¿Kanin kisa tomin tlen ika tekitij?

Sejse xiuitl tikinchijchiuaj uan tikinxexeloaj miakej amatlajkuilolmej, amochmej uan Biblias ika miakej tlatlamantli tlajtolmej. Tikinchijchiuaj kalmej kanin tekitij iTlaixpantijkauan Jehová itech nochi Tlaltikpak. Tikatej itech sapanoa miakej tlanechikolmej, uan timonechikoaj itech kalmej tlen kualtsitsintin tlen tikintokayotiaj Kali kanin Monechikoaj iTlaixpantijkauan Jehová. ¿Kanin kisa tomin pampa mochiuas nochi nin tekitl?

Nochi toteki mochiua ika tomin tlen tlaltikpaktlakamej kitemakaj ika nochi inyolo (2 Corintios 9:7). Itech xiuitl 1879, revista ome tlen okiski tlen ijkuakon omotokayotiaya Zion’s Watch Tower okijto: “[Nin revista], tejuan tikneltokaj, kipaleuia JEHOVÁ, uan tla ijkon, amo keman motlajtlanis tomin pampa ma kipaleuikan”. Uan axkan noijki ijkon tikneltokaj.

Tomin tlen kitemakaj tlaltikpaktlakamej uelis kititlaniskej kanin titekitij iTlaixpantijkauan Jehová noso uelis kitlaliskej itech cajas tlen onka itech kalmej kanin monechikoaj iTlaixpantijkauan Jehová. Amo tiktlajtlanij diezmo nion tikchiuaj colectas, noijki amo tikinmiluiaj ma techtlaxtlauikan ijkuak tikchiuaj se nechikol nion ijkuak tikinmakaj amatlajkuilolmej. Noijki ijkuak titetlapouiaj, tikinmachtiaj oksekimej uan tikinchijchiuaj kalmej amo techtlaxtlauiaj. Pampa Jesús okijto: “Amo onantlaxtlajkej ijkuak onankiselijkej, noijki san ijko xiktemakakan” (Mateo 10:8, TNM). Noijki amo kintlaxtlauia akinmej tekitij itech kali kanin moyekana tekitl uan nion akinmej pouij itech Cuerpo Gobernante tlen kipiaj iTlaixpantijkauan Jehová.

Tomin tlen kitemakaj tlaltikpaktlakamej ika nochi inyolo noijki motekitiltia pampa tikinpaleuiskej oksekimej ijkuak kanaj tlaxixinia. Itech achto siglo tokniuan ika miak pakilistli okinpaleuiayaj akinmej otlajyouijtokaj (Romanos 15:26). Axkan noijki tikinpaleuiaj oksekimej ijkuak kipoloaj inkalijtik, tikinmakaj tlakuali, intlaken uan tikinpajtiaj. Noijki tikinyektlaliaj kalmej kanin timonechikoaj.