluan? ¿Tleka tikpatioitaj kuali timoyejyektlaliskej?

Pampa tiktlakaitaj toTajtsin Dios. Kuali tikmatij toTajtsin Dios kita toyolo uan amo ken timoitaj (1 Samuel 16:7). Maski ijkon, timonechikoaj pampa tikueyichiuaskej toTajtsin Dios, ik non, tiknekij tiktlakaitaskej ye uan noijki tokniuan. Tla monekiskia ma tiakan ixpan se juez, melauak kuali timoyejyektlaliskiaj pampa tikteititiskej tiktlakaitaj non juez. Noijki ijkon, kuali timoyejyektlaliaj ijkuak timonechikoaj pampa tiktlakaitaj toTajtsin Jehová akin “Juez itech nochi Tlaltikpak” uan kali kanin timonechikoaj (Génesis 18:25).

Pampa tikteititiaj techyekana Biblia. Biblia kinmilia akinmej kichiuaj ken Cristo ‘amo ma moueyinekikan ika intlaken, uan ma motlakentikan ken moneki’ (1 Timoteo 2:9, 10). ‘Amo ma moueyinekikan ika intlaken’, kijtosneki totlaken amo ma yeto tepontik noso tilintok. Noijki ‘ma timotlakentikan ken moneki’ kijtosneki kualtsin ma yeto totlaken, amo ma yeto sokio noso yotlajtlanki. Maski ijkon, ninmej tlanauatilmej techkauiliaj ma tikpejpenakan ken kuali timotlakentiskej. Tla kuali se motlakentis, non uelis kichiuas oksekimej “kinekiskej kineltokaskej in toTajtsin Dios toTemakixtij”, pampa amo san tikueyichiuaj toTajtsin Dios ika tlen tikijtoaj noijki tikueyichiuaj ika ken timotlakentiaj (Tito 2:10; 1 Pedro 2:12). Tla tejuan kuali timotlakentiaj ijkuak timonechikoaj, non kichiuas kuali ma kitakan ken tikueyichiuaj Jehová.

Pampa totlaken ma yeto kualtsin uan chipauak amo moneki ma yeto yankuik noso patio. Ik non, maski tejuatsin amo tikpia yankuik motlaken, ximonechiko itech kali kanin timonechikoaj.

• ¿Tleka miak ipati kuali ma timotlakentikan ijkuak tikueyichiuaj toTajtsin Dios?

• ¿Katli itlanauatiluan Biblia uelis techpaleuiskej ijkuak tikpejpenaskej ken timoyejyektlaliskej?

Tla tejuatsin timomachtia Biblia iuan se itlaixpantijka Jehová, uelis timochijchikaua pampa achto tiktlajtoltis tlen timomachtis. Pampa okachi tikajsikamatis itech nechikolmej moneki noijki ijkon tikchiuas. Okachi kuali timomachtis tla tiktlalis ken timomachtis uan nochipa ijkon tikchiuas.

Xiktlali tlen tonal uan kanin timomachtis. ¿Tlen hora okachi amo itlaj mitskuejsoa? ¿Kualkan achto tias titekititi, noso yoak ijkuak mokoneuan yokochkej? Maski amo okachi timajxilia, xikijto keski kauitl timomachtis uan amo xikaua itlaj ma mitstsakuili. Ximomachti kanin amo itlaj mitskuejsos, xikseui radio, televisión uan teléfono. Tla achto timotlatlaujtis, non mitspaleuis xikilkaua tlen mitstekipachoa uan kichiuas kuali ximokuayejyeko itech iTlajtol toTajtsin Dios (Filipenses 4:6, 7).

Xikintlapalui tlajtolmej tlen okachi moneki uan xitlanankili. Achto ximokuayejyeko tlen kijtoa tlen timomachtis. Xikita ken itoka tlamachtil, xikita ken sejse subtítulo kiteititia tlen kijtoa nochi tlamachtil, xikinmita tlaixkopinalmej uan xiktlajtolti nochi tlajtlanilmej tlen kiteititia tlen okachi moneki ma tikilnamikikan. Satepan, xiktlajtolti sejse párrafo uan xiktemo itlanankilis tlajtlanilistli tlen kiualika non párrafo. Xikintemo nochtin tlaxelolmej itech Biblia uan xikita ken noijki ompa omokixti tlen timomachtijtok (Hechos 17:11). Ijkuak tikajsis tlanankilistli, xikintlapalui tlajtolmej tlen okachi inpati tlen kichiuas xikilnamiki tlanankilistli. Tla ijkon tikchiuas, itech nechikol uelis tikajkokuis moma uan ijkon uelis titlanankilis tepitsin tlen otikajsikamatki.

Tla timomachtis sejse tlamachtil tlen timomachtiskej itech nechikol sejse semana, non kichiuas okachi xikmati itech Biblia (Mateo 13:51, 52).

• ¿Ken tikchiuas pampa achto timomachtis tlen timomachtiskej itech tonechikoluan?

• ¿Ken timomachtis pampa titlanankilis itech tonechikoluan?

Yiuejkika Jehová kineki tetajmej uan inkoneuan ma monechikokan pampa okachi kuali mouikaskej iuan Jehová uan pampa yejuan noijki kuali mouikaskej (Deuteronomio 6:6, 7). Ik non, iTlaixpantijkauan Jehová sejse semana kixeloaj se yoak pampa kiueyichiuaskej Jehová ken kalchanejke san sekan ken yejuan kinekiskej, momachtiaj itech Biblia tlen uelis kinpaleuis ma kichiuakan tlen moneki pampa kuali yetoskej. Noijki akinmej inseltij yetokej uelis kixeloskej se yoak pampa kiueyichiuaskej Jehová uan momachtiskej tlen yejuan kipejpenaskej.

Yoak ijkuak Kalchanejke Kiueyichiua Jehová kichiua ma motokikan itech Jehová. “Ximijkuanikan [ximotokikan] inauak Dios, iuan Yej mijkuanis [motokis] amonauak.” (Santiago 4:8.) Ijkuak timomachtiaj itech Biblia ken iyelis Jehová uan tlen kichiua, okachi kuali tikixmatij. Ijkuak nankiueyichiuaskej Jehová ken kalchanejke uelis nankitlajtoltiskej Biblia san sekan noso uelis nankitlajtoltiskej tlen timomachtiskej itech Toteki akinmej tikchiuaj ken Cristo. Sejse uelis kitlajtoltis tepitsin itech Biblia uan satepan nochtin uelis nankijtoskej tlen onanmomachtijkej itech Biblia.

Yoak ijkuak Kalchanejke Kiueyichiua Jehová kichiua okachi san sekan ma yetokan. Tlakatl uan isiua, tetajmej uan konemej okachi kuali mouikaskej tla san sekan momachtiaj Biblia. Yoak ijkuak Kalchanejke Kiueyichiua Jehová moneki yetos kualtsin uan ika yolseuilistli pampa ijkon nochtin kinekiskej momachtiskej sejse semana. Pampa tetajmej uelis kipejpenaskej tlen momachtiskej iuan ikalchanejke moneki ma kitakan keski xiuitl kipiaj inkoneuan uan ijkon uelis kitemoskej sekimej tlamachtilmej itech revista Akin Tetlapouijtok uan ¡Despertad! noso itech jw.org. Noijki uelis momachtiskej itech se ouijkayotl tlen kipiaj inkoneuan kanin momachtiaj uan tlen uelis kinpaleuis. Noijki uelis san sekan nankitaskej uan nanmomachtiskej JW Broadcasting (tv.jw.org). Noijki uelis momachtiskej tlakuikalmej tlen titlakuikaskej itech nechikolmej, uan noijki ijkuak tlamis momachtiskej uelis itlaj kikuaskej noso koniskej.

Tla kalchanejkej kiueyichiuaskej Jehová san sekan, non uelis kichiuas tetajmej uan konemej melauak ma kinpakti iTlajtol toTajtsin Dios, uan tla mochijchikauaj Jehová kinteochiuas miak (Salmo 1:1-3).

• ¿Tleka moneki ma tikpiakan Yoak ijkuak Kalchanejke Kiueyichiua Jehová?

• ¿Tlen uelis kichiuaskej tetajmej pampa nochtin kinpaktis tlen momachtiskej?

¿Tikita ken ninmej tlaltikpaktlakamej yolpakij miak? Yejuan katej itech se ueyi nechikol. Ijkon ken okichiuayaj yiuejkika itekipanojkauan Jehová, akin okinnauati eyijpa itech se xiuitl ma monechikokan, tejuan noijki tiyolpakij miak ijkuak timonechikoaj itech uejueyij nechikolmej (Deuteronomio 16:16). Itech se xiuitl tikpiaj eyi uejueyij nechikolmej: ome ueyi nechikol de circuito tlen uejkaua se tonal uan okse ueyi nechikol regional tlen uejkaua eyi tonal. ¿Ken techpaleuiaj ninmej nechikolmej?

Kichiuaj okachi kuali ma timouikakan iuan nochtin tokniuan. Israelitas oyolpakiayaj ijkuak okiueyichiuayaj Jehová “ijkuak miakej omonechikoayaj”, uan tejuan noijki tiyolpakij miak ijkuak tikueyichiuaj Jehová iuan tokniuan itech uejueyij nechikolmej (Salmo 26:12; 111:1). Itech nonmej uejueyij nechikolmej uelij timotlapouiaj uan tikinmixmatij tokniuan tlen katej itech oksekimej tlanechikolmej uan tlen uitsej itech oksekimej uejueyij altepemej. Ijkuak tlajkotonal, itech ueyi nechikol san sekan titlakuaj uan nin kichiua kualtsin ma timotlapouikan (Hechos 2:42). Ompa tikmachiliaj tlasojtlalistli tlen kipiaj “nochtin tokniuan” itech nochi Tlaltikpak (1 Pedro 2:17).

Kichiuaj ma yeto okachi chikauak totlaneltokilis. Israelitas okinpaleuiayaj ninmej nechikolmej pampa “okajsikamatiayaj tlajtolmej” tlen ijkuilitok itech iTlajtol toTajtsin Dios tlen okinmachtiayaj (Nehemías 8:8, 12). Tejuan noijki tikpatioitaj miak tlen techmachtiaj itech uejueyij nechikolmej. Sejse xiuitl techmachtiaj itech se tlamachtil tlen kisa itech Biblia. Ika kuajkualtsin tlanojnotsalmej uan tlamauisolmej techmachtiaj ken uelis tikchiuaskej tlen toTajtsin Dios kineki ma tikchiuakan. Noijki timoyolchikauaj ijkuak tikinkakij tokniuan kijtoaj tlen okinpaleui ijkuak okipixkej se ouijkayotl pampa kichiuaj ken Cristo. Itech uejueyij nechikolmej regionales tlen uejkauaj eyi tonal moitaj tlamauisolmej kanin tokniuan motlakentiaj ken yiuejkika omotlakentiayaj uan kiteititiaj tlen kijtoa Biblia opanok, ninmej tlamauisolmej techmachtiaj tlen uelis tikchiuaskej itech tonemilis. Uan itech nochtin uejueyij nechikolmej moapolaktiaj akinmej kinekij kitekichiuiliskej toTajtsin Dios.

• ¿Tleka melauak tiyolpakij ijkuak tiauij itech uejueyij nechikolmej?

• ¿Ken mitspaleuis tla tias itech uejueyij nechikolmej?

Ijkuak Jesús ayamo omikiaya okijto: “Iuan yin kuale tlajtole katlej temakixtia de kenik in Dios tlanauatia, motematiltis itech nochi in tlaltikpak, para ke nochtin in tlakaj de nochtin paismej ma kimatikan [uan satepan tlamis nochi tlen amo kuali]” (Mateo 24:14). ¿Ken mochiuaskia nin tekitl itech nochi Tlaltikpak? Ijkon ken Jesús okichi ijkuak okatka nikan Tlaltikpak (Lucas 8:1).

Tikintlapouiaj tlaltikpaktlakamej inkalijtik. Jesús okinmititi imachtijkauan ken tetlapouiskiaj kuali tlajtolmej inkalijtik tlaltikpaktlakamej (Mateo 10:11-13; Hechos 5:42; 20:20). Akinmej achto opejkej tetlapouiaj okinmilijkej itech tlen altepemej tetlapouiskiaj (Mateo 10:5, 6; 2 Corintios 10:13). Axkan noijki ijkon titetlapouiaj, nochi tlanechikolmej kipiaj kanin tetlapouiskej. Ijkon uelis tiktlakamatiskej tlen Jesús otechnauati ijkuak okijto kuali ma tikintlapouikan nochtin (Hechos 10:42).

Timochijchikauaj pampa tikintlapouiskej tlaltikpaktlakamej maski san kanin katej. Jesús noijki okitemakak se kuali neskayotl pampa otetlapoui san kanin okatkaj tlaltikpaktlakamej, ken itech itenpan ueyi atl noso itech se atekochtli (Marcos 4:1; Juan 4:5-15). Tejuan noijki tikintlapouiaj itech Biblia nochtin tlaltikpaktlakamej san kanin tikinmajsiskej: itech ojtli, kanin tlanemakaj, ika teléfono noso san kanin yetoskej. Noijki tikintlapouiaj akinmej chantij kanin tejuan tichantij, akinmej inmiuan titekitij, akinmej iuan timomachtiaj uan noijki tokalchanejkauan. Ik non, sapanoa miakej tlaltikpaktlakamej uelij kikakij ‘yankuik kuali tlajtolmej tlen temakixtia’ (Salmo 96:2).

Ximokuayejyeko akin tikneki tiktlapouis itech yankuik kuali tlajtolmej itech iTekiuajkayo toTajtsin Dios uan tlen tlateochiualismej uelis kiselis. Amo san tejuatsin xikmato nonmej kuali tlajtolmej. San niman xiktematilti.

• ¿Tlen “kuali tlajtolmej” moneki ma motematilti?

• ¿Tlen kichiuaj iTlaixpantijkauan Jehová pampa tetlapouiskej ijkon ken otetlapoui Jesús?

Tlajtoli precursor kijtosneki ikaj akin kitlapojti se ojtli kanin amo ikaj panoa uan akinmej ikuitlapan uitsej ompa panoaj. Uelis tikijtoskej Jesús noijki okatka se precursor, pampa okiualtitlankej nikan Tlaltikpak pampa ma kichiua se tekitl tlen miak ipati uan ijkon okitlapo se ojtli tlen kinmakixtiskia miakej (Mateo 20:28). Axkan, noijki ijkon tikchiuaj uan timochijchikauaj pampa titetlapouiskej uan titemachtiskej (Mateo 28:19, 20). Ik non, sekimej peuaj tekitij ken precursores.

Se precursor tetlapouia mojmostla. Nochtin iTlaixpantijkauan Jehová titetlapouiaj itech yankuik kuali tlajtolmej. Maski ijkon, sekimej mochijchikauaj pampa tekitiskej ken precursores regulares uan sejse metstli tetlapouiskej 70 horas. Ik non, miakej tekitij san sekimej tonalmej. Oksekimej kintitlanij ken precursores especiales kanin okachi moneki ikaj ma tetlapoui; yejuan tetlapouiaj sejse metstli 130 horas noso okachi. Precursores amo kimotemoliaj miak tlamantli kipiaskej uan kineltokaj Jehová kinmakas tlen okachi moneki (Mateo 6:31-33; 1 Timoteo 6:6-8). Akinmej amo uelis tekitiskej ken precursores regulares noso especiales uelis tekitiskej ken precursores auxiliares, tlen tetlapouiaj 30 noso 50 horas sejse metstli.

Precursor tetlapouia pampa kitlasojtla Jehová uan tlaltikpaktlakamej. Ijkon ken Jesús, tikitaj ken melauak moneki tlaltikpaktlakamej ma kimatikan itech toTajtsin Dios (Marcos 6:34). Uan tlen tejuan tikinmachtiskej uelis kinpaleuis axkan uan noijki satepan uelis kipiaskej tlateochiualismej. Tlasojtlalistli kiyolinia precursor ma tetlapoui uan ijkon uelis kinpaleuis tlaltikpaktlakamej ma kixmatikan yankuik kuali tlajtolmej (Mateo 22:31; 1 Tesalonicenses 2:8). Ijkon, okachi chikauak mochiua intlaneltokilis uan okachi kuali mouika iuan toTajtsin Dios, uan ijkon kiyolpaktiaj (Hechos 20:35).

• ¿Tlen tekitl kichiua se precursor?

• ¿Tlen kinyolinia sekimej nochipa ma tetlapouikan?

¿ITlaixpantijkauan Jehová moixmatij pampa kinmachtia oksekimej. Uan pampa tokniuan akinmej mochijchikauaj pampa tetlapouiskej itech Tekiuajkayotl (2 Timoteo 4:5).

Tlamachtil tlen kiselia precursor. Ijkuak ikaj kajxitia se xiuitl tekititok ken precursor, kijkuiloaj itech Tlamachtil pampa precursores tlen uejkaua chikuase tonalmej uan tlen mochiua itech se Kali kanin timonechikoaj. Ompa kinpaleuiaj precursores pampa okachi ma motokikan itech Jehová uan ma yolpakikan itech tetlapouilistli uan ok ma kichiuakan iteki.

Tlamachtil pampa ma tetlapouikan Tekiuajkayotl. Nin tlamachtil tlen uejkaua ome metstli mochiua pampa kinmachtiskej precursores akinmej yiuejkika tetlapouiaj uan tlen kinekij kisaskej pampa yaskej oksekimej altepemej pampa tetlapouiskej kanin okachi moneki. Yejuan kijtoaj: “¡Nikan nika ne! Xinechtitlani ne”. Ijkon ken akin okachi kuali tetlapouia tlen okatka itech Tlaltikpak Jesucristo (Isaías 6:8; Juan 7:29). Ijkuak kisaj itech inkalijtik uan yauij okse altepetl oui pampa moneki momatiskej uan amo kipiaskej miak tlamantli. Pampa oksekimej tlaltikpaktlakamej, okse intlakual, noso uelis seua noso tlatotonia uan ompa moneki momatiskej. Uan noijki ualeua moneki momachtiskej okse tlajtoli. Ompa kinmachtiaj tokniuan tlakamej, siuamej uan noijki akinmej yomonamiktijkej tlen kipiaj 23 a 65 xiuitl, pampa uelis kuali tetlapouiskej uan ijkon kipaleuiskej Jehová uan ialtepe.

Tlamachtil ika Biblia tlen kichiua Watchtower itech Galaad. Ika tlajtoli Hebreo “Galaad” kijtosneki “Temej tlen itlaj kitematiltiaj”. Galaad opejki itech xiuitl 1943, uan kanaj 8,000 tokniuan tlen ompa yomomachtijkej yokintitlankej pampa ma tetlapouikan “itech nochi in tlaltikpak” (Hechos 13:47). Ijkuak achto misioneros oajsitoj Perú, amo okatka nion se tlanechikol; uan axkan katej kanaj 1,000 tlanechikolmej. Ijkuak oajsitoj Japón, okatkaj kanaj majtlaktli iTlaixpantijkauan Jehová; uan axkan katej kanaj 200,000. Itech Galaad kuali momachtiaj Biblia itech makuili metstli. Kinyoleuaj ma momachtikan akinmej tekititokej ken precursores especiales, misioneros tlen ayamo yauij, akinmej tekitij itech kali Betel noso akinmej tekitij ken tlayekankej itech circuito, pampa ijkon uelis kuali momachtiskej uan okachi tlapaleuiskej itech tekitl tlen mochiua itech nochi Tlaltikpak.

• ¿Tleka kichiuaj Tlamachtil tlen kiselia precursor?

• ¿Akinmej uelis momachtiskej itech Tlamachtil pampa ma tetlapouikan Tekiuajkayotl?