UHezekheli
1 Mhlaka 5 ngenyanga yesine ngomnyaka wesi-30, ngesikhathi ngihlala phakathi kwabantu abathunjiweyo+ eduze komfula uKhebhari,+ amazulu avuleka ngaqala ukubona imibono kaNkulunkulu. 2 Mhlaka 5 ngaleyonyanga, ngomnyaka wesihlanu wokuthunjwa kweNkosi uJehoyakhini,+ 3 ilizwi likaJehova lafika kuHezekheli* indodana kaBhuzi umphristi ngesikhathi eseduze komfula uKhebhari elizweni lamaKhaledi.+ Elapho isandla sikaJehova saba phezu kwakhe.+
4 Ngathi ngisakhangele ngabona isiphepho esikhulu+ sivela enyakatho. Kwakuleyezi elikhulu njalo kuphazima umbane,*+ emaceleni wonke kulokukhanya okubenyezelayo. Phakathi kombane* kwakulento eyayinjengensimbi ecazimulayo eyenziwe ngegolide lesiliva+ 5 njalo phakathi kwawo kwakulokungathi yizidalwa ezine eziphilayo.+ Isidalwa ngasinye sasifanana lomuntu, 6 silobuso obune lempiko ezine.+ 7 Inyawo zezidalwa lezi zaziqondile njalo zilamasondo anjengawethole, zicazimula okwekhopha ekhazimulayo.+ 8 Emaceleni womane zazilezandla zomuntu ngaphansi kwempiko zazo. Izidalwa lezi ezine zazilobuso kanye lempiko. 9 Impiko zazo zazithintene. Zonke izidalwa lezi zazihamba ziqonde phambili zingatshibiliki.+
10 Isidalwa ngasinye sasilobuso obunje: Phambili sasilobuso bomuntu, ngakwesokudla silobuso besilwane,+ ngakwesenxele silobuso benkunzi+ njalo ngemuva sasilobuso+ bokhozi.+ 11 Babunjalo ubuso bazo. Impiko zazo zazivuleke zaya phezulu. Isidalwa ngasinye sasilempiko ezimbili ezazithintene, lempiko ezimbili ezazembese umzimba waso.+
12 Zonke zazihamba ziqonde phambili, zisiya loba ngaphi lapho umoya owawusithi ziye khona.+ Zazihamba zingatshibiliki. 13 Izidalwa eziphilayo zazingathi ngamalahle avuthayo futhi phakathi laphakathi kwazo kwakulezinto ezazingathi yizibane. Zazikhazimula, zilokhu zisiya phambili lemuva. Emlilweni kwakuphazima umbane.+ 14 Izidalwa eziphilayo zazisithi nxa zihamba kumbe ziphenduka, kukhanye angathi ngumbane ophazimayo.
15 Ngathi ngisakhangele izidalwa eziphilayo ngabona eceleni kwesidalwa ngasinye esasilobuso obune kuleviri elilodwa elithinte phansi.+ 16 Amaviri la ayebunjwe kanje: Ayekhanya ecazimula njengekhrisolithe futhi womane ayefanana. Nxa wawukhangele kwakungathi iviri liphakathi kwelinye iviri.* 17 Ayesithi nxa ehamba enelise ukuya kuloba yiliphi icele engazange atshibilike. 18 Amaviri la ayemakhulu okumangalisayo njalo womane ayegcwele amehlo yonke indawo.+ 19 Izidalwa eziphilayo zazisithi zingahamba, amaviri lawo ahambe, futhi izidalwa eziphilayo zazisithi zingaphakama zisuke emhlabeni, amaviri lawo aphakame.+ 20 Zazisiya loba ngaphi lapho umoya owawuziqondisa khona, loba ngaphi lapho umoya owawusiya khona. Amaviri ayephakama lezidalwa eziphilayo ngoba umoya owawusebenza kuzo yiwo owawusebenza lasemavirini.* 21 Izidalwa eziphilayo zazisithi zingahamba, amaviri lawo ahambe, zithi zingama, amaviri lawo ame. Zazisithi zingaphakama zisuke emhlabeni, amaviri lawo aphakame lazo ngoba umoya owawusebenza ezidalweni eziphilayo yiwo owawusebenza lasemavirini.
22 Phezu kwamakhanda ezidalwa eziphilayo kwakulento eyayifanana lesibhakabhaka, icazimula njengongqwaqwane futhi imangalisa. Yayendlaleke kuhle phezu kwamakhanda azo.+ 23 Ngaphansi kwesibhakabhaka lesi impiko zezidalwa eziphilayo zaziqonde nta futhi zithintene. Isidalwa ngasinye sasilempiko ezimbili zokwembesa icele elilodwa lomzimba waso, lezinye ezimbili ezokwembesa elinye icele. 24 Ngathi ngisizwa umsindo wempiko zazo, wawungathi ngamanzi ahubayo, kungathi kukhwaze uSomandla.+ Zazisithi nxa zihamba kube angathi libutho elihlokomayo, nxa zisima zehlise impiko zazo.
25 Kwezwakala ilizwi livela phezu kwesibhakabhaka esasingaphezu kwamakhanda ezidalwa eziphilayo. (Nxa zisima zazisehlisa impiko zazo.) 26 Phezu kwesibhakabhaka esasiphezu kwamakhanda azo kwakulokungathi lilitshe lesafire+ futhi kwakufanana lesihlalo sobukhosi.+ Owayehlezi khonale phezulu esihlalweni sobukhosi wayengathi ngumuntu.+ 27 Kusukela lapho okwakukhanya angathi lukhalo lwakhe kusiya phezulu, ngabona okwakungathi yinsimbi ecazimulayo+ eyenziwe ngegolide lesiliva, eyayifanana lomlilo ovuthayo. Kusukela ekhalweni lwakhe kusehla kusiya phansi kwakungathi ngumlilo.+ Lapho ayekhona kwakuyibunkanyankanya indawo yonke, 28 kungathi ngumchilowamakhosikazi+ emayezini nxa kusina izulu elikhulu. Kwakunjalo ukukhanya okwakusendaweni leyo, kwakungathi yinkazimulo kaJehova.+ Ngathi ngikubona lokho ngazilahla phansi ngathi mbo ngobuso emhlabathini, ngasengisizwa umuntu ekhuluma.