IVangeli Elabhalwa NguMathewu
20 “UMbuso wezulu unjengomnikazi wendlu owaphuma ekuseni kakhulu wayaqhatsha abantu ukuthi bazosebenza ensimini yakhe yamagilebisi.+ 2 Uthe esevumelane lezisebenzi lezo ukuthi uzazibhadala udenariyu* ngelanga, wathi ziye ensimini yakhe. 3 Waphuma futhi sekungaba lihora lesithathu* wabona abanye emakethe bengaqhatshwanga, 4 wasesithi kubo, ‘Lani hambani ensimini yamagilebisi, ngizalibhadala lokho okulifaneleyo.’ 5 Ngakho bahamba. Waphinda waphuma sekungaba lihora lesithupha* langehora lesi-9* wayaqhatsha ezinye izisebenzi. 6 Kwathi sekungaba lihora lesi-11* waphinda waphuma wasethola abanye bemile khonapho wathi kubo, ‘Kanti lama khonapha ilanga lonke lingaqhatshwanga kutheni?’ 7 Baphendula bathi, ‘Akulamuntu osiqhatshileyo.’ Yena wathi kubo, ‘Lani hambani ensimini yamagilebisi.’
8 “Ntambama umnikazi wensimu wathi kumphathi wezisebenzi, ‘Biza izisebenzi uziphe umholo wazo,+ uqalise ngezokucina, ucine ngezokuqala.’ 9 Amadoda ayeqhatshwe ngehora lesi-11 athi efika, ngamunye waphiwa udenariyu.* 10 Ngakho ababeqhatshwe kuqala bathi befika, bazitshela ukuthi bona bazaphiwa imali enengi kodwa labo baholiswa udenariyu.* 11 Sebephiwe udenariyu, baqalisa ukusola umnikazi wendlu 12 besithi, ‘Abantu laba abafike ekucineni basebenze ihora elilodwa, kodwa ubaphathe njengathi esisebenze nzima ilanga lonke sitshiswa lilanga!’ 13 Kodwa waphendula omunye wabo wathi, ‘Ndoda, angikonelanga lutho mina. Kanti asivumelananga udenariyu?*+ 14 Thatha okungokwakho uhambe. Ngifuna ukupha lo owokucina okulingana lengikuphe khona. 15 Kanti angilalungelo lokwenza engikufunayo ngezinto zami? Kumbe ilihlo lakho lilomona* ngoba mina ngiyaphana?’*+ 16 Ngakho abokucina bazakuba ngabokuqala, abokuqala babe ngabokucina.”+
17 UJesu wathi esesiya* eJerusalema wabizela abafundi bakhe abangu-12 eceleni wathi kubo:+ 18 “Lalelani! Siya* eJerusalema njalo iNdodana yomuntu izanikelwa kubaphristi abakhokhelayo lababhali. Bazayigwebela ukufa+ 19 bayinikele ebantwini bezizweni ukuze bahlekise ngayo futhi bayibhaxabule, besebeyibethela esigodweni,+ ivuswe ngelanga lesithathu.”+
20 Walandwa ngunina wamadodana kaZebhedi,+ ehamba lamadodana akhe wafika waguqa phansi efuna ukucela.+ 21 UJesu wathi kuye: “Ufuna ngikwenzeleni?” Yena waphendula wathi: “Ngicela ukuthi amadodana ami la womabili ahlale lawe eMbusweni wakho, enye esandleni sakho sokudla, enye kwesenxele.”+ 22 UJesu waphendula wathi: “Alikwazi elikucelayo. Lingayinatha yini inkomitsho esengizayinatha?”+ Bathi kuye: “Ye singayinatha.” 23 Wasesithi kubo: “Lizayinatha sibili inkomitsho yami,+ kodwa ukuhlala esandleni sami sokudla lakwesenxele ayisikho kwami ukuthi selingakuphiwa yimi, ngokwalabo asebekulungiselwe nguBaba.”+
24 Abalitshumi bathi bekuzwa lokhu bazicaphukela izelamani lezi ezimbili.+ 25 Kodwa uJesu wababiza wasesithi: “Liyakwazi ukuthi ababusa izizwe bazenzela umathanda phezu kwazo futhi labakhokheli bazo bazigcina zingaphansi kwabo.+ 26 Akumelanga kube njalo kini.+ Loba ngubani ofuna ukuba mkhulu phakathi kwenu kumele abe yinceku yenu,+ 27 njalo loba ngubani ofuna ukuba ngowokuqala phakathi kwenu kufanele abe yisigqili senu,+ 28 njengoba nje leNdodana yomuntu ingalandanga ukuzosetshenzelwa kodwa yalanda ukuzosebenza+ lokunikela ngempilo yayo ibe yinhlawulo yabanengi.”+
29 Sebesuka eJerikho walandelwa lixuku elikhulu. 30 Amadoda amabili ayiziphofu ayehlezi eceleni komgwaqo ezwa ukuthi uJesu wayesedlula, asememeza athi: “Nkosi! Sizwele isihawu Ndodana kaDavida!”+ 31 Kodwa abantu bawakhuza bawatshela ukuthi athule. Loba kunjalo wona amemeza kakhulu esithi: “Nkosi! Sizwele isihawu Ndodana kaDavida!” 32 Ngakho uJesu wama wawabiza, wasesithi: “Lifuna ngilenzeleni?” 33 Athi kuye: “Nkosi, yenza ukuthi amehlo ethu abone.” 34 UJesu wawazwela usizi wasewathinta amehlo.+ Amadoda la ahle aqalisa ukubona asemlandela.