Kwabase-Efesu
1 Mina Phawuli umphostoli kaKhristu uJesu ngentando kaNkulunkulu, ngibhalela abangcwele abase-Efesu,+ abathembekileyo futhi abamanyene loKhristu uJesu:
2 Umusa omkhulu lokuthula okuvela kuNkulunkulu uBaba wethu laseNkosini uJesu Khristu akube kini.
3 Kadunyiswe uNkulunkulu, uYise weNkosi yethu uJesu Khristu ngoba ngomoya wakhe ongcwele usiphe zonke izibusiso ezulwini ngenxa yokuthi simanyene loKhristu.+ 4 Phela wasikhetha umhlaba* ungakasungulwa, ukuthi sibe munye laye* ukuze sibe lothando, sibe ngcwele futhi singabi lasici+ phambi kwakhe. 5 Wayevele wakhetha+ ukuthi sizakuba ngamadodana akhe+ ngoJesu Khristu, ngokuvumelana lentando yakhe kanye lalokho okumthokozisayo,+ 6 ukuze adunyiswe ngenxa yomusa wakhe omkhulu okhazimulayo+ asenzele wona ngesihle esebenzisa lowo amthandayo.+ 7 Siyakhululwa ngenhlawulo yeNdodana yakhe eyasihlawulela ngegazi layo,+ okutsho ukuthi siyathethelelwa iziphambeko zethu+ ngomusa wakhe omkhulu.
8 Wasithululela umusa lo omkhulu lakho konke ukuhlakanipha kanye lokuzwisisa konke, 9 ngokwenza ukuthi siyazi imfihlo engcwele+ yentando yakhe. Imfihlo le ivumelana lalokho okumthokozisayo ayekuhlosile, 10 ukuthi ahlele izinto ekupheleni kwezikhathi ezibekiweyo, ukuze aqoqele zonke izinto kuKhristu, izinto ezisemazulwini lezinto ezisemhlabeni.+ Zizaqoqelwa kuye sibili 11 lowo esimanyene laye njalo esabekwa ukuthi sibe zindlalifa kanye laye.+ Savele sakhethwa ngokuvumelana lenhloso yalowo owenza konke afuna ukukwenza okuhambelana lentando yakhe, 12 ukuze adunyiswe futhi akhazinyuliswe ngathi thina esibe ngabokuqala ukuba lethemba kuKhristu. 13 Kodwa lani labeka ithemba lenu kuKhristu ngemva kokuzwa ilizwi leqiniso eliyizindaba ezinhle ezimayelana lensindiso yenu. Lathi selikholiwe labekwa uphawu+ ngomoya ongcwele elaliwuthenjisiwe futhi lokhu kwenziwa ngaye. 14 Umoya lo usenza sibe leqiniso lokuthi sizathola ilifa lethu*+ ukuze abantu bakaNkulunkulu+ bakhululwe ngenhlawulo,+ yena abesedunyiswa njalo akhazinyuliswe.
15 Sengizwile ngokholo elilalo eNkosini uJesu langendlela elibathanda ngayo bonke abangcwele, yikho lami 16 ngingayekeli ukulibongela kuNkulunkulu. Ngiqhubeka ngilithandazela 17 ngicela ukuthi uBaba wenkazimulo, uNkulunkulu weNkosi yethu uJesu Khristu, aliphe umoya wokuhlakanipha lowokuzwisisa izinto azembulayo mayelana lolwazi oluqondileyo oluphathelane laye.+ 18 Uwakhanyisele amehlo ezinhliziyo zenu ukuze likwazi ukuthi yiliphi ithemba alibizele kulo lokuthi yiphi inotho ekhazimulayo elilifa aligcinele abangcwele,+ 19 kanye lokuthi makhulu okumangalisayo amandla awasebenzisa kithi thina abakholwayo.+ Ubukhulu bamandla la bakhanya 20 lapho evusa uKhristu kwabafileyo futhi emhlalisa esandleni sakhe sokudla+ ezulwini, 21 phezu kwabo bonke ohulumende lababusi leziphathamandla kanye lamakhosi, laphezu kwawo wonke amabizo akhona+ kulo umumo wezinto* kanye lakulowo ozayo. 22 Waphinda wabeka izinto zonke ngaphansi kwenyawo zakhe+ futhi wamenza waba yinhloko phezu kwakho konke ebandleni.+ 23 Ibandla lingumzimba wakhe+ njalo ligcwaliswe ngaye yena ogcwalisa zonke izinto kukho konke.