Tikmatiskej tlen otlatitoka techyolpaktia

¿Ikaj yomitsilui itlaj tlen amo moneki tikijtos?...a Biblia techtlapouia itlaj tlen toTajtsin Dios okitlati “tlen miak ipati”. Uan moijtoa tlatitok pampa miakej tlaltikpaktlakamej amo kixmatij. Noijki miakej ángeles okinekiayaj kimatiskej tlen otlatitoka. ¿Mitspaktiskia tikmatis tlen otlatitoka?...

Yiuejkika toTajtsin Dios okichijchi achto tlakatl uan achto siuatl. Omotokayotiayaj Adán uan Eva. ToTajtsin Dios okinmakak se kualtsin kali tlen omotokayotiaya xochitlali Edén. Tla Adán uan Eva kitlakamatiskiaj toTajtsin Dios, yejuan uan ikoneuan uelis kikuepaskiaj nochi Tlaltikpak itech se kualtsin xochitlali ijkon ken Edén. Uan ijkon uelis yoltoskiaj nochipa itech kualtsin Xochitlali. Maski ijkon, ¿tikilnamiki tlen okichijkej Adán uan Eva?...

Ken Adán uan Eva amo okitlakamatkej toTajtsin Dios, axkan tejuan amo tikatej itech se xochitlali. Maski ijkon, toTajtsin Dios okijto kichiuas kualtsin ma moita nochi Tlaltikpak, uan ijkon nochtin uelis tiyoltoskej nochipa uan tiyolpakiskej. ¿Ken kichiuas? Yiuejkika tlaltikpaktlakamej amo okimatiaya nin. Ik non, moijtoa otlatitoka.

Ijkuak Jesús okatka itech Tlaltikpak, ye okinmachti miakej tlaltikpaktlakamej itech tlen otlatitoka. Ye okintlapoui itech iTekiuajkayo toTajtsin Dios. Noijki okinmilui ma motlatlaujtikan pampa ma uiki non Tekiuajkayotl. Nin Tekiuajkayotl kikuepas nochi Tlaltikpak se kualtsin xochitlali.

¿Mitspaktia timomachtis tlen otlatitoka?... Xikilnamiki, san akinmej kitlakamatiskej toTajtsin Dios uelis yoltoskej itech Xochitlali. Biblia techtlapouia itech miakej tlakamej uan siuamej akinmej okitlakamatkej Jehová. ¿Mitspaktiskia tikmatis okachi itech yejuan?... Xikita akinmej okatkaj uan ken uelis tikchiuaskej ken yejuan.