UHezekheli
16 Ilizwi likaJehova laphinda lafika kimi lathi: 2 “Ndodana yomuntu, tshela iJerusalema ngezenzo zayo ezenyanyekayo.+ 3 Kumele uthi, ‘Nanku okutshiwo yiNkosi Enkulu uJehova ngeJerusalema: “Wena udabuka elizweni laseKhenani futhi yikho lapho owazalelwa khona. Uyihlo wayengum-Amori,+ unyoko engumHithi.+ 4 Ngelanga owazalwa ngalo awuzange uqunywe inkaba njalo awugeziswanga ngamanzi ukuze uhlanzeke. Awuzange uhlikihlwe ngesawudo futhi awugoqelwanga ngamalembu. 5 Akulamuntu owakuzwelayo wakwenzela izinto zonke lezi futhi kakho owaba lesihawu kuwe, kodwa walahlelwa egangeni ngoba wahle wazondwa ngelanga owazalwa ngalo.
6 “‘“Ngathi ngidlula ngakubona ukhabakhaba phakathi kwegazi lakho. Ngakhuluma lawe ulele egazini lakho ngathi: ‘Qhubeka uphila!’ Ngakhuluma lawe sibili ulele egazini lakho, ngathi: ‘Qhubeka uphila!’ 7 Ngakwenza waba labantwana abanengi njengotshani beganga obumila bube bunengi. Wakhula wabumbeka futhi wawugqoka imiceciso emihle kakhulu. Waphuhla njalo lenwele zakho zakhula kodwa wawulokhu uhamba nqunu ungagqokanga.”’
8 “‘Ngathi ngidlula ngananzelela ukuthi wawusukhulile okokuthi usungangena endabeni zothando. Ngakho ngakwembathisa ngesembatho sami+ ngavala ubunqunu bakho, ngafunga futhi ngenza isivumelwano lawe wasusiba ngowami,’ kutsho iNkosi Enkulu uJehova. 9 ‘Ngakugezisa ngamanzi ngakuhlambulula igazi elalisemzimbeni wakho, ngasengikugcoba ngamafutha.+ 10 Ngakugqokisa isigqoko esicecisiweyo ngakupha amanyathela amahle enziwe ngesikhumba, ngasengikuthandela ngelembu lelineni elihle. Ngakugqokisa izigqoko ezidulayo. 11 Ngakucecisa ngemiceciso emihle ngakufaka amasongo ezandleni, ngakugqokisa lomgaxo entanyeni. 12 Ngakufaka indandatho emakhaleni lamacici endlebeni kanye lomqhele omuhle ekhanda. 13 Wawuzicecisa ngegolide lesiliva, ugqoka isembatho esicecisiweyo lezigqoko ezidulayo ezenziwe ngelineni elihle. Wawusidla ifulawa ecolekileyo loluju kanye lamafutha. Waba muhle kakhulu+ waze wafanela ukuba yindlovukazi.’”*
14 “‘Udumo lwakho lwasabalala ezizweni+ ngenxa yobuhle bakho. Phela wawumuhle ungelasici ngoba ngangifake inkazimulo yami phezu kwakho,’+ kutsho iNkosi Enkulu uJehova.”
15 “‘Kodwa waqalisa ukuthemba ubuhle bakho+ futhi waba liwule ngenxa yokuthi wawusudumile.+ Wawufeba laye wonke umuntu odlulayo,+ utshaphaza ubuhle bakho emuntwini wonke. 16 Wathatha ezinye izigqoko zakho wacecisa ngazo izindawo eziphakemeyo* owawuwulela kuzo.+ Izinto ezinje akumelanga zenzakale njalo akumelanga zibe khona. 17 Wathatha lemiceciso emihle yegolide lesiliva engangikunike yona wenza ngayo izithombe zesilisa wafeba lazo.+ 18 Wathatha izembatho zakho ezicecisiweyo wembathisa izithombe zakho zesilisa, wasunikela kuzo ngamafutha ami lempepha yami.+ 19 Wathatha lesinkwa engangikunike sona esenziwe ngefulawa ecolekileyo lamafutha loluju engangikuphe khona ukuthi ukudle, wanikela ngakho ezithombeni zakho ukuze kube ngumnikelo onukelelayo.+ Lokhu yikho kanye okwenzakalayo,’ kutsho iNkosi Enkulu uJehova.”
20 “‘Wathatha amadodana lamadodakazi owawungizalele wona,+ wanikela ngawo ezithombeni zakho.+ Wawungasuthiseki ngobuwule bakho yini? 21 Wabulala amadodana ami wanikela ngawo ukuze atshiswe emlilweni.+ 22 Ngesikhathi usenza zonke izinto lezi ezenyanyekayo futhi uwula, awuzange ukhumbule izinsuku leziyana usesemncane, unqunu futhi ungagqokanga, ukhabakhaba phakathi kwegazi lakho. 23 Maye ngawe ngenxa yokuthi wenze zonke izinto lezi ezimbi!’+ kutsho iNkosi Enkulu uJehova. 24 ‘Wazenzela idundulu elikhulu wazakhela lezindawo eziphakemeyo kuwo wonke amagceke edolobho. 25 Wakha izindawo zakho eziphakemeyo kuyo yonke imigwaqo, lapho okubona khona abantu. Watshaphaza ubuhle bakho ngokuwula laye wonke umuntu odlulayo,+ futhi wangezelela ubuwule bakho.+ 26 Wafeba lamadodana aseGibhithe+ ayetshisekela ukulala lawe, wangithukuthelisa ngokuwula kwakho okungapheliyo. 27 Ngizakwelulela isandla sami esilamandla phezu kwakho ngikujezise, ngitshabalalise ukudla kwakho.+ Ngizakunikela kwabesifazana abakuzondayo,+ amadodakazi amaFilisti azenyanyayo izenzo zakho ezilihlazo,+ abesezenzela umathanda phezu kwakho.
28 “‘Wafeba lamadodana ase-Asiriya ngenxa yokuthi wawungasuthiseki,+ kodwa lanxa wawusuwule lawo, awuzange usuthiseke. 29 Wasuka lapho wayawula elizweni labathengisayo* waze wayafika lakumaKhaledi,+ kodwa lalapho awuzange usuthiseke. 30 Inhliziyo yakho yayisinguthathekile* ngesikhathi usenza zonke izinto lezi, uziphatha njengekhikhitha elixhwale kakhulu!’+ kutsho iNkosi Enkulu uJehova. 31 ‘Kodwa ngesikhathi usakha amadundulu akho amakhulu kuyo yonke imigwaqo lapho abantu ababona khona, futhi usenza izindawo zakho eziphakemeyo kuwo wonke amagceke edolobho, wawungenzi njengewule ngoba wena wawusala ukubhadalwa. 32 Uyisifebe somfazi esithanda amanye amadoda kulokuthi sithande umkaso!+ 33 Wonke amawule aphiwa ngabantu izipho+ kodwa wena nguwe opha bonke abafuna ukulala lawe izipho.+ Uyabathenga ukuze babuye bevela kuzo zonke izindawo bazofeba lawe.+ 34 Wena awufanani labanye abesifazana abawulayo. Alikho iwule elinjengawe! Wena nguwe obhadala owula labo kulokuthi bona bakubhadale. Uwula ngendlela yakho wedwa.’
35 “Ngakho wena sifebe,+ zwana ilizwi likaJehova. 36 Nanku okutshiwo yiNkosi Enkulu uJehova: ‘Ngenxa yokuthi uthulule inkanuko yakho wembula lobunqunu bakho ngesikhathi uwula lezithandwa zakho lazo zonke izithombe zakho ezenyanyekayo,*+ waze wanikela ngegazi lamadodana akho kuzo,+ 37 ngizabutha zonke izithandwa zakho owawuzithokozisa, bonke owawubathanda labo bonke osubazonda. Ngizabaqoqa bevela kuzo zonke indawo ngikunqunule phambi kwabo, babone bonke ubunqunu bakho.+
38 “‘Ngizakujezisa ngesijeziso esifanele omama abatshiya amadoda abo bayefeba,+ lesifanele labo abangababulali.+ Uzabulawa ngenxa yokuthi ngithukuthele kakhulu futhi ngilobukhwele.+ 39 Ngizakunikela esandleni sabo badilize amadundulu akho lezindawo zakho eziphakemeyo.+ Bazakuhlubula izigqoko+ bathathe imiceciso yakho emihle,+ bakutshiye uhamba nqunu. 40 Bazabiza ixuku labantu likuhlasele.+ Bazakukhanda ngamatshe+ bakugwaze ngezinkemba zabo.+ 41 Bazathungela izindlu zakho ngomlilo+ bakujezise phambi kwabesifazana abanengi. Ngizabuqeda bonke ubuwule bakho+ njalo uzayekela ukubhadala izithandwa zakho. 42 Ngizaqedela ulaka lwami lonke phezu kwakho+ futhi ukuthukuthela kwami kuzaphela.+ Ulaka lwami luzabohla, intukuthelo yami iphele.’
43 “‘Ngizakwehlisela phezu kwekhanda lakho isijeziso esifanele izenzo zakho ngenxa yokuthi awuzange ukhumbule insuku zobutsha bakho+ kodwa ungithukuthelisile wenza zonke izinto lezi,’ kutsho iNkosi Enkulu uJehova. ‘Uzatshiya zonke izenzo zakho ezenyanyekayo futhi awusoze uphinde uziphathe butshapha.
44 “‘Bonke abathanda izaga bazasebenzisa isaga lesi kuwe, bathi: “Indodakazi yafuza unina!”+ 45 Ufuze unyoko owayeseyisa umkakhe labantwabakhe. Ufuze labodadewenu abadela omkabo labantwababo. Unyoko wayengumHithi, uyihlo engum-Amori.’”+
46 “‘Udadewenu omdala yiSamariya,+ lowo ohlala enyakatho* lamadodakazi akhe.*+ Udadewenu omncane yiSodoma,+ lowo ohlala eningizimu* lamadodakazi akhe.*+ 47 Ayisikho ukuthi waziphatha njengabo futhi walandela izenzo zabo ezinyanyisayo kuphela, kodwa ngesikhatshana nje wawusuxhwale ukwedlula bona.+ 48 Ngifunga ngami uqobo,’ kutsho iNkosi Enkulu uJehova, ‘udadewenu iSodoma lamadodakazi akhe abazange benze lokho wena lamadodakazi akho elikwenzileyo. 49 Icala leSodoma udadewenu kwakuyileli: Yena lamadodakazi akhe+ babezigqaja+ futhi belokudla okunengi,+ behlezi kuhle kungelalutho olubakhathazayo.+ Kodwa abazange bancede abahluphekayo labayanga.+ 50 Baqhubeka beziphakamisa+ njalo besenza izinto ezenyanyekayo phambi kwamehlo ami.+ Yikho ngabona kungcono ukuthi ngibasuse.+
51 “‘Lezono ezenziwa yiSamariya+ azifiki kulezo owazenzayo wena.* Waqhubeka usenza izinto ezinyanyisayo ezinengi ukwedlula ezabo, okokuthi odadewenu baze bacina bekhanya angathi balungile ngenxa yazo zonke izenzo zakho ezenyanyekayo.+ 52 Kumele uthwale ihlazo lakho ngoba wenze ukuziphatha kwabodadewenu kwakhanya angathi kuhle. Bona bangcono sibili kulawe ngoba wena wenze izinto ezenyanyeka ukwedlula ezabo. Ngakho woba lenhloni uthwale ihlazo lakho ngoba wenze odadewenu bakhanya angathi balungile.’
53 “‘Ngizaqoqa abathunjiweyo beSodoma lamadodakazi ayo labeSamariya lamadodakazi ayo. Ngalesosikhathi ngizaqoqa labathunjiweyo bakho,+ 54 ukuze uthwale ihlazo lakho. Uzayangeka ngenxa yokuthi lokho okwenzileyo kuzabaduduza. 55 Udadewenu iSodoma lamadodakazi akhe bazabuyela esimeni sabo sakuqala, leSamariya lamadodakazi ayo izabuyela esimeni sayo sakuqala. Wena lamadodakazi akho lani lizabuyela kulokho elaliyikho kuqala.+ 56 Udadewenu iSodoma wawungakhulumi langaye ngensuku zokuzigqaja kwakho, 57 ububi bakho bungakavezwa egcekeni.+ Khathesi amadodakazi eSiriya labomakhelwane bayo bayakuthethisa, lamadodakazi amaFilisti+ akugombolozeleyo ayakuchothoza. 58 Uzawuthola umvuzo wokuziphatha kwakho okulihlazo lowezenzo zakho ezenyanyekayo,’ kutsho uJehova.”
59 “Nanku okutshiwo yiNkosi Enkulu uJehova: ‘Ngizakwenza kuwe lokho okufanele izenzo zakho+ ngoba udelele isifungo ngokwephula isivumelwano sami.+ 60 Kodwa mina ngizasikhumbula isivumelwano engasenza lawe ensukwini zobutsha bakho njalo ngizakwenza lawe isivumelwano esingapheliyo.+ 61 Uzakhumbula ukuziphatha kwakho uyangeke+ nxa ususemukela odadewenu abadala labancane kulawe. Ngizakunika bona babe ngamadodakazi akho, kodwa lokho angisoze ngikwenze ngesivumelwano sami lawe.’
62 “‘Mina ngokwami ngizakwenza isivumelwano lawe. Lapho-ke uzakwazi ukuthi mina nginguJehova. 63 Nxa sengikuhlawulele konke okwenzileyo,+ uzazikhumbula izenzo zakho uyangeke, wehluleke lokuvula umlomo ngenxa yenhloni,’+ kutsho iNkosi Enkulu uJehova.”