ISambulo KuJohane
7 Ngemva kwalokho ngabona izingilosi ezine zimi emagumbini amane omhlaba, ziyibambe zayiqinisa imimoya emine yomhlaba ukuze kungabi lomoya ovunguzayo emhlabeni kumbe elwandle lakuloba yisiphi isihlahla. 2 Ngasengibona enye ingilosi ikhwela ivela empumalanga ilophawu lukaNkulunkulu ophilayo. Yamemeza ngelizwi elikhulu ikhuluma lezingilosi ezine ezazivunyelwe ukuthi zilimaze umhlaba lolwandle, 3 yathi: “Lingawulimazi umhlaba loba ulwandle loba izihlahla size sifake uphawu+ emabunzini+ ezinceku zikaNkulunkulu wethu.”
4 Ngasengisizwa inani lalabo ababefakwe uphawu. Babeyi-144 000+ njalo babevela kuzo zonke izizwana zamadodana ako-Israyeli:+
5 Esizwaneni sakoJuda babengu-12 000 ababefakwe uphawu,
esizwaneni sakoRubheni babengu-12 000,
esizwaneni sakoGadi babengu-12 000,
6 esizwaneni sako-Asheri babengu-12 000,
esizwaneni sakoNafithali babengu-12 000,
esizwaneni sakoManase+ babengu-12 000,
7 esizwaneni sakoSimiyoni babengu-12 000,
esizwaneni sakoLevi babengu-12 000,
esizwaneni sako-Isakhari babengu-12 000,
8 esizwaneni sakoZebhuloni babengu-12 000,
esizwaneni sakoJosefa babengu-12 000,
esizwaneni sakoBhenjamini babengu-12 000 ababefakwe uphawu.
9 Ngemva kwalokho ngabona ixuku elikhulu njalo kakho owayengenelisa ukulibala! Laliphuma kuzo zonke izizwe, lezizwana, labantu kanye lezindimi+ futhi lalimi phambi kwesihlalo sobukhosi laphambi kweMvana ligqoke izembatho ezimhlophe,+ liphethe ingatsha zelala ezandleni.+ 10 Ixuku leli liqhubeka limemeza ngelizwi elikhulu lisithi: “Insindiso ivela kuNkulunkulu wethu ohlezi esihlalweni sobukhosi,+ lakuyo iMvana.”+
11 Zonke izingilosi zazimi zigombolozele isihlalo sobukhosi labadala+ kanye lezidalwa ezine eziphilayo njalo zazilahla phansi zakhothama phambi kwesihlalo sobukhosi zakhonza uNkulunkulu, 12 zisithi: “Ameni! Udumo, lenkazimulo, lokuhlakanipha, lokubonga, lenhlonipho, lamandla lokuqina akube kuNkulunkulu wethu kuze kube nini lanini.+ Ameni.”
13 Omunye wabadala wasesithi kimi: “Kanti laba abagqoke izembatho ezimhlophe+ ngobani njalo bavela ngaphi?” 14 Mina ngahle ngathi kuye: “Nguwe okwaziyo nkosi yami.” Yena wathi kimi: “Laba yibo abaphuma ekuhluphekeni okukhulu+ njalo sebegezise izembatho zabo egazini leMvana,+ bazenza zaba mhlophe. 15 Yikho bephambi kwesihlalo sobukhosi sikaNkulunkulu njalo bemenzela inkonzo engcwele ethempelini lakhe emini lebusuku futhi lowo ohlezi esihlalweni sobukhosi+ uzakwelulela itende lakhe phezu kwabo.+ 16 Ngeke baphinde balambe njalo ngeke baphinde bome, lelanga kalisoze libahangule futhi ukutshisa okuvuthayo akusoze kubaxathule+ 17 ngoba iMvana+ ephakathi* kwesihlalo sobukhosi izabelusa,+ ibakhokhele ibase emithonjeni yamanzi okuphila+ njalo uNkulunkulu uzakwesula zonke izinyembezi emehlweni abo.”+