UHezekheli
13 Ilizwi likaJehova laphinda lafika kimi lathi: 2 “Ndodana yomuntu, phrofetha mayelana labaphrofethi bako-Israyeli+ njalo ukhulume lalabo abaphrofetha izinto abazicabangela zona*+ uthi, ‘Zwanini ilizwi likaJehova. 3 Nanku okutshiwo yiNkosi Enkulu uJehova: “Maye kubaphrofethi abayiziphukuphuku, abaphrofetha abazicabangela khona* kungelalutho abalubonileyo!+ 4 Bantu bako-Israyeli, abaphrofethi benu sebefanana lamakhanka asemanxiweni. 5 Lina baphrofethi kalisoze lihambe liyevala izikhala ezisemdulini wedolobho.+ Yikho abako-Israyeli bengasoze benelise ukuma baqine empini ngosuku lukaJehova.”+ 6 “Babona imibono yamanga futhi baphrofetha amanga besithi, ‘Nanku okutshiwo nguJehova,’ lanxa uJehova engazange abathume, njalo balindele ukuthi amazwi abo agcwaliseke.+ 7 Liyabe lingabonanga imibono yamanga yini futhi laphrofetha amanga nxa lisithi, ‘Nanku okutshiwo nguJehova,’ mina ngingatshongo lutho?”’
8 “‘Ngakho nanku okutshiwo yiNkosi Enkulu uJehova: “‘Ngizakulwa lani ngenxa yokuthi likhulume amanga labona lemibono yamanga,’ kutsho iNkosi Enkulu uJehova.”+ 9 Ngizakwelula isandla sami ngijezise abaphrofethi ababona imibono yamanga labaphrofetha amanga.+ Abasoze babekhona phakathi kwabantu engibatshela imfihlo yami njalo amabizo abo awasoze abhalwe ezincwadini zabantu bako-Israyeli futhi abasoze babuyele elizweni lako-Israyeli. Lapho-ke lizakwazi ukuthi mina ngiyiNkosi Enkulu uJehova.+ 10 Konke lokhu kubangelwa yikuthi benze abantu bami bahlanhlatha bebatshela ukuthi kulokuthula khona kungelakuthula.+ Nxa kungakhiwa umduli ongaqinanga bona bayawugudula ngekalaga.’*+
11 “Tshela labo abagudula umduli ngekalaga ukuthi umduli wabo uzadilika. Kuzabuya izulu elikhulu kukhithike amatshe esiqhotho futhi isiphepho esilamandla sizawudilizela phansi.+ 12 Nxa umduli usudilikile bazalibuza bathi, ‘Lingaphi ikalaga elagudula ngalo?’+
13 “Ngakho nanku okutshiwo yiNkosi Enkulu uJehova: ‘Ngizavuka ngolaka ngilethe isiphepho esikhulu, kune izulu elikhulu nxa sengithukuthele. Kuzakhithika amatshe esiqhotho awubhidlize umduli ngoba ngiyabe ngizondile. 14 Ngizawudilizela phansi umduli wenu elawugudula ngekalaga futhi izisekelo zawo zizasala egcekeni. Nxa idolobho lidilika, lani lizahle liphelele phakathi. Lizakwazi ukuthi mina nginguJehova.’
15 “‘Nxa sengithululele ulaka lwami phezu komduli lakulabo abawugudula ngekalaga ngizathi kini: “Umduli awusekho, lalabo abawugudulayo abasekho.+ 16 Abaphrofethi bako-Israyeli abasekho, labo ababephrofetha ngeJerusalema futhi bebona imibono yokuthi kulokuthula kuyo khona kungelakuthula,”’+ kutsho iNkosi Enkulu uJehova.
17 “Kodwa khathesi ndodana yomuntu, khuluma lamadodakazi abantu bakini aphrofetha izinto azicabangela zona, uphrofethe mayelana lawo. 18 Watshele uthi, ‘Nanku okutshiwo yiNkosi Enkulu uJehova: “Maye kwabesifazana abathunga imigqizo yengalo zonke,* benze lamaveyili alingana wonke umuntu ukuze bazingele impilo zabantu. Kambe lizingela abantu bami lizama ukuvikela ezenu impilo? 19 Kambe selingaze lingidelele phakathi kwabantu bami ukuze lithole imvuthu zesinkwa lebhali egcwala isandla nje kuphela?+ Libulala abantu okungamelanga bafe litshiye labo okumele babulawe, ngoba liqambela abantu bami amanga futhi bayawalalela amanga enu.”’+
20 “Ngakho nanku okutshiwo yiNkosi Enkulu uJehova: ‘Ngiyayizonda imigqizo yenu lina bomama, elithiya ngayo abantu angathi lithiya inyoni. Ngizayiqamula engalweni zenu ngikhulule labo elibathiya angathi zinyoni. 21 Ngizadabula amaveyili enu ngikhulule abantu bami esandleni senu futhi alisoze libazingele libabambe. Lapho-ke lizakwazi ukuthi mina nginguJehova.+ 22 Lidanise umuntu olungileyo ngamanga enu+ lanxa mina bengingafuni ukumenza ahlupheke, njalo lisekele umuntu omubi+ lamenza wangatshiyi izenzo zakhe ezimbi, yikho engasoze aqhubeke ephila.+ 23 Ngakho lina bomama alisoze liphinde libone imibono yamanga loba lihlahlule.+ Ngizakhulula abantu bami esandleni senu njalo lizakwazi ukuthi mina nginguJehova.’”