UHezekheli
43 Indoda engayibona embonweni yangithatha yangisa egedini elikhangele empumalanga.+ 2 Sengilapho ngabona inkazimulo kaNkulunkulu ka-Israyeli isiza ivela empumalanga.+ Ilizwi lakhe lalinjengomsindo wamanzi ahubayo+ futhi umhlaba wakhazimula ngenxa yenkazimulo yakhe.+ 3 Engakubonayo kwakunjengalokho engakubona embonweni ngesikhathi ngisiyatshabalalisa* idolobho njalo kwakukhanya angathi yilokho engakubona ngiseduze komfula uKhebhari.+ Ngazilahla phansi ngathi mbo ngobuso emhlabathini.
4 Inkazimulo kaJehova yasingena ethempelini* ngegedi elikhangele empumalanga.+ 5 Ngemva kwalokho umoya wangiphakamisa wangisa egumeni elingaphakathi. Ngabona ukuthi ithempeli lonke laseligcwele inkazimulo kaJehova.+ 6 Ngasengisizwa umuntu ekhuluma lami ephakathi kwethempeli, indoda engayibona embonweni yasibuya yazokuma eceleni kwami,+ 7 yathi kimi:
“Ndodana yomuntu, le yiyo indawo yesihlalo sami sobukhosi+ lendawo engizabeka kuyo inyawo zami.+ Lapha yikho engizahlala khona phakathi kwabantu bako-Israyeli kuze kube nini lanini.+ Abantu bako-Israyeli kanye lamakhosi abo abasoze baphinde balingcolise ibizo lami elingcwele+ ngokukhonza abanye* onkulunkulu langezidumbu zamakhosi abo. 8 Babengcolisa ibizo lami elingcwele ngezinto ezenyanyekayo ababezenza. Bafaka umnyango wethempeli labo eceleni komnyango wethempeli lami, lemigubazi yethempeli labo eceleni kwemigubazi yethempeli lami, mina labo sehlukaniswa ngumduli nje kuphela.+ Yikho ngabathukuthelela ngabatshabalalisa.+ 9 Khathesi kabayekele ukukhonza abanye* onkulunkulu futhi kabalahlele izidumbu zamakhosi abo khatshana lami. Lapho-ke ngizahlala phakathi kwabo kuze kube nini lanini.+
10 “Kodwa wena ndodana yomuntu, chasisela abantu bako-Israyeli ukuthi ithempeli limi njani+ ukuze bayangeke ngenxa yezono zabo.+ Kumele bahlolisise umdwebo walo. 11 Nxa bangayangeka ngakho konke ababekwenza kumele ubatshengise umdwebo wethempeli, lokuma kwalo, leminyango yalo lamagedi alo.+ Batshengise wonke umdwebo walo lezimiso zalo lemithetho yalo. Konke lokhu kumele ukubhale phansi phambi kwabo ukuze bawuhlolisise wonke umdwebo wethempeli, balandele izimiso zalo.+ 12 Nanku umthetho wethempeli: Yonke indawo ephezu kwentaba ingcwele kakhulu.+ Lo yiwo umthetho wethempeli.
13 “Nanzi izilinganiso ze-alithare kusetshenziswa isilinganiso sengalo+ (engalweni eyodwa kungezelelwe ububanzi beminwe emine nxa ihlangene).* Isisekelo salo siyingalo eyodwa ukuya phezulu lengalo eyodwa ububanzi. Isisekelo lesi silomphetho emaceleni wonke, ububanzi bawo bulingana lobubanzi besandla.* Lesi yisisekelo se-alithare. 14 Ukusuka esisekelweni se-alithare usiyafika esitubhini sokuqala zingalo ezimbili futhi isitubhu lesi siyingalo eyodwa ububanzi. Ukusuka esitubhini esincane usiya ekucineni kwesitubhu esikhulu zingalo ezine njalo ububanzi besitubhu lesi esikhulu yingalo eyodwa. 15 Iziko le-alithare lizingalo ezine ukuya phezulu futhi phezu kwalo kulempondo ezine.+ 16 Iziko le-alithare lilamacele amane alinganayo. Lizingalo ezingu-12 ubude lezingu-12 ububanzi.+ 17 Amacele amane esitubhu azingalo ezingu-14 ubude lezingu-14 ububanzi. Umphetho ogombolozele i-alithare uyingxenye yengalo ububanzi futhi isisekelo salo siyingalo eyodwa emaceleni wonke.
“Amasitephisi e-alithare akhangele empumalanga.”
18 Indoda engayibona embonweni yathi kimi, “Ndodana yomuntu, nanku okutshiwo yiNkosi Enkulu uJehova: ‘Lokhu yikho okumele kulandelwe nxa kusakhiwa i-alithare ukuze kwenziwe iminikelo yokutshiswa egcweleyo, kuchelwe legazi phezu kwalo.’+
19 “‘Kumele uthathe ijongosi emhlambini elizakuba ngumnikelo wesono,+ uliphe abaphristi abangamaLevi abosendo lukaZadokhi+ abasondela duze kwami bezongikhonza,’ kutsho iNkosi Enkulu uJehova. 20 ‘Kumele uthathe elinye igazi lalo ulifake empondweni ze-alithare ezine, lasemakhoneni amane ezitubhu lasemphethweni ogombolozele i-alithare ukuze uhlambulule i-alithare esonweni njalo ulihlawulele.+ 21 Ngemva kwalokho kumele uthathe ijongosi elizakuba ngumnikelo wesono, uyelitshisa endaweni ekhethiweyo ethempelini phandle kwendawo engcwele.+ 22 Ngelanga lesibili uzanikela ngembuzi enduna engelasici ibe ngumnikelo wesono. Bazahlambulula i-alithare esonweni njengoba nje belihlambulule esonweni besebenzisa ijongosi.’
23 “‘Nxa usuqedile ukuhlambulula i-alithare esonweni, uzanikela ngejongosi elingelasici olithethe emhlambini. Uzaphinda unikele ngenqama engelasici oyithethe emhlambini. 24 Iminikelo le kumele uyilethe kuJehova. Abaphristi kumele bayivuvuzele isawudo+ besebeyinikela kuJehova ibe ngumnikelo wokutshiswa ogcweleyo. 25 Okwamalanga ayisikhombisa uzanikela ngembuzi enduna nsuku zonke, ibe ngumnikelo wesono.+ Uzanikela langejongosi olithethe emhlambini langenqama oyithethe emhlambini. Kumele unikele ngezifuyo ezingelasici. 26 Okwamalanga ayisikhombisa bazahlawulela i-alithare futhi kumele balihlambulule balenze lifanele ukusetshenziswa. 27 Nxa amalanga lawo esephelile, ngelanga lesi-8+ kusiya phambili abaphristi bazanikela e-alithareni iminikelo yenu yokutshiswa lemihlatshelo yobudlelwano njalo mina ngizathokoza ngani,’+ kutsho iNkosi Enkulu uJehova.”