¿Uelis tikachiuaskej guerras uan ayakmo ikaj mamokualani?
Miakej mochijchikauaj porque kinekij kipatlaskej seki tlamantli. Kinekij kinpatlaskej tekiuajkej, kinekij okachi makintlaxtlauikan uan makintlakaitakan. Oksekimej kinekij kinmoaxkatiskej tlalmej uan tlen onka tlaltikpak. Sekimej mokualaniaj porque amo kinpaktia tlen kichiuaj religiones uan oksekimej mokualaniaj porque tlatlamantli motaj. ¿Tlen kinekij kichiuaskej sekimej para ayakmo ikaj mamokualani? ¿Uelis tikneltokaskej ijkon kichiuaskej?
Drazen_/E+ via Getty Images
TEKIUAJKEJ KIJTOUAJ OKACHI TETLAXTLAUISKEJ
¿Tlen kinekij kichiuaskej? Tekiuajkej kinekij okachi kuali machantikan oksekimej. Ijkon ayakmo ikaj mokualanis, nochtin kipiaskej tomin uan ayakmo mochikoitaskej.
¿Tleka amo ueli ijkon kichiuaj? Tekiuajkej moneki okachi kitaskej ken kinejnekij tomin. 2022 okinejnekej kanaj treinta y cuatro mil cien millones de dólares para kuali mayetokan oksekimej uan mamoyolseuikan. Pero okachi miak tomin okinejnekej para soldados.
Se tlakatl tlen itoka António Guterres uan secretario general itech Naciones Unidas, okijto: “Okachi miak tomin okitlamijkej ijkuak omokualanijkej uan amo ijkuak okinpaleuijkej oksekimej mamoyekuikakan”.
¿Tlen kijtoua Biblia? Tekiuajkej uan oksekimej uelis kinpaleuiskej akinmej amitlaj kipiaj pero amo uelis kichiuaskej ayakmo ijkon mapano (Deuteronomio 15:11; Mateo 26:11).
TEKIUAJKEJ KICHIUAJ ACUERDOS
¿Tlen kinekij kichiuaskej? Tekiuajkej moyektlapouiaj para moyekuikaskej uan ijkon kuali yetoskej.
¿Tleka amo ueli ijkon kichiuaj? Sekimej tekiuajkej amo kinekiskej kichiuaskej tlen kijtouaj ikinon satepan ayakmo moyekuikaskej. Kichiuaj se acuerdo para moyekuikaskej pero amo kichiuaj tlen kijtouaj.
Se tlakatl tlen itoka Raymond Smith tlen tlapaleuia American Diplomacy, okijto: “Acuerdo tlen kichiuaj tekiuajkej amo nochipa tlapaleuia. Amo okachi tlapaleuia acuerdo tlen kichiuaj altepemej porque satepan san okachi mokualaniaj”.
¿Tlen kijtoua Biblia? Biblia kijtoua tinochtin matiktemokan “yolseuilistli” (Salmo 34:14). Pero miakej ‘ayakmo mouikaj inuan oksekimej’, ‘tekajkayauaj’ uan ‘amo teajsikamatij’ (2 Timoteo 3:1-4). Ikinon sekimej okachi mokualaniaj maski tekiuajkej kinekij tlapaleuiskej.
TEKIUAJKEJ KIJTOUAJ AYAKMO KINPIASKEJ MIAKEJ TEPOSMEJ
¿Tlen kinekij kichiuaskej? Tekiuajkej kijtouaj ayakmo kinpiaskej teposmej tlen ika miakej kinmiktiaj.
¿Tleka amo ueli ijkon kichiuaj? Porque momojtiaj amo uelis mopaleuiskej ijkuak ikaj inuan momakas uan ijkon kipoloskej. Pero maski ayakmo kinpiaskej teposmej amo kinpaleuis ayakmo ikaj mamokualani.
Asegurar nuestro futuro común: una agenda para el desarme, okijto: “Miakej tekiuajkej okijtojkej ayakmo kinpiaskiaj teposmej itech 1991 ik tlayekapan pero amo okichijkej tlen okijtojkej. Ijkon okijtojkej kichiuaskiaj porque okinekiayaj nochtin kuali mayetokan uan kuali mamouikakan”.
¿Tlen kijtoua Biblia? Ayakmo makinnejnekikan teposmej uan san makinnejnekikan para “ika tlameuaskej” (Isaías 2:4). Pero non amo tlapaleuia ayakmo ikaj mamokualani porque inyolipan kisa mokualaniskej (Mateo 15:19).
TEKIUAJKEJ KICHIUAJ ACUERDO PARA AMO MAYETO GUERRA
¿Tlen kinekij kichiuaskej? Tekiuajkej kijtouaj mopaleuiskej ijkuak ikaj kinekis inuan momakas. Kijtouaj amo uelis ikaj inuan momakas porque nochtin mosepanpaleuiskej.
¿Tleka amo ueli ijkon kichiuaj? Kijtouaj kuali yetoskej tla kinmomojtiskej oksekimej tekiuajkej. Pero amo kichiuaj tlen kijtouaj nion amo kimatij tlen kichiuaskej ijkuak ikaj kinekis inuan momakas.
Encyclopedia Britannica, okijto: “Sociedad de Naciones uan Naciones Unidas san sekan otekipanojkej para kinpaleuiskej tekiuajkej kuali mamouikakan pero non amo otlapaleui ayakmo mayeto guerra”.
¿Tlen kijtoua Biblia? Ualeua tlapaleuia ijkuak tekiuajkej mosepanpaleuiaj. Pero amo uelis nochtin kinpaleuiskej kuali mayetokan (Eclesiastés 4:12). “Amo xikinneltokilikan akinmej tlanauatiaj nion okse tlakatl porque yejuan amo uelis temakixtiskej. Ijkuak ikaj ixpoliui oksepa mokopa tlali, itech non tonal melauak poliui nochi tlen mokuayejyekoua” (Salmo 146:3, 4).
Miakej tlajyouiaj ijkuak onka se guerra maski oksekimej mochijchikauaskej kinpaleuiskej nochtin kuali mayetokan.