UJobe
2 Lafika futhi ilanga lokuthi amadodana kaNkulunkulu weqiniso*+ ame phambi kukaJehova.+ Angena ama phambi kukaJehova, uSathane laye wafika wama lawo.+
2 UJehova wasesithi kuSathane: “Uvela ngaphi?” USathane waphendula uJehova wathi: “Bengizibhodela nje emhlabeni ngihambahamba kuwo.”+ 3 UJehova wasesithi kuSathane: “Uke wayibona yini inceku* yami uJobe? Kakho onjengaye emhlabeni. Ungumuntu oqotho ohlala esenza okulungileyo,+ omesabayo uNkulunkulu njalo oxwaya okubi. Ulokhu eqotho kimi+ lanxa ufuna* ngimtshabalalise+ kungelasizatho.” 4 Kodwa uSathane waphendula uJehova wathi: “Isikhumba ngesikhumba. Umuntu uzadela konke alakho ukuze avikele impilo yakhe.* 5 Kodwa ake welule isandla sakho utshaye ithambo lakhe lenyama yakhe, uzabona uzakuthethisa ekukhangele.”+
6 UJehova wasesithi kuSathane: “Usesandleni sakho! Kodwa ungambulali!” 7 Ngakho uSathane wasuka phambi kukaJehova* wasetshaya uJobe ngamathumba abuhlungu kakhulu,*+ kusukela enyaweni kuze kuyefika ekhanda. 8 UJobe wahlala esilotheni wasethatha ucezwana lwembiza yomdaka ukuze abe ezihwaya ngalo.+
9 Umkakhe wacina esithi kuye: “Lakhathesi ulokhu uqhubeka uqotho kuNkulunkulu? Mthuke uzifele!” 10 Kodwa yena wathi kuye: “Ukhuluma njengowesifazana ongelangqondo. Kanti ngokuhle kodwa okumele sikwamukele kuNkulunkulu? Akumelanga samukele lokubi yini?”+ Lanxa uJobe wehlelwa yibunzima bonke lobu, kazange one ngomlomo wakhe.+
11 Abangane bakaJobe abathathu bezwa ngabo bonke ubunzima obabumehlele. Yikho ngamunye wabo wasuka lapho ahlala khona bayahlangana ukuze bayemkhalela njalo bamduduze. Kwakungu-Elifazi+ umThemani loBhilidadi+ umShuhi+ loZofari+ umNamathi. 12 Bathi besithi mehlo suka babona nanguyana umuntu, kodwa abazange bananzelele ukuthi kwakunguJobe. Bathe sebeseduze sebembona kuhle bakhala kakhulu badabula izembatho zabo, baphosa inhlabathi emoyeni bezithela ngayo emakhanda.+ 13 Bahlala laye phansi emhlabathini okwamalanga ayisikhombisa lobusuku obuyisikhombisa, kodwa bonke abazange bakhulume laye ngoba babebona ukuthi uyafuthelwa.+