U-Isaya
46 UNebho uyakhothama, loBheli* uyakhothama aze ayefika phansi.+
Izithombe zabo zifakwe phezu kwezinyamazana ezisetshenziswa ukuthwala imithwalo,+
Sezingumthwalo osinda izinyamazana ezidiniweyo.
2 Bayakhothama baye phansi, bakhothama kanye kanye,
Kabenelisi ukuhlenga imithwalo,*
Njalo labo bayathunjwa.
3 “Ngilalelani lina abendlu kaJakhobe, lina lonke abaseleyo endlini ka-Israyeli,+
Lina engilincede kusukela lizalwa ngalithwala kusukela lisesiswini.+
4 Lizaze liguge ngilokhu nginjalo,+
Ngizaqhubeka ngilithwele lize libe lenwele ezimhlophe.
Ngizaliphakamisa ngilithwale njalo ngilihlenge njengoba bengivele ngisenza.+
5 Kambe ngubani elingangifanisa laye kumbe lingilinganise laye?+
Ukhona yini ofanana lami elingangiqathanisa laye?+
6 Kulabanye abathulula igolide elinengi elisesikhwameni sabo,
Balinganise isiliva esikalini.
Baqhatsha umkhandi wensimbi, abesebumba unkulunkulu ngaso.+
Besebekhothama kuye bamkhonze.+
7 Bayasiphakamisa basifake emahlombe abo,+
Basithwale basifake endaweni yaso njalo sihlala khonapho singanyikinyeki.
Kasisuki lapho esifakwe khona.+
Bayasimemeza kodwa kasiphenduli,
Kasenelisi ukuhlenga loba ngubani osebunzimeni.+
8 Kukhumbuleni lokho libe lesibindi.
Kufakeni ezinhliziyweni zenu lina bantu abenza okubi.
9 Khumbulani izinto zakuqala, ezenzakala endulo,
Ukuthi nginguNkulunkulu kakho omunye.
NginguNkulunkulu kakho ofanana lami.+
10 Kusukela ekuqaleni ngihle ngibike lokho okuzakwenzakala ekucineni,
Kusukela endulo ngimemezela izinto ezingakenzakali.+
11 Ngibiza inyoni evela empumalanga edla inyama,+
Indoda evela elizweni elikhatshana ukuze yenze engikukhethileyo.*+
Sengikhulumile njalo ngizakwenza lokhu.
Sengilibumbile icebo lami futhi ngizalenza liphumelele.+
12 Ngilalelani lina bantu abalenhliziyo ezilukhuni,
Lina bantu abakhatshana lokulunga.
Ngizaletha insindiso eZiyoni kanye lenkazimulo yami ko-Israyeli.”+