IVangeli Elabhalwa NguMathewu
5 Wathi ebona amaxuku abantu wakhwela entabeni. Uthe esehlezi phansi abafundi bakhe beza kuye, 2 waseqalisa ukubafundisa esithi:
3 “Bayathokoza abakunanzelelayo ukuthi bayamdinga uNkulunkulu*+ ngoba uMbuso wezulu ngowabo.
4 “Bayathokoza abalilayo ngoba bazaduduzwa.+
5 “Bayathokoza abamnene+ ngoba bazakudla ilifa lomhlaba.+
6 “Bayathokoza abalambele ukulunga labakomeleyo+ ngoba bazasuthiswa.*+
7 “Bayathokoza abalesihawu+ ngoba bazatshengiswa isihawu.
8 “Bayathokoza abamsulwa enhliziyweni+ ngoba bazabona uNkulunkulu.
9 “Bayathokoza abenza kube lokuthula*+ ngoba bazabizwa ngokuthi ngamadodana kaNkulunkulu.
10 “Bayathokoza asebeke bahlukuluzwa ngenxa yokwenza okulungileyo+ ngoba uMbuso wezulu ngowabo.
11 “Liyathokoza nxa abantu belithethisa+ njalo belihlukuluza,+ beligcona ngazo zonke izinto ezimbi lezingamanga ngenxa yami.+ 12 Thabani lijabule kakhulu+ ngoba umvuzo wenu+ mkhulu emazulwini. Labaphrofethi bakudala babebahlukuluza njalo.+
13 “Lina lilisawudo+ lomhlaba. Kodwa nxa isawudo lingaba duma kungenziwani ukuze liphinde libe munyu? Isawudo lelo liyabe lingasasebenziseki, kuyabe sekumele liphoselwe phandle+ linyathelwe ngabantu.
14 “Lina liyikukhanya komhlaba.+ Idolobho eliphezu kwentaba ngeke lisitheke. 15 Nxa abantu bangalumathisa isibane kabasimbokothi ngebhasikiti* kodwa basifaka phezu koluthi lwesibane, besesikhanyisela bonke abasendlini.+ 16 Lani ukukhanya kwenu akukhanye ebantwini+ ukuze babone imisebenzi yenu emihle,+ besebekhazimulisa uYihlo osezulwini.+
17 “Lingacabangi ukuthi ngilande ukuzotshabalalisa uMthetho loba okwabhalwa ngabaphrofethi.* Ngilande ukuzogcwalisa+ hatshi ukutshabalalisa. 18 Ngiqinisile ngithi kini, lanxa kungenzeka ukuthi izulu lomhlaba kudlule, alikho ngitsho lelilodwa ibala elincane loba ingxenyana yohlamvu lwebala eliseMthethweni ezadlula, kuze kwenzakale konke lokhu.+ 19 Ngakho loba ngubani owephula omunye wemilayo le emincane futhi afundise labanye ukuthi benze njalo, kuzathiwa uMbuso wezulu awumfanelanga.* Kodwa loba ngubani olandela imilayo le futhi ayifundise labanye kuzathiwa uMbuso wezulu umfanele.* 20 Ngilitshela ukuthi nxa ukulunga kwenu kungadluli okwababhali lokwabaFarisi,+ alisoze lingene eMbusweni wamazulu loba sekutheni.+
21 “Lezwa ukuthi abendulo batshelwa ukuthi: ‘Ungabulali,+ loba ngubani obulalayo uzahanjiswa emthethwandaba.’+ 22 Lanxa kunjalo mina ngithi kini, loba ngubani oqhubeka ezondele+ umfowabo uzahanjiswa emthethwandaba, futhi lowo obiza umfowabo ngebala lokweyisa elingakhulumekiyo uzahanjiswa eMthethwandaba Omkhulu. Loba ngubani othi, ‘Wena sithutha ndini!’ usengozini yokuphoselwa eGehena*+ lapho okulomlilo ovuthayo.
23 “Ngakho nxa uzonikela ngesipho sakho e-alithareni,+ uthi usulapho ubusukhumbula ukuthi umfowenu ukucaphukele, 24 tshiya isipho sakho khonapho phambi kwe-alithare uhambe. Qala uyekwenza ukuthi kube lokuthula phakathi kwakho lomfowenu, ubusuphenduka uzonikela ngesipho sakho.+
25 “Lungisa masinyane indaba ephakathi kwakho lomuntu okumangalela emthethweni. Lokhu kwenze lisesendleleni ukuze angakunikeli kumahluleli ngoba umahluleli angakudlulisela kusithunywa somthethwandaba, ucine usuphoselwa ejele.+ 26 Ngiqinisile ngithi kuwe, awusoze wafa waphuma lapho uze ubhadale uhlamvu lokucina lwemali* olayo.
27 “Lezwa ukuthi kwathiwa: ‘Ungafebi.’*+ 28 Kodwa mina ngithi kini, loba ngubani oqhubeka ekhangele owesifazana+ aze afise ukulala laye, usefebe laye enhliziyweni yakhe.+ 29 Nxa ilihlo lakho lesokudla likwenzisa isono,* likopole ulilahlele khatshana+ ngoba kungcono ukulahlekelwa yisitho somzimba esisodwa kulokuthi umzimba wakho wonke uphoselwe eGehena.*+ 30 Nxa lesandla sakho sikwenzisa isono,* siqume usilahlele khatshana+ ngoba kungcono ukulahlekelwa yisitho somzimba esisodwa kulokuthi umzimba wakho wonke ucine useGehena.*+
31 “Kanti njalo kwathiwa: ‘Loba ngubani odivosa inkosikazi yakhe kufanele ayiphe incwadi yokudivosa.’+ 32 Kodwa mina ngithi kini, wonke umuntu odivosa inkosikazi yakhe yona ingazange ifebe,* uyifaka esilingweni sokufeba njalo loba ngubani otshada lowesifazana odivosiweyo uyafeba.+
33 “Lezwa lokuthi abendulo batshelwa ukuthi: ‘Ungafungi ubusuyekela ukwenza lokho okufungileyo,+ kodwa kumele ugcwalise izifungo zakho kuJehova.’*+ 34 Lanxa kunjalo, mina ngithi kini: Lingaqali ukufunga,+ lingafungi ngitsho langezulu ngoba liyisihlalo sobukhosi sikaNkulunkulu. 35 Lingafungi ngomhlaba ngoba uyisenabelo* senyawo zakhe+ futhi lingafungi langeJerusalema ngoba ilidolobho leNkosi enkulu.+ 36 Ungafungi ngekhanda lakho ngoba kawenelisi ukutshintsha lonwele olulodwa lube mhlophe kumbe lube mnyama. 37 Ilizwi lenu elithi ‘Yebo’ kalibe nguyebo, lelithi ‘Hatshi’ kalibe nguhatshi+ ngoba okwedlula lokho kuvela komubi.+
38 “Lezwa ukuthi kwathiwa: ‘Ilihlo ngelihlo, lezinyo ngezinyo.’+ 39 Kodwa mina ngithi kini: Lingaxabani lomuntu omubi, kodwa loba ngubani okutshaya ngempama esihlathini sokudla, mnike lesinye isihlathi.+ 40 Nxa umuntu efuna ukukusa emthethwandaba ukuze akuthathele isembatho sakho sangaphakathi, mvumele athathe lesangaphandle.+ 41 Kanti njalo nxa isiphathamandla sikubamba ngamandla ukuthi uhambe laso ikhilomitha* elilodwa, hamba laso amakhilomitha amabili. 42 Mnike lowo ocela kuwe futhi ungamfulatheli ofuna ukuboleka* kuwe.+
43 “Lezwa ukuthi kwathiwa: ‘Kumele uthande umakhelwane wakho,+ uzonde isitha sakho.’ 44 Kodwa mina ngithi kini: Qhubekani lithanda izitha zenu+ futhi lithandazela abalihlukuluzayo,+ 45 ukuze litshengise ukuthi lingamadodana kaYihlo osezulwini,+ njengoba yena esenza ukuthi ilanga lakhe liphume kwababi labahle, lezulu line kwabalungileyo labangalunganga.+ 46 Kambe kulomvuzo eliwutholayo nxa lithanda abalithandayo kuphela?+ Kanti lokho ayisikho yini okwenziwa ngabathelisi? 47 Kanti njalo nxa libingelela abafowenu kuphela, kuyini okumangalisayo ngelikwenzayo? Ayisikho yini okwenziwa ngabantu bezinye izizwe? 48 Kumele libe ngabapheleleyo njengoba uYihlo osezulwini ephelele.+