UDutheronomi
10 “Ngalesosikhathi uJehova wathi kimi, ‘Baza amanye amatshe amabili ayizibhebhedu anjengawokuqala,+ ubusuqansa intaba uze kimi njalo kumele uzibazele ibhokisi ngezigodo. 2 Ngizabhala kuzo amazwi abebhalwe ezibhebhedwini zakuqala oziphahlazileyo njalo kumele uzifake ebhokisini.’ 3 Ngakho ngabaza ibhokisi ngezigodo zesinga, ngabaza lezibhebhedu zamatshe ezimbili ezinjengezakuqala, ngasengikhwela entabeni ngiphethe izibhebhedu lezo ngesandla.+ 4 UJehova wasebhala ezibhebhedwini lezo amazwi ayewabhale kuqala,+ iMithetho Elitshumi,*+ amazwi ayewakhulume lani entabeni, phakathi komlilo+ ngelanga lomhlangano*+ futhi uJehova wanginika izibhebhedu lezo. 5 Ngemva kwalokho ngaphenduka ngehla entabeni+ njalo ngafaka izibhebhedu lezo ebhokisini engangilenzile futhi zilokhu zikulo njengoba nje uJehova wayetshilo kimi.
6 “Abako-Israyeli basebesuka eBheherothi Bhene-jakhani baya eMoserothi. U-Aroni wafela kuleyondawo njalo wangcwatshwa khona+ futhi indodana yakhe u-Eliyazari yangena esikhundleni sakhe yaba ngumphristi.+ 7 Basuka kuleyondawo baya eGudigoda, basebesuka eGudigoda baya eJothibhatha+ elizweni elilezifula ezigeleza amanzi.
8 “Ngalesosikhathi uJehova wehlukanisa abesizwana sakoLevi+ lezinye izizwana ukuze bathwale ibhokisi lesivumelwano sikaJehova+ njalo bame phambi kukaJehova ukuze bamkhonze futhi babusise ngebizo lakhe+ njengoba belokhu bekwenza kuze kube lamuhla. 9 Ngenxa yalokhu abesizwana sakoLevi abaphiwanga isabelo kumbe ilifa phakathi kwabafowabo. UJehova ulilifa labo njengoba nje uJehova uNkulunkulu wakho etshilo kubo.+ 10 Mina ngahlala entabeni okwamalanga angu-40 lobusuku obungu-40+ njengakuqala njalo uJehova waphinda wangilalela langalesosikhathi.+ UJehova wayengasafuni ukulibhubhisa. 11 Ngemva kwalokho uJehova wathi kimi, ‘Hamba phambi kwabantu laba, lilungele ukusuka ukuze bangene bathathe ilizwe engafunga kubokhokho babo ukuthi ngizabanika lona.’+
12 “Awu Israyeli! Kambe kuyini uJehova uNkulunkulu wakho akufunayo kuwe?+ Akufunayo yikuthi umesabe uJehova uNkulunkulu wakho,+ uhambe kuzo zonke indlela zakhe,+ umthande, umkhonze uJehova uNkulunkulu wakho ngenhliziyo yakho yonke langomphefumulo wakho wonke+ 13 njalo ugcine imilayo kanye lemithetho kaJehova engikunika yona lamuhla ukuze kukuhambele kuhle.+ 14 Amazulu ngakaJehova uNkulunkulu wakho, wona kanye amazulu aphakeme kakhulu* kanye lomhlaba lakho konke okukuwo.+ 15 Kodwa uJehova wasondela kuboyihlo njalo wabathanda futhi ukhethe lina izizukulwane zabo+ kuzo zonke izizwe njengoba nje kunjalo lamuhla. 16 Ngakho kumele lihlambulule inhliziyo* zenu+ njalo liyekele ubuqholo.*+ 17 Phela uJehova uNkulunkulu wenu nguNkulunkulu wabonkulunkulu,+ uyiNkosi yamakhosi, uNkulunkulu omkhulu, olamandla futhi owesabekayo. Kabandlululi muntu+ futhi kavumi ukufunjathiswa. 18 Wahlulela kuhle intandane lomfelokazi+ njalo uyamthanda umuntu wesinye isizwe,+ uyamnika ukudla kanye lezigqoko. 19 Lani kumele libathande abantu bezinye izizwe, ngoba lani lake laba ngabezizweni elizweni laseGibhithe.+
20 “UJehova uNkulunkulu wakho nguye okumele umesabe, umkhonze,+ unamathele kuye njalo ufunge ngebizo lakhe. 21 Nguye okumele umdumise.+ UnguNkulunkulu wakho okwenzele izinto zonke lezi ezinkulu lezimangalisayo ozibone ngawakho.+ 22 Okhokho bakho baya eGibhithe beliqembu labantu abangu-70* kuphela+ kodwa khathesi uJehova uNkulunkulu wakho uselenze laba banengi njengezinkanyezi ezisemazulwini.+