U-Isaya
6 Ngomnyaka iNkosi u-Uziya eyafa ngawo+ ngabona uJehova ehlezi esihlalweni sobukhosi esiphezulu njalo esiphakemeyo.+ Umphetho wesembatho sakhe wawuchayeke wagcwala ithempeli. 2 Amaserafi ayemi ngaphezulu eduze kwakhe, ngalinye lalilempiko eziyisithupha futhi lalivale ubuso balo ngempiko ezimbili, lavala lenyawo zalo ngezinye ezimbili njalo linye ngalinye laliphapha ngempiko ezimbili.
3 Ngalinye lalimemeza elinye lisithi:
“Ungcwele, ungcwele, ungcwele uJehova wamabutho.+
Umhlaba wonke ugcwele inkazimulo yakhe.”
4 Kwathi kuzwakala umsindo wokumemeza lokho,* imigubazi yeminyango yanyikinyeka futhi intuthu yagcwala endlini.+
5 Ngasengisithi: “Maye babo!
Ngafa mina,
Ngoba ngingumuntu olezindebe ezingcolileyo,
Njalo ngihlala phakathi kwabantu abakhuluma izinto ezingcolileyo,*+
Amehlo ami asebone iNkosi, uJehova wamabutho ngokwakhe!”
6 Kusenjalo, elinye iserafi laphapha labuya kimi lithwele ilahle elivuthayo+ elalilithethe e-alithareni+ ngodlawu.* 7 Lathinta umlomo wami ngalo lathi:
“Khangela! Lokhu sekuthinte izindebe zakho.
Icala lakho selisusiwe,
Lesono sakho sesihlawulelwe.”
8 Ngasengisizwa ilizwi likaJehova lisithi: “Ngizathuma bani njalo ngubani ozasihambela?”+ Ngasengiphendula ngathi: “Ngilapha! Thuma mina!”+
9 Yena waphendula wathi, “Hamba uyetshela abantu laba uthi:
10 Yenza inhliziyo zabantu laba zibe lukhuni,+
Wenze indlebe zabo zibe buthundu,+
Uvale lamehlo abo
Ukuze bangaboni ngamehlo abo,
Futhi bangezwa ngendlebe zabo,
Ukwenzela ukuthi bangazwisisi ngezinhliziyo zabo,
Njalo bangaphenduki basiliswe.”
11 Ngasengisithi: “Awu Jehova, kuze kube nini?” Yena wathi:
“Amadolobho aze adilike kusale kungela ngitsho lesisodwa isakhamuzi,
Lezindlu zisale zingaselabantu,
Lelizwe lisale lingamanxiwa futhi lingelalutho;+
12 UJehova aze abaxotshele khatshana abantu,+
Lomumo welizwe lelo eselingamanxiwa usumubi kakhulu.
13 “Kodwa elizweni kuzabe kulokhu kulabalutshwana abaseleyo* njalo kuzaphinda kube lokutshiswa. Abantu laba bazakuba njengesihlahla esikhulu lesihlahla som-okhi, ezithi zingaganyulwa kusale isidindi. Inhlanyelo* engcwele izakuba yisidindi leso.”