AmaNani

18 UJehova wasesithi ku-Aroni: “Wena lamadodana akho labendlu kayihlo lizabekwa icala ngaloba yiliphi iphutha elenziwa endaweni engcwele+ njalo wena lamadodana akho lizakuba lecala ngaloba yini ephanjaniswayo emsebenzini wenu wobuphristi.+ 2 Kanti njalo kumele ubuye labafowenu besizwana sakoLevi, isizwana sabokhokho bakho ukuze babe lawe njalo bakuncedise,+ wena kanye lamadodana akho, phambi kwetende loBufakazi.+ 3 Kumele benze yonke imisebenzi okumele bakwenzele yona laleyo okufanele bayenze kulo lonke itende.+ Kodwa akumelanga basondele ezitsheni zendawo engcwele lase-alithareni ukuze wena kanye labo lingafi.+ 4 Bazabambisana lawe njalo benze yonke imisebenzi yabo ephathelane letende lokuhlangana layo yonke imisebenzi yetende futhi kakho umuntu ongavunyelwayo* okumele asondele eduze kwenu.+ 5 Kumele lenze yonke imisebenzi yenu ephathelane lendawo engcwele+ kanye le-alithare+ ukuze ulaka lwami+ lungaphindi lwehlele abantu bako-Israyeli. 6 Mina ngokwami ngithethe abafowenu amaLevi phakathi kwabantu bako-Israyeli ukuze babe yisipho kini.+ Banikwe uJehova ukuze benze inkonzo yetende lokuhlangana.+ 7 Wena lamadodana akho lilomthwalo wokwenza inkonzo yenu yobuphristi ephathelane le-alithare kanye lalokho okungale kwekhetheni+ njalo kumele lenze inkonzo le.+ Ngilinike inkonzo yobuphristi ukuthi ibe yisipho kini. Loba ngubani ongavunyelwayo* ozasondela eduze kumele abulawe.”+

8 UJehova waqhubeka ekhuluma lo-Aroni wathi: “Mina ngokwami ngikukhethile ukuthi ukhangele yonke iminikelo enikelwa kimi.+ Wena lamadodana akho ngilinike isabelo kuzo zonke izinto ezingcwele ezinikelwa ngabantu bako-Israyeli ukuthi sihlale siyisabelo senu.+ 9 Nanku okuzakuba ngokwenu eminikelweni engcwele kakhulu etshiswa ngomlilo: Yonke iminikelo abayenzayo, kugoqela leminikelo yabo yamabele+ leminikelo yesono+ kanye leminikelo yecala+ abayiletha kimi. Kuyinto engcwele kakhulu enikwe wena lamadodana akho. 10 Kumele likudlele endaweni engcwele kakhulu+ futhi wonke umuntu wesilisa angakudla. Kuzakuba yinto engcwele kini.+ 11 Nanku okunye okuzakuba ngokwenu: Izipho ezinikelwa+ ngabako-Israyeli kanye layo yonke iminikelo yokuzunguzwa.+ Izinto lezi ngizinika wena lamadodana akho lamadodakazi akho ukuthi zibe yisabelo senu kokuphela.+ Wonke nje umuntu ohlanzekileyo kwabendlu yakho angazidla.+

12 “Wonke amafutha amahle lalo lonke iwayini elitsha elihle kanye lamabele, okutsho izithelo zabo zokuqala+ abazinika uJehova, ngikunika wena.+ 13 Izithelo zabo ezivuthwa kuqala zakho konke okuvela elizweni labo abazaziletha kuJehova zizakuba ngezakho.+ Loba ngubani ohlanzekileyo kwabendlu yakho angazidla.

14 “Konke okunikelwe ngabako-Israyeli* kuNkulunkulu kumele kube ngokwakho.+

15 “Wonke amazibulo ezinto zonke eziphilayo+ abazawaletha kuJehova kungelani lokuthi ngawabantu kumbe ngawezinyamazana azakuba ngawakho. Kodwa loba sekutheni kumele uhlenge amazibulo abantu+ njalo uhlenge lamazibulo ezifuyo ezingcolileyo.+ 16 Kumele uwahlenge nxa eselenyanga eyodwa kusiya phezulu ngentengo yokuhlenga, intengo ebekiweyo engamashekheli esiliva amahlanu,*+ kusetshenziswa ishekheli yendawo engcwele.* Ishekheli ilingana lamagera angu-20.* 17 Kodwa akumelanga uhlenge inkunzi ezelwe kuqala kumbe imvana enduna ezelwe kuqala loba izinyane lembuzi.+ Phela konke lokhu kungcwele. Kumele ufafaze igazi lezifuyo lezi e-alithareni+ njalo kufanele utshise amafutha azo abe ngumnikelo wokutshiswa, ozakuba luqhatshi olumnandi kuJehova.+ 18 Inyama yazo kumele ibe ngeyakho, njengesifuba somnikelo wokuzunguzwa lomlenze wesokudla, kufanele kube ngokwakho.+ 19 Yonke iminikelo engcwele enikelwa ngabantu bako-Israyeli kuJehova,+ ngiyinike wena lamadodana akho lamadodakazi akho ukuthi ibe yisabelo senu kokuphela.+ Lesi kuzakuba yisivumelwano sesawudo* esizahlala sikhona phambi kukaJehova, kuwe kanye labantwabakho.”

20 UJehova wasesithi ku-Aroni: “Wena awusoze uthole ilifa elizweni labo njalo akulangxenye yomhlabathi ezakuba ngeyakho phakathi kwabo.+ Mina yimi isabelo sakho lelifa lakho phakathi kwabantu bako-Israyeli.+

21 “Khathesi-ke senginike amadodana kaLevi konke okwetshumi+ okuvela ko-Israyeli ukuthi kube lilifa lawo ngenxa yenkonzo ayenzayo, inkonzo yetende lokuhlangana. 22 Abantu bako-Israyeli akusamelanga basondele etendeni lokuhlangana, ngoba bangasondela bazabe benze isono futhi bazakufa. 23 AmaLevi yiwo okumele enze umsebenzi etendeni lokuhlangana njalo yiwo azakuba lecala nxa abantu benze iphutha.+ Akumelanga abe lelifa phakathi kwabantu bako-Israyeli.+ Lo ngumlayo ozahlala ukhona kuzo zonke izizukulwane zenu. 24 Phela amaLevi ngiwanike okwetshumi okunikelwa ngabantu bako-Israyeli ukuthi kube lilifa lawo, konke abazakunikela kuJehova. Yikho ngithe kuwo, ‘Akumelanga abe lelifa phakathi kwabantu bako-Israyeli.’”+

25 UJehova wasesithi kuMosi: 26 “Khuluma lamaLevi uthi kuwo, ‘Lizakwamukela okwetshumi okuvela ebantwini bako-Israyeli engilinike khona ukuthi kube lilifa lenu+ njalo lani kumele likhiphe okwetshumi kokwetshumi elikutholileyo linikele ngakho kuJehova.+ 27 Lokhu kuzakwamukelwa njengomnikelo wenu, kube angathi ngamabele avela esizeni*+ loba isivuno esigcweleyo esivela esikhamelweni sewayini* loba esikhamelweni samafutha. 28 Ngaleyondlela lani lizanikela umnikelo oya kuJehova ovela kukho konke okwetshumi elikuphiwa ngabantu bako-Israyeli njalo ezintweni lezo kumele likhiphe umnikelo kaJehova elizawunika u-Aroni umphristi. 29 Lizanikela yonke imihlobo yeminikelo kuJehova evela kuzo zonke izipho ezinhle eliziphiweyo,+ zibe yinto engcwele.’

30 “Kanti njalo kumele uthi kumaLevi, ‘Nxa linganikela ngokuhle kakhulu elikutholileyo, kuzathathwa njengesivuno senu esivela esizeni kanye lesivuno esivela esikhamelweni sewayini* lasesikhamelweni samafutha. 31 Lina lezimuli zenu lingakudlela loba ngaphi ngenxa yokuthi kuyimbadalo yenu yomsebenzi eliwenzayo etendeni lokuhlangana.+ 32 Alisoze libe lesono ngalokhu ingqe nje linikela okuhle kakhulu kulokho elikutholileyo njalo akumelanga lingcolise izinto ezingcwele zabantu bako-Israyeli ngoba lingafa.’”+