¿Akin kiyekana nin Tekiuajkayotl?

• ToTajtsin Dios kipejpenaskia akin tlanauatis. “Ne yoniktlali notekiua [...]. Nimitsinmakas altepemej uan nimitsmakas nochi tlaltikpak” (Salmo 2:6, 8).

• Nin tekiua yetoskia ixui David. “Se konetl oneski, se konetl otechmakakej [...]. Moskaltis itekiuajkayo uan yolseuilistli amo keman tlamis, itech itrono David uan itech itekiuajkayo kuali kitlalis” (Isaías 9:6, 7).

• Nesiskia ompa Belén. Herodes “okintlajtlani kani tlakatis n Cristo. Iwa yejwah okilijkeh: —Tlakatis itech altepetl de Belén, non kajki kan tlali de Judea” (Mateo 2:4, 5).

• Kixtopeuaskiaj uan kimiktiskiaj. “Okixtopejkej uan otikitakej ken amitlaj ipati [...], okitlajyouiltijkej porque titlajtlakolchiuaj; okitlajyouiltijkej porque tikchiuaj tlen amo kuali” (Isaías 53:3, 5).

• Kiyolitiskiaj uan ueyititoskia. “Amo techkauas itech mikakoyoktli. Akin yolmelajki amo tikkauas ijtik tekochtli. [...] Nochipa niyolpaki niyetos moyekma” (Salmo 16:10, 11).

Jesús kuali tlanauatis

San Jesús okipanok nochi nin tlamantli uan ye akin okachi moixmati. Noijki se ángel okilui María: “Dios Toteko kitlalis mayeto Rey ijkó kemi otlanawati David iwejkatata. [...] Itlanawatil [amo] ayik pojpoliwis” (Lucas 1:31-33).

Jesús amo keman okatka tekiua ijkuak okatka nikan tlaltikpak. Pero ye ualtlanauatis iluikak uan kiyekanas iTekiuajkayo toTajtsin Dios. ¿Tlen kiteititia Jesús kuali tlanauatis? Ma tikitakan tlen okichi ijkuak okatka nikan tlaltikpak.

• Jesús okitekipachouaya tlen okinpanouaya oksekimej. Okinpaleui tlakamej, siuamej, telpokamej uan ichpokamej uan akinmej yokipiayaj miak xiuitl. Ye amo keman okitak kox oualayaj itech okse altepetl noso kox okipiayaj tomin (Mateo 9:36; Marcos 10:16). Ijkuak se tlakatl tlen okipiaya lepra okilui Jesús “tla tikmonekiltia weletis techchipawas de nokokolis”, ye okiknomatki uan okipajti (Marcos 1:40-42).

• Jesús otechititi ken tikyolpaktiskej toTajtsin Dios. Ye okijto: “Amaka weletis kimopantis Dios tla satlawel momijmiktia para kitlawelpias tomi”. Noijki okijto ma tikchiuakan tlen tiknekij ma techchiuilikan oksekimej. Okijto toTajtsin Dios kitekipachoua tlen tikchiuaj, tlen timokuayejyekouaj uan tlen tikmachiliaj. Ik non, ma tikmaluikan toyolo tla tiknekij tikyolpaktiskej toTajtsin Dios (Mateo 5:28; 6:24; 7:12). Noijki okijto tla tiknekij tiyolpakiskej, ma tikmatikan uan ma tikchiuakan tlen kineki toTajtsin Dios (Lucas 11:28).

• Jesús otechititi tlen kijtosneki ma titetlasojtlakan. Tlen Jesús okijto uan okichi oajsik itech inyolo oksekimej. Biblia kijtoua: “Omotlajtlachialtijkeh kenomi okinmachtiaya. Porke itlajtol n Jesús otlanawatiaya de milajka” (Mateo 7:28, 29). Okinmilui: “Xikintlasojtlakah akimeh nomechkokoliah”. Ye omotlatlaujti inpatka akinmej okitlajyouiltijkej ijkuak okijto: “Notajtsi, xikintlapojpolwi, porke [amo] kimatih tlan kichiwah” (Mateo 5:44; Lucas 23:34).

Jesús kuali tlanauatis porque ye kimati ken kichiuas, techtlasojtla uan kineki techpaleuis. Pero ¿keman peuas technauatis?