UHezekheli

38 Ilizwi likaJehova laphinda lafika kimi lathi: 2 “Ndodana yomuntu, tshibilika ukhangele kuGogi waselizweni laseMagogi,+ indunankulu yeMeshekhi leThubhali,+ uphrofethe ngaye+ 3 uthi, ‘Nanku okutshiwo yiNkosi Enkulu uJehova: “Ngizakulwa lawe wena Gogi, ndunankulu yeMeshekhi leThubhali. 4 Ngizakuphendukisa ngikufake amawuka emihlathini.+ Ngizakukhipha wena lalo lonke ibutho lakho,+ lamabhiza akho kanye labagadi bawo. Bazabe begqoke baceca futhi belixuku elikhulu, bethwele amahawu amakhulu lamancane* njalo bonke behlome ngezinkemba. 5 AbePhesiya labeTopiya labePhuthi+ bamanyene labo. Bonke bathwele amahawu amancane* bagqoka lezingwane zempi. 6 IGomeri layo ikhona kanye lawo wonke amabutho ayo, labendlu kaThogama+ abavela ezindaweni ezikhatshana kakhulu ezisenyakatho belamabutho abo. Zinengi kakhulu izizwe ezilawe.+

7 “‘“Lungela impi, lungiselela ukuhlasela wena lawo wonke amabutho olawo. Uzakuba ngumkhokheli wawo.

8 “‘“Ngemva kwensuku ezinengi uzabizwa, besekusithi ngeminyaka yokucina uhlasele ilizwe elilabantu abakhululwayo ngemva kokuhlaselwa ngenkemba, basebeqoqwa bevela ezizweni ezinengi balethwa ezintabeni zako-Israyeli ezasezilesikhathi eside zingamanxiwa. Abantu abahlala elizweni leli baphenduka bevela ezizweni ababekuzo njalo bonke bahlezi kuhle bevikelekile.+ 9 Wena lamabutho akho wonke lezizwe ezinengi ezikusekelayo lizabahlasela angathi yisiphepho, ligubuzele ilizwe njengamayezi.”’

10 “Nanku okutshiwo yiNkosi Enkulu uJehova: ‘Mhlalokho uzabumba amacebo enhliziyweni yakho uphume leqhinga elibi. 11 Uzakuthi: “Ngizahlasela ilizwe elilemizi engavikelekanga,+ ngilwe labantu abahlezi kuhle bengesabi lutho, bonke abahlala ezigabeni ezingabiyelwanga ngemiduli lezingelamigoqo lamagedi.” 12 Uzabe uhlose ukubutha impahla enengi lokuhlasela izindawo ezadilizwayo kodwa esezihlala abantu+ abaqoqwe bevela ezizweni ezitshiyeneyo.+ Abantu laba balokhu besiba lenotho lempahla enengi+ futhi bahlala phakathi laphakathi komhlaba.

13 “‘AbaseShebha+ laseDedani+ kanye labathengisi beThashishi+ lawo wonke amabutho abo bazakuthi kuwe: “Okwenza uhlasele ilizwe yikuthi ufuna ukuthola impahla enengi yini? Uqoqe amabutho akho ukuze uyethumba isiliva legolide lempahla yabo lakho konke abalakho? Ufuna ukubutha yonke impahla abalayo yini?”’

14 “Ngakho phrofetha ndodana yomuntu uthi kuGogi, ‘Nanku okutshiwo yiNkosi Enkulu uJehova: “Ngalelolanga uzakwazi sibili ukuthi abantu bami bako-Israyeli bahlezi kuhle lokuthi bavikelekile.+ 15 Uzakuza uvela endaweni yakho, khatshana khonale enyakatho+ ulezizwe ezinengi. Uzabe ulabantu abanengi futhi bonke bazabe begade amabhiza belibutho elikhulu.+ 16 Uzahlasela abantu bami bako-Israyeli angathi ngamayezi agubuzele ilizwe. Ngensuku zokucina ngizakuletha elizweni lami ukuthi uzolihlasela.+ Ngalesosikhathi izizwe zizakwazi ukuthi mina ngingcwele nxa sezibone lokho engizakwenza kuwe Gogi.”’+

17 “Nanku okutshiwo yiNkosi Enkulu uJehova: ‘Angizange ngikhulume ngawe yini ngensuku zakudala ngisebenzisa izinceku zami, abaphrofethi bako-Israyeli? Baphrofetha okweminyaka eminengi ukuthi uzamelana labo ubahlasele.’

18 “‘Ngelanga lapho uGogi azahlasela khona ilizwe lako-Israyeli, ngizavuka ngolaka olwesabekayo,’+ kutsho iNkosi Enkulu uJehova. 19 ‘Ngizakhuluma ngithukuthele ngolaka oluvutha njengomlilo. Mhlalokho kuzakuba lokuzamazama komhlaba okukhulu elizweni lako-Israyeli. 20 Inhlanzi zaselwandle, lenyoni eziphapha emoyeni, lezinyamazana zeganga, lazo zonke izinanakazana ezihamba phansi kanye labo bonke abantu abasemhlabeni, bazakwesaba bathuthumele ngenxa yami. Kuzadilika izintaba+ lamawa layo yonke imiduli.’

21 “‘Ngizavusela uGogi impi kuzo zonke izintaba zami,’ kutsho iNkosi Enkulu uJehova. ‘Indoda ngayinye izahlasela umfowabo ngenkemba.+ 22 Ngizamjezisa ngesifo+ ngibulale abantu abanengi. Ngizakwenza ukuthi kune izulu elikhulu futhi ngizakwehlisela isiqhotho+ lomlilo+ lesalufa+ phezu kwakhe lamabutho akhe lakuzo zonke izizwe ezilaye.+ 23 Ngizazikhazimulisa sibili, ngenze zonke izizwe zingazi, zazi lokuthi ngingcwele. Lapho-ke abantu bazakwazi ukuthi mina nginguJehova.’