ImiSebenzi Yabaphostoli
2 Ngelanga loMkhosi wePhentekhosti+ bonke babebuthene ndawonye. 2 Masinyane nje kwaba lomsindo ovela ezulwini kungathi ngumoya ovunguza ngamandla, wezwakala endlini yonke ababekuyo,+ 3 njalo babona okwakungathi ngamalangabi omlilo ayefanana lolimi lomuntu futhi ahlala emuntwini munye ngamunye owayelapho. 4 Bonke bagcwala umoya ongcwele,+ baqalisa ukukhuluma ngezindimi ezitshiyeneyo kusiya ngalokho umoya owawubenza benelise ukukukhuluma.+
5 Ngalesosikhathi eJerusalema kwakulamaJuda ayesesaba uNkulunkulu ayevela kuzo zonke izizwe ezingaphansi kwezulu.+ 6 Kwathi kusiba lomsindo lo kwabuthana abantu abanengi. Babemangele ngoba ngamunye wabo wayebezwa bekhuluma ngolimi lwakhe. 7 Abantu bamangala kakhulu bathi: “Liyabona nje ukuthi bonke laba abakhulumayo ngabeGalile?+ 8 Manje kwenzakala njani ukuthi ngamunye wethu azwe bekhuluma ulimi lwakhe lomdabuko? 9 KulamaPhathiya, lamaMede,+ lama-Elami,+ labahlala eMesophothamiya, leJudiya, leKhaphadokhiya, lePhontusi, lasesabelweni se-Asiya,+ 10 leFrigiya, lePhamfiliya, leGibhithe lasezabelweni zeLibhiya eduze leKhurene kanye lezivakatshi ezivela eRoma, amaJuda labaphendukele okholweni lwesiJuda,*+ 11 labeKhrethe, labe-Arabhiya. Sonke sibezwa bekhuluma izinto ezimangalisayo zikaNkulunkulu ngezindimi zethu.” 12 Bonke bamangala batsha amathe, babuzana bathi: “Kutshoni lokhu?” 13 Kodwa abanye babahleka bathi: “Badakwe liwayini elimnandi.”*
14 UPhetro wasesukuma labaliTshumi Lanye+ wakhuluma labantu ngelizwi eliphezulu wathi: “Bantu beJudiya lani lonke elihlala eJerusalema, ngicela lilalelisise amazwi ami. 15 Licabanga ukuthi abantu laba badakiwe kodwa abadakwanga ngoba khathesi lihora lesithathu.* 16 Nanku okwakhulunywa kusetshenziswa umphrofethi uJoweli: 17 ‘UNkulunkulu uthi, “Ezinsukwini zokucina ngizathululela umoya wami kuyo yonke imihlobo yabantu. Amadodana lamadodakazi enu azaphrofetha, lamajaha azabona imibono futhi amaxhegu enu azaphupha amaphupho.+ 18 Ngalezonsuku omunye umoya wami ngizawuthululela phezu kwezigqili lezigqilikazi zami njalo zizaphrofetha.+ 19 Ngizakwenza izimanga phezulu ezulwini lezibonakaliso phansi emhlabeni, igazi, lomlilo lentuthu emnyama. 20 Ilanga lizatshintsha libe mnyama lenyanga itshintshe ibe ligazi lungakafiki usuku lukaJehova* olukhulu njalo olukhazimulayo. 21 Wonke umuntu obiza ibizo likaJehova* uzasindiswa.”’+
22 “Bantu bako-Israyeli, zwanini amazwi la: UNkulunkulu wamveza egcekeni uJesu umNazaretha, walitshengisa yena ngemisebenzi emangalisayo lezimanga kanye lezibonakaliso azenza esebenzisa yena phakathi kwenu,+ njengoba lisazi. 23 Kodwa lamnikela ezandleni zabantu abangelamthetho laselimbethela esigodweni lambulala.+ Lokhu yikho uNkulunkulu ayekuhlosile+ futhi wayekwazi ukuthi kuzakwenzakala. 24 Wamvusa+ ngokumkhulula ekufeni* ngoba kwakungeke kwenzeke ukuthi ukufa kuqhubeke kumbambile.+ 25 UDavida yena uthi ngaye: ‘UJehova* ngimgcina ephambi kwami* sonke isikhathi futhi angisoze nginyikinywe ngoba usesandleni sami sokudla. 26 Yikho inhliziyo yami iyathokoza lolimi lwami luyajabula kakhulu. Ngizahlala ngilethemba 27 ngoba awusoze ungitshiye engcwabeni njalo awusoze uvume ukuthi oqotho wakho akubone ukonakala.+ 28 Wangifundisa izindlela zokuphila futhi uzangigcwalisa ngentokozo enkulu phambi kwakho.’+
29 “Madoda, bafowethu, ngivumelani ngikhulume lani ngikhululekile, ngilitshele ngokhokho wethu uDavida. Liyakwazi ukuthi wafa wangcwatshwa+ njalo ithuna lakhe likhona lapha kuze kube lamuhla. 30 Yena wayengumphrofethi njalo wayekwazi ukuthi uNkulunkulu wayefungile kuye ukuthi wayezahlalisa omunye wabantwabakhe esihlalweni sakhe sobukhosi.+ 31 Yikho wakubona kungakenzakali ukuthi uKhristu wayezavuswa, wasekhuluma ngakho wathi kasoze atshiywe engcwabeni* futhi inyama yakhe ayisoze ikubone ukonakala.+ 32 UNkulunkulu wamvusa uJesu lo njalo sonke singofakazi balokho.+ 33 Ngakho usethulule lokhu elikubonayo lelikuzwayo ngoba waphakanyiselwa esandleni sokudla sikaNkulunkulu,+ wemukela umoya ongcwele ayewuthenjiswe nguBaba.+ 34 Phela uDavida kazange aye ezulwini kodwa yena ngokwakhe uthi, ‘UJehova* wathi eNkosini yami: “Hlala esandleni sami sokudla 35 ngize ngenze izitha zakho zibe yisenabelo* senyawo zakho.”’+ 36 Yikho yonke indlu yako-Israyeli kumele ikwazi ukuthi uNkulunkulu wamenza waba yiNkosi loKhristu,+ yenalo uJesu elambulala ngokumbethela esigodweni.”+
37 Bathi bekuzwa lokhu bahlabeka enhliziyweni, basebesithi kuPhetro lakubo bonke abaphostoli: “Madoda, bafowethu, kumele senzeni?” 38 UPhetro wathi kubo: “Phendukani,+ ngamunye wenu abhabhathizwe+ ebizweni likaJesu Khristu ukuze lithethelelwe izono zenu.+ Ngemva kwalokho lizakwamukela isipho samahala somoya ongcwele. 39 Lokhu kuthenjiswe+ lina labantwabenu, labantu bonke abakhatshana kanye labo bonke uJehova* uNkulunkulu wethu angababizela kuye.”+ 40 Waqhubeka ekhuluma labo futhi efakaza kubo ngokugcweleyo, ebakhuthaza esithi: “Zehlukaniseni labantu laba abaxhwalileyo ukuze lisindiswe.”+ 41 Ngakho labo abamukela ngentokozo lokho uPhetro ayekutsho babhabhathizwa+ futhi ngalelolanga kwengezelelwa abantu abangaba ngu-3 000.+ 42 Baqhubeka bezimisele ukulalela imfundiso yabaphostoli, bebuthana ndawonye,* besidla bonke+ njalo bekhuleka.+
43 Abaphostoli baqalisa ukwenza izimangaliso ezinengi lezibonakaliso+ futhi wonke umuntu wamesaba uNkulunkulu. 44 Bonke ababa ngamakholwa babebuthene ndawonye njalo babenikela ngalokho ababelakho ukuze kusetshenziswe ngumuntu wonke. 45 Babethengisa impahla yabo+ lezinto zabo, besebesabelana imali kusiya ngokuthi ngamunye wabo wayeswelani.+ 46 Nsuku zonke babebuthana ethempelini belenhloso eyodwa. Babesabelana ukudla futhi besidla ezindlini ezitshiyeneyo, bethokoza kakhulu. Konke lokhu babekwenza ngenhliziyo ezimsulwa. 47 Babedumisa uNkulunkulu njalo besamukelwa ngabantu bonke. Nsuku zonke uJehova* wayeqhubeka esengezelela kubo abantu ababesindiswa.+