IVangeli Elabhalwa NguMathewu
26 UJesu uthe eseqedile ukukhuluma konke lokhu wathi kubafundi bakhe: 2 “Liyakwazi ukuthi ngemva kwamalanga amabili kuzakuba liPhasika+ njalo iNdodana yomuntu izanikelwa ibisibulawa ngokubethelwa esigodweni.”+
3 Ngalesosikhathi abaphristi abakhokhelayo labadala besizwe babuthana egumeni lomphristi omkhulu okwakuthiwa nguKhayifasi,+ 4 babumba icebo+ lokubamba* uJesu ngobuqili ukuze bambulale. 5 Kodwa babesithi: “Akumelanga sikwenze emkhosini ngoba abantu bangavuka ngolaka kube lokuxokozela.”
6 UJesu wathi eseBhethani endlini kaSimoni owayeke waba lobulephero,+ 7 walandwa ngowesifazana owayelembodlela ye-alabhasta eyayilamafutha adulayo anukelelayo, waseqalisa ukuwathela ekhanda likaJesu ngesikhathi uJesu esidla. 8 Abafundi bathe bekubona lokhu bacaphuka bathi: “Kanti amafutha la adlaliselwani? 9 Phela abengathengiswa ngemali enengi ibisiphiwa abayanga.” 10 UJesu wakwazi ababekhuluma ngakho, wasesithi kubo: “Kanti limhluphelani owesifazana lo? Ungenzele into enhle kakhulu. 11 Abayanga lihlala lilabo+ kodwa mina alisoze lihlale lilami.+ 12 Uthele amafutha la anukelelayo emzimbeni wami elungiselela ukungcwatshwa kwami.+ 13 Ngiqinisile ngithi kini, loba ngaphi lapho izindaba lezi ezinhle ezizatshunyayelwa khona emhlabeni wonke, kuzakhulunywa ngokwenziwe ngowesifazana lo, ahlale ekhunjulwa ngakho.”+
14 Kusenjalo omunye wabaliTshumi Lambili okwakuthiwa nguJudasi Iskariyothi,+ waya kubaphristi abakhokhelayo+ 15 wathi kubo: “Lizangiphani ngingamthengisa kini?”+ Basebemthembisa inhlamvu zesiliva ezingu-30.+ 16 Ngakho kusukela lapho wayesehlala edinga ithuba elihle lokumthengisa.
17 Ngelanga lokuqala loMkhosi Wesinkwa Esingelamvubelo+ abafundi balanda uJesu bathi: “Yiphi indawo esingayilungisa ukuze udlele khona iPhasika?”+ 18 Wathi kubo: “Ngenani edolobheni liye kusibanibani lithi kuye, ‘UMfundisi uthi: “Isikhathi sami esibekiweyo sesizafika, mina labafundi bami sizalidlela emzini wakho iPhasika.”’” 19 Lakanye abafundi benza konke ababekutshelwe nguJesu, balungiselela iPhasika.
20 Kwathi sekuntambama+ wahlala etafuleni labafundi bakhe abangu-12.+ 21 Bathi besadla wathi kubo: “Ngiqinisile ngithi kini, omunye wenu uzangithengisa.”+ 22 Bonke bakhathazeka kakhulu, ngamunye wabo wathi kuye: “Nkosi, ayisimi angithi?” 23 Waphendula wathi: “Otsheba lami emganwini nguye ozangithengisa.+ 24 INdodana yomuntu izalitshiya* sibili njengoba kubhaliwe ngayo. Kodwa maye+ kulowo ozathengisa iNdodana yomuntu!+ Bekungaba ngcono kuye aluba kazalwanga.”+ 25 UJudasi owayesezamthengisa waphendula wathi: “Kambe yimi Rabi?” UJesu wathi kuye: “Kunjengoba nje usitsho.”
26 Bathi belokhu besidla, uJesu wathatha isinkwa. Ngemva kokuthandaza* wasihlephuna+ wasesinika abafundi bakhe, wathi: “Thathani lidle. Lokhu kumela umzimba wami.”+ 27 Wasethatha inkomitsho wabonga uNkulunkulu, wabapha esithi: “Nathani kuyo lonke+ 28 ngoba lokhu kumela ‘igazi lami+ lesivumelwano’+ elizachithwa ngenxa yabanengi+ ukuze bathethelelwe izono.+ 29 Kodwa ngithi kini: Angisoze ngiphinde nginathe iwayini elenziwe ngamagilebisi, kuze kube lilanga lapho engizanatha lani iwayini elitsha eMbusweni kaBaba.”+ 30 Ekucineni bahlabela izingoma zokudumisa,* basebephuma baya entabeni yama-oliva.+
31 UJesu wathi kubo: “Lonke lizakhubeka ngenxa yami ngalobubusuku ngoba kubhaliwe ukuthi: ‘Ngizatshaya umelusi izimvu ezisemhlambini zisabalale zigcwale indawo yonke.’+ 32 Kodwa nxa sengivusiwe ngizakuya eGalile, lizangithola khonale.”+ 33 UPhetro wamphendula wathi: “Lanxa bonke abanye bengakhubeka ngenxa yakho, mina angisoze ngafa ngakhubeka!”+ 34 UJesu wathi kuye: “Ngiqinisile ngithi kuwe, ngalobubusuku iqhude lingakakhali, uzabe usungiphike kathathu.”+ 35 UPhetro wathi kuye: “Lanxa sekumele ngife lawe, angisoze ngikuphike loba sekutheni.”+ Labanye bonke abafundi batsho njalo.
36 Ngemva kwalokho uJesu wafika labafundi bakhe endaweni okuthiwa yiGetsemane.+ Sebelapho wathi kubo: “Hlalani lapha ngisake ngiyethandaza laphana.”+ 37 Wathatha uPhetro lamadodana kaZebhedi amabili wahamba labo. Waqalisa ukukhathazeka kakhulu, wadabuka enhliziyweni.+ 38 Wasesithi kubo: “Inhliziyo yami ibuhlungu kakhulu kuthi ngife. Salani lapha, lilinde* kanye lami.”+ 39 Wasesiya phambidlana wazilahla phansi wathi mbo ngobuso, wathandaza+ esithi: “Baba, nxa kungenzeka vumela inkomitsho le+ yedlule kimi. Kodwa akwenzakale intando yakho hatshi eyami.”+
40 Wabuyela kubafundi bakhe wabathola belele, wasesithi kuPhetro: “Kambe uswele amandla okuthi uhlale ulindile* kanye lami okwehora elilodwa nje?+ 41 Hlalani lilindile*+ futhi likhuleka+ ukuze lingangeni ekulingweni.+ Umoya uyafisa* sibili kodwa umzimba ubuthakathaka.”*+ 42 Waphinda wayathandaza okwesibili esithi: “Baba, nxa kungeke kwenzakale ukuthi inkomitsho le yedlule kimi ngingayinathanga, intando yakho kayenziwe.”+ 43 Wathi ephenduka okwesibili wabathola belele ngoba babephethwe yibuthongo. 44 Waphinda wabatshiya wayathandaza okwesithathu, elokhu esitsho into efananayo. 45 Wasephenduka kubafundi bakhe wathi kubo: “Kambe lingalala liphumule ngesikhathi esinje? Ihora lokuthi iNdodana yomuntu inikelwe* ezandleni zezoni seliseduze. 46 Sukumani sihambe. Umthengisi wami usesondele!” 47 Uthe esakhuluma kwafika uJudasi omunye wabaliTshumi Lambili, elabantu abanengi ababethwele izinkemba lezinduku. Babethunywe ngabaphristi abakhokhelayo labadala besizwe.+
48 Umthengisi wakhe wayebaphe isibonakaliso wathi: “Lowo engizamqabuza nguye, limthathe limbophe.” 49 Ngakho waqonda kuJesu wathi kuye: “Sabona Rabi!” wasemqabuza. 50 Kodwa uJesu wathi kuye: “Ndoda ulandeni lapha?”+ Basebesondela kuJesu bambamba bambopha. 51 Kodwa omunye walabo ababeloJesu wabamba inkemba yakhe wayihwatsha, wagalela inceku yomphristi omkhulu wayijuqula indlebe.+ 52 UJesu wasesithi kuye: “Buyisela inkemba yakho endaweni yayo+ ngoba bonke abasebenzisa inkemba bazakufa ngenkemba.+ 53 Kambe ucabanga ukuthi ngingehluleka ukucela kuBaba ukuthi angithumele khathesi izingilosi eziyizinkulungwane?*+ 54 Manje nxa ngingenza njalo, izagcwaliseka njani iMibhalo ethi lokhu kufanele kwenzakale?” 55 UJesu wasesithi ebantwini: “Kambe lilande ukuzongibopha lithwele izinkemba lezinduku angani ngiyisigebenga? Bengijayele ukuhlala ethempelini nsuku zonke ngifundisa+ kodwa alizange lingibophe.+ 56 Lanxa kunjalo, konke lokhu kwenzakele ukuze kugcwaliseke okwabhalwa ngabaphrofethi.”*+ Bonke abafundi bamtshiya babaleka.+
57 Ababebophe uJesu bamqhuba bamusa kumphristi omkhulu uKhayifasi,+ lapho ababhali labadala ababebuthene khona.+ 58 Kodwa uPhetro wayelokhu emlandela ehambela khatshana, waze wayafika egumeni lomphristi omkhulu. Uthe esengenile, wahlala lezinceku efuna ukubona ukuthi kuzakwenzakalani.+
59 ISanihedrini yonke kanye labaphristi abakhokhelayo babedinga ubufakazi bamanga ukuze babulale uJesu.+ 60 Kodwa abazange babuthole lanxa kwabuya ofakazi bamanga abanengi.+ Ngemva kwesikhathi kwafika ababili 61 bathi: “Indoda le yathi, ‘Ngiyenelisa ukudiliza ithempeli likaNkulunkulu ngilakhe ngamalanga amathathu.’”+ 62 Umphristi omkhulu wathi ekuzwa lokhu wasukuma wathi kuye: “Kanti awuphenduli? Uthini ngalokho amadoda la akumangalela ngakho?”+ 63 Kodwa uJesu waqhubeka ethule.+ Ngakho umphristi omkhulu wathi kuye: “Ngithi kuwe funga ngoNkulunkulu ophilayo ukuthi uzakhuluma iqiniso, usitshele ukuthi unguye yini uKhristu iNdodana kaNkulunkulu!”+ 64 UJesu wathi kuye: “Kunjengoba nje usitsho. Kodwa ngithi kini: Kusukela khathesi lizabona iNdodana yomuntu+ ihlezi esandleni sokudla salowo olamandla*+ njalo isiza iphezu kwamayezi.”+ 65 Umphristi omkhulu wasedabula izembatho zakhe zangaphandle esithi: “Usethuke uNkulunkulu! Sisabafunelani abanye ofakazi? Liyabona? Lani lizizwele ngezenu ethuka. 66 Manje lithini ngakho?” Baphendula bathi: “Kumele afe.”+ 67 Basebemkhafulela ebusweni,+ bamtshaya ngenqindi.+ Abanye bamtshaya ngamampama+ 68 besithi: “Phrofetha sizwe, wena Khristu. Ngubani okutshayileyo?”
69 UPhetro wayehlezi phandle egumeni, waselandwa ngenye intombazana eyincekukazi yathi: “Lawe ubuloJesu waseGalile!”+ 70 Kodwa yena waphika phambi kwabo bonke wathi: “Angikwazi ukuthi ukhuluma ngani.” 71 Wasuka waya duze kwegedi, enye intombazana yasimnanzelela yathi kulabo ababelapho: “Umuntu lo ubeloJesu umNazaretha.”+ 72 Waphinda waphika efunga, wathi: “Angiyazi indoda le!” 73 Ngemva kwesikhatshana ababemi khonapho bamlanda uPhetro bathi kuye: “Loba sekuthiwani lawe ungomunye wabo. Lolimi lwakho luyakuceba.”* 74 Kodwa waqalekisa njalo wafunga esithi: “Angiyazi indoda le!” Iqhude lahle lakhala. 75 UPhetro wasekhumbula ukuthi uJesu wayethe: “Iqhude lingakakhali, uzabe usungiphike kathathu.”+ Waphuma phandle wakhala kabuhlungu.