15 Impendulo epholileyo iyalwehlisa ulaka,+
Kodwa amazwi ahlabayo avusa ulaka.+
2 Ulimi lwabahlakaniphileyo lusebenzisa kuhle ulwazi,+
Kodwa emlonyeni wezithutha kuphuma ubuphukuphuku.
3 Amehlo kaJehova akuyo yonke indawo,
Akhangele abenza okubi labenza okuhle.+
4 Amazwi apholileyo ayisihlahla sokuphila,+
Kodwa inkulumo etshekileyo yephula umoya.
5 Isiphukuphuku siyadelela nxa uyise esilaya,+
Kodwa umuntu okhaliphileyo uyavuma ukuqondiswa.+
6 Endlini yomuntu olungileyo kulamagugu amanengi,
Kodwa isivuno somuntu owenza okubi simlethela uhlupho.+
7 Izindebe zabahlakaniphileyo zisabalalisa ulwazi,+
Kodwa inhliziyo yesithutha+ kayikwenzi lokho.
8 UJehova uyawenyanya umhlatshelo+ wabenza okubi,
Kodwa uthokoziswa ngumthandazo wabathembekileyo.+
9 UJehova uyayenyanya indlela yomuntu owenza okubi,+
Kodwa uthanda lowo ohlala esenza okulungileyo.+
10 Ophambuka endleleni eyiyo uyakuzonda ukulaywa,+
Loba ngubani ozonda ukukhuzwa uzakufa.+
11 UJehova uyenelisa ukubona okusengcwabeni,+ indawo lapho izidumbu ezitshabalala khona.
Pho angehluleka yini ukubona okusezinhliziyweni zabantu?+
12 Umuntu odelelayo kamthandi lowo omqondisayo.+
Kazihluphi langokubuza kwabahlakaniphileyo.+
13 Inhliziyo ethokozayo yenza ubuso buchelese,
Kodwa inhliziyo ebuhlungu yenza umuntu ahlulukelwe.+
14 Inhliziyo ezwisisayo idinga ulwazi,+
Kodwa umlomo wezithutha ukholisa ubuphukuphuku.+
15 Zonke insuku zomuntu okhathazekileyo zimbi,+
Kodwa olenhliziyo echelesileyo uhlala esedilini kokuphela.+
16 Kungcono ukuba lokulutshwana kodwa usesaba uJehova,+
Kulokuba lenotho enengi kodwa uhlala ukhathazekile.+
17 Kungcono ukudla imibhida lapho okulothando khona,+
Kulokudla inyama yenkunzi enonileyo lapho okulokuzondana khona.+
18 Umuntu ozonda masinyane ubangela ukuxabana,+
Kodwa ophuza ukuzonda uyayiqeda ingxabano.+
19 Indlela yevila injengothango lwameva,+
Kodwa indlela yabathembekileyo injengomgwaqo omuhle.+
20 Indodana ehlakaniphileyo iyamthokozisa uyise,+
Kodwa isiphukuphuku siyamdelela unina.+
21 Umuntu ongelangqondo uthokoziswa yibuphukuphuku,+
Kodwa umuntu oqedisisayo uhamba ethe nhlo+ lapho ayakhona.
22 Amacebo ayafadalala nxa umuntu engabuzi kwabanye,
Kodwa kuba lokuphumelela nxa kulabacebisi abanengi.+
23 Uyathokoza umuntu ophendula ngendlela eqondileyo,+
Lelizwi elikhulunywe ngesikhathi esifaneleyo lihle kakhulu!+
24 Umuntu okhaliphileyo usendleleni ephezulu eya ekuphileni,+
Njalo iyamvikela angayi phansi engcwabeni.+
25 UJehova uzazidiliza izindlu zabaziphakamisayo,+
Kodwa uzalondoloza imingcele yomfelokazi.+
26 UJehova uyawenyanya amacebo omuntu owenza okubi,+
Kodwa amazwi amnandi ahlanzekile kuye.+
27 Umuntu owenza inzuzo yobuqili uletha uhlupho emulini yakhe,+
Kodwa ozonda ukufunjathiswa uzaqhubeka ephila.+
28 Olungileyo uyacabangisisa enhliziyweni yakhe engakaphenduli,+
Kodwa umlomo wabenza okubi ukhihliza izinto ezimbi.
29 UJehova ukhatshana kakhulu labantu abenza okubi,
Kodwa uyawuzwa umthandazo wabalungileyo.+
30 Umuntu okukhangela ngobuso obuchelesileyo wenza inhliziyo ithokoze,
Umbiko omuhle uvuselela amathambo.+
31 Olalelayo nxa ekhuzwa ngamazwi anika impilo
Uzahlala phakathi kwabahlakaniphileyo.+
32 Loba ngubani owala ukulaywa uyayizonda impilo yakhe,+
Kodwa olalelayo nxa ekhuzwa uthola ukuzwisisa.+
33 Ukwesaba uJehova kufundisa umuntu ukuhlakanipha,+
Njalo ukuthobeka+ kuletha udumo.