Eyokuqala EyemiLando

23 UDavida wathi eseluphele futhi esezakufa* wabeka indodana yakhe uSolomoni ukuthi ibe yinkosi yabako-Israyeli.+ 2 Wabuthanisa bonke abakhokheli bako-Israyeli labaphristi+ kanye lamaLevi.+ 3 AmaLevi ayeleminyaka engu-30 kusiya phezulu abalwa.+ Kwabalwa umLevi ngamunye kwatholakala ukuthi ayengu-38 000. 4 Angu-24 000 ayekhangela umsebenzi owawusenziwa endlini kaJehova futhi angu-6 000 ayengabaphathi labahluleli.+ 5 Angu-4 000 ayengabalindi bamagedi+ njalo amanye angu-4 000 ayedumisa+ uJehova etshaya iziginci, lezo uDavida ayethe uzenzele ukudumisa uNkulunkulu.

6 UDavida wahlela amaLevi aba ngamaqembu+ kusiya ngokuthi ayeyisizukulwane sikabani emadodaneni kaLevi, uGeshoni loKhohathi loMerari.+ 7 Amadodana kaGeshoni kwakunguLadani loShimeyi. 8 Amadodana kaLadani ayemathathu, kwakunguJehiyela umkhokheli loZethami loJoweli.+ 9 Amadodana kaShimeyi lawo ayemathathu, kwakunguShelomothi loHaziyeli loHarani. Bonke babengabakhokheli bezimuli zosendo lukaLadani. 10 Amadodana kaShimeyi kwakunguJahathi, loZina, loJewushi, loBheriya. Bobane babengamadodana kaShimeyi. 11 UJahathi wayengumkhokheli, umsekeli wakhe kunguZiza. Kodwa njengoba uJewushi loBheriya babengelabantwana abanengi, babalwa njengendlu eyodwa, kwathiwa bazasebenza ndawonye.

12 Amadodana kaKhohathi ayemane, kwakungu-Amramu, lo-Izihari,+ loHebroni, lo-Uziyeli.+ 13 Amadodana ka-Amramu kwakungu-Aroni+ loMosi.+ Kodwa u-Aroni wakhethwa+ waphiwa umsebenzi wokwenza iNgcwelengcwele ihlale ingcwele. Yena lamadodana akhe bakhethwa ukuthi benze umsebenzi lo kokuphela, banikele imihlatshelo phambi kukaJehova, bamenzele inkonzo engcwele njalo bahlale bebusisa abantu ngebizo lakhe.+ 14 Amadodana kaMosi umuntu kaNkulunkulu weqiniso wona abalwa phakathi kwesizwana samaLevi. 15 Amadodana kaMosi kwakunguGeshomu+ lo-Eliyezeri.+ 16 Emadodaneni kaGeshomu, uShebhuweli+ nguye owayengumkhokheli. 17 Ezizukulwaneni zika-Eliyezeri,* uRehabhiya+ nguye owayengumkhokheli. U-Eliyezeri kazange abe lamanye amadodana, kodwa uRehabhiya waba lamadodana amanengi. 18 Emadodaneni ka-Izihari,+ uShelomithi+ nguye owayengumkhokheli. 19 Amadodana kaHebroni kwakunguJeriya owayengumkhokheli, eyesibili kungu-Amariya, eyesithathu kunguJahaziyeli, eyesine kunguJekhameyamu.+ 20 Amadodana ka-Uziyeli+ kwakunguMikha owayengumkhokheli, eyesibili kungu-Ishiya.

21 Amadodana kaMerari kwakunguMahili loMushi.+ Amadodana kaMahili kwakungu-Eliyazari loKhishi. 22 U-Eliyazari wafa engelandodana, wayelamadodakazi kuphela. Ngakho abafowabo, amadodana kaKhishi, bawathatha aba ngomkabo. 23 Amadodana kaMushi ayemathathu, kwakunguMahili lo-Ederi loJeremothi.

24 La kwakungamadodana kaLevi ngezindlu zaboyise, ayebalwa ngaphansi kwabakhokheli bezimuli zaboyise. Abalwa, amabizo awo abhalwa phansi kusukela kwaleminyaka engu-20 kusiya phezulu, lawo ayesenza inkonzo engcwele endlini kaJehova. 25 Phela uDavida wayethe: “UJehova uNkulunkulu ka-Israyeli unike abantu bakhe ukuphumula,+ njalo uzahlala eJerusalema kuze kube nini lanini.+ 26 AmaLevi kuyabe kungasadingakali ukuthi athwale ithabanikeli kanye lazo zonke izinto ezisetshenziswa ukwenza inkonzo kulo.”+ 27 AmaLevi ayeleminyaka engu-20 kusiya phezulu abalwa, kulandelwa imilayo kaDavida yokucina. 28 Umsebenzi wawo kwakuyikuncedisa amadodana ka-Aroni+ ukwenza inkonzo engcwele endlini kaJehova. Yiwo ayekhangela amaguma ethempeli,+ lezindlu zokudlela, lokuhlanjululwa kwezinto zonke ezingcwele kanye lomsebenzi okwakumele wenziwe endlini kaNkulunkulu weqiniso. 29 Ayencedisa ekulungiseni isinkwa sokubukiswa,+ lefulawa ecolekileyo yomnikelo wamabele, lezinkwa eziyisipatalala ezingelamvubelo,+ lamakhekhe abhekhwe ngomganu wensimbi kanye lefulawa evutshiweyo.+ Yiwo futhi ayelomsebenzi wokukala konke okwakusetshenziswa. 30 Nsuku zonke ekuseni+ lantambama kwakumele ame ezindaweni zawo abonge uJehova futhi amdumise.+ 31 Ayencedisa nxa kunikelwa imihlatshelo yokutshiswa kuJehova ngamaSabatha+ langokuthwasa kwenyanga+ langezikhathi zemikhosi,*+ kulandelwa lokho okwakubhalwe emthethweni. Lokhu ayekwenza zikhathi zonke phambi kukaJehova. 32 Ayesenza leminye imisebenzi etendeni lokuhlangana lasendaweni engcwele. Ayencedisa labafowabo, amadodana ka-Aroni, ukwenza inkonzo engcwele endlini kaJehova.