IVangeli Elabhalwa NguMathewu
17 Kwathi sekwedlule amalanga ayisithupha, uJesu wathatha uPhetro loJakhobe loJohane umfowabo kaJakhobe wakhwela labo entabeni ende.+ 2 Sebelapho waguquka isimo phambi kwabo. Ubuso bakhe baqala ukukhazimula njengelanga lezembatho zakhe zangaphandle zabenyezela* njengokukhanya.+ 3 Khonokho nje babona sekuloMosi lo-Elija bexoxa laye. 4 UPhetro wasesithi kuJesu: “Nkosi kuhle kithi ukuba lapha. Nxa ufuna ngingamisa amatende amathathu lapha, elakho lelikaMosi lelika-Elija.” 5 Uthe elokhu esakhuluma, bagubuzelwa liyezi elikhazimulayo. Kwezwakala ilizwi liphuma kuleloyezi lisithi: “Le yiNdodana yami engiyithandayo futhi engiyamukelayo.+ Yilaleleni.”+ 6 Abafundi bathi bekuzwa lokhu bawa bathi mbo phansi ngobuso, besaba kakhulu. 7 UJesu wasesondela wafika wabathinta wathi: “Sukumani, lingesabi.” 8 Bathi bevusa amehlo kababonanga muntu ngaphandle kukaJesu kuphela. 9 Sebesehla entabeni uJesu wathi kubo: “Umbono eliwubonileyo lingawutsheli muntu iNdodana yomuntu ize ivuswe kwabafileyo.”+
10 Kodwa abafundi bambuza bathi: “Manje kungani ababhali besithi u-Elija kumele aze kuqala?”+ 11 Wabaphendula wathi: “U-Elija uyeza sibili njalo uzabuyisela zonke izinto endaweni yazo.+ 12 Lanxa kunjalo, ngilitshela ukuthi u-Elija sewabuya kodwa abazange bananzelele ukuthi nguye futhi bamenza konke ababekufuna.+ INdodana yomuntu layo bazayiphatha ngaleyondlela, izahlupheka ezandleni zabo.”+ 13 Abafundi basebezwisisa ukuthi ubatshela ngoJohane uMbhabhathizi.
14 Bathe sebeseduze lexuku,+ enye indoda yeza kuye yafika yaguqa phambi kwakhe yathi: 15 “Nkosi, yizwele isihawu indodana yami ngoba iyagula ilezithuthwane.* Ijayele ukuwela emlilweni lasemanzini.+ 16 Ngiyilethe kubafundi bakho kodwa behlulekile ukuyelapha.” 17 UJesu waphendula wathi: “Hawu lina sizukulwane esingelakholo lesonakeleyo,+ kumele ngiqhubeke ngilani kuze kube nini? Kufanele ngilibekezelele kuze kube nini? Mletheni lapha umfana.” 18 UJesu waselikhuza idimoni laphuma emfaneni. Umfana wahle wasila ngalesosikhathi.+ 19 Ngemva kwalokho abafundi baya kuJesu sebebodwa bafika bathi: “Kungani thina sehlulekile ukulikhipha?” 20 Wathi kubo: “Ngenxa yokuthi lilokholo oluncane. Ngiqinisile ngithi kini, nxa lilokholo olungangentanga yemastadi lizakuthi entabeni le, ‘Suka lapha uye laphaya,’ lakanye isuke futhi akulalutho elizakwehluleka ukulwenza.”+ 21 *——
22 Bathi bebuthene ndawonye eGalile uJesu wathi kubo: “INdodana yomuntu izanikelwa* ezandleni zabantu+ 23 bayibulale, ibisivuswa ngelanga lesithathu.”+ Bathi bekuzwa lokhu badana kakhulu.
24 Sebefike eKhaphenawume, amadoda ayebhadalisa umthelo wamadrakhima amabili* alanda uPhetro afika athi: “Umfundisi wenu uyawubhadala yini umthelo wamadrakhima amabili?”+ 25 Yena wathi: “Uyawubhadala.” Kodwa uthe esengene endlini, uJesu wamqalela ukukhuluma wathi kuye: “Ucabangani Simoni? Amakhosi omhlaba ayithatha kubobani imbadalo kumbe umthelo?* Emadodaneni awo kumbe kwabanye abantu?” 26 Wathi: “Kwabanye abantu.” UJesu wasesithi kuye: “Lokhu kutsho ukuthi amadodana awo kawabhadali umthelo. 27 Kodwa ukuze singabakhubi,+ hamba elwandle ufike uphosele iwuka, ubusuthatha inhlanzi ezabanjwa kuqala. Ungayivula umlomo uzathola imali yesiliva.* Uyithathe uyebanika, ubhadalele mina lawe.”