IVangeli Elabhalwa NguMathewu
23 UJesu wasekhuluma labafundi bakhe labantu bonke wathi: 2 “Ababhali labaFarisi sebezihlalise esihlalweni sikaMosi. 3 Ngakho zonke izinto abalitshela zona zenzeni futhi lizilandele, kodwa lingenzi lokho abakwenzayo ngoba bayakhuluma kodwa abakwenzi abakutshoyo.+ 4 Babopha imithwalo enzima bayibeke emahlombe abantu,+ kodwa bona abafuni ukuyithinta langomunwe.+ 5 Konke abakwenzayo bakwenzela ukubukwa ngabantu.+ Phela amabhokisi alemibhalo abawabophela emabunzini lasengalweni bawenza abe makhulu ukuze bazivikele,+ njalo benza lezintshaka zezembatho zabo zibe zinde.+ 6 Bathanda ukuhlala ezindaweni zabahlonitshwa nxa besemadilini antambama lokuhlala ezitulweni eziphambili* emasinagogeni.+ 7 Bathanda lokubingelelwa emakethe kanye lokuthi abantu bababize ngokuthi Mfundisi.* 8 Kodwa lina akumelanga libizwe ngokuthi Mfundisi* ngoba munye uMfundisi wenu.+ Lina lonke lingabafowabo bomunye lomunye. 9 Kanti njalo lingabizi muntu emhlabeni ngokuthi baba ngoba munye uYihlo,+ lowo osezulwini. 10 Akumelanga libizwe langokuthi lingabakhokheli ngoba munye uMkhokheli wenu, uKhristu. 11 Omkhulu kulani lonke kufanele abe yinceku yenu.+ 12 Loba ngubani oziphakamisayo uzakwehliswa+ futhi loba ngubani ozehlisayo uzaphakanyiswa.+
13 “Maye kini babhali labaFarisi, bazenzisi, ngoba livalela abantu uMbuso wezulu! Lina kalingeni kuwo njalo labazama ukungena liyabavimbela.+ 14 *——
15 “Maye kini babhali labaFarisi, bazenzisi,+ ngoba lidabula ilizwe lolwandle lizama ukwenza umuntu oyedwa aphendukele okholweni lwesiJuda,* kuthi nxa esenze njalo, limenze afanelwe yiGehena* ukwedlula lina.
16 “Maye kini bakhokheli abayiziphofu+ elithi, ‘Nxa umuntu angafunga ngethempeli akulandaba kodwa nxa angafunga ngegolide elisethempelini ulomlandu wokugcwalisa isifungo sakhe.’+ 17 Zithutha eziyiziphofu! Kanti okuqakatheke kakhulu ligolide kumbe lithempeli elenza igolide lelo libe ngcwele? 18 Phezu kwalokho lithi, ‘Nxa umuntu angafunga nge-alithare akulandaba kodwa nxa angafunga ngesipho esiphezu kwe-alithare ulomlandu wokugcwalisa isifungo sakhe.’ 19 Lina ziphofu! Kanti okuqakatheke kakhulu yisipho kumbe li-alithare elenza isipho leso sibe ngcwele? 20 Ngakho loba ngubani ofunga nge-alithare uyabe efunga ngalo langezinto zonke ezikulo, 21 futhi loba ngubani ofunga ngethempeli uyabe efunga ngalo langoNkulunkulu ohlala kulo.+ 22 Kanti njalo loba ngubani ofunga ngezulu uyabe efunga ngesihlalo sobukhosi sikaNkulunkulu langaye ohlezi kuso.
23 “Maye kini babhali labaFarisi, bazenzisi, ngoba linikela okwetshumi kweminti, ledili kanye lekhumini*+ kodwa alizihluphi ngezindaba eziqakathekileyo zoMthetho eziphathelane lokwahlulela okuhle,+ ukuba lesihawu+ kanye lokuthembeka! Bekufanele sibili linikele okwetshumi, kodwa lalokhu okunye bekumele likuqakathekise.+ 24 Bakhokheli abayiziphofu,+ likhipha iminyane+ enkomitshini kodwa lihubule ikamela!+
25 “Maye kini babhali labaFarisi, bazenzisi, ngoba ligezisa ingaphandle yenkomitsho leyomganu+ kodwa ngaphakathi ligcwele ubuhwaba+ lokubuswa yinkanuko!+ 26 Wena mFarisi oyisiphofu, qala ugezise ingaphakathi yenkomitsho leyomganu ukuze lengaphandle ihlanzeke.
27 “Maye kini babhali labaFarisi, bazenzisi,+ ngoba lizifananela lamangcwaba apendwe aba mhlophe nke.+ Akhanya emahle ngaphandle kodwa phakathi agcwele amathambo abantu abafileyo lakho konke ukungcola! 28 Lani ngaphandle libonakala lilungile ebantwini, kodwa ngaphakathi ligcwele ububi* lobuzenzisi.+
29 “Maye kini babhali labaFarisi, bazenzisi,+ ngoba lakha amangcwaba abaphrofethi licecise lamathuna abalungileyo!+ 30 Kanti njalo lithi, ‘Ngabe saphila ngensuku zabokhokho bethu, sasingeke sibancedise ukubulala abaphrofethi.’ 31 Ngakho liyazifakazela ukuthi lingamadodana alabo ababulala abaphrofethi.+ 32 Qedisani-ke imisebenzi eyaqaliswa ngokhokho benu.*
33 “Zinyoka, bantwana bamabululu!+ Lizakubalekela njani ukwahlulelwa lokuphoselwa eGehena?*+ 34 Ngenxa yalokho elikwenzayo, ngilithumela abaphrofethi+ lamadoda ahlakaniphileyo kanye labantu abazalifundisa.+ Abanye lizababulala+ libalengise ezigodweni, abanye libabhaxabule+ emasinagogeni enu futhi libazingele idolobho ngedolobho libahlukuluza.+ 35 Yikho igazi labo bonke abalungileyo ababulawayo emhlabeni lizakuba phezu kwenu, kusukela egazini lika-Abela+ owayelungile kuze kuyefika kwelikaZakhariya indodana kaBherekhiya, elambulalela phakathi laphakathi kwethempeli le-alithare.+ 36 Ngiqinisile ngithi kini, isizukulwane lesi sizakwehlelwa yizinto zonke lezi.
37 “Jerusalema Jerusalema, mbulali wabaphrofethi! Wena obakhanda ngamatshe labo abathunywe kuwe.+ Kunini ngifuna ukubuthela abantwabakho ndawonye njengesikhukhukazi sibuthela amatsiyane aso ngaphansi kwamaphiko aso! Kodwa wena awuvumanga.+ 38 Khangelani manje! Indlu yenu isideliwe yatshiyelwa lina.*+ 39 Ngilitshela ukuthi alisoze lingibone futhi, kusukela khathesi kuze kube yilapho lisithi, ‘Ubusisiwe lowo oza ngebizo likaJehova!’”*+