U-Isaya
63 Ngubani lo ovela ko-Edomi,+
Ovela eBhozira+ egqoke izembatho ezilemibalabala,*
Olezigqoko ezinhle kakhulu,
Omatsha ngamandla amakhulu?
“Yimi kanye engikhuluma ngokulunga,
Lowo olamandla amakhulu okusindisa.”
2 Kungani izigqoko zakho zibomvu?
Kungani izembatho zakho zinjengezalowo ovoxa amagilebisi esikhamelweni sewayini?*+
3 “Nginyathenyathele okusegodini lokukhamela amagilebisi ngingedwa.
Kakho loyedwa obelami.
Bengilokhu ngibagxobagxoba ngizondile,
Ngaqhubeka ngibavoxavoxa ngolaka lwami.+
Izembatho zami zachaphakelwa ligazi labo,
Konke engikugqokileyo sekungcolile.
4 Usuku lokuphindisela lusenhliziyweni yami,+
Umnyaka wabahlengiweyo bami usufikile.
5 Ngakhangela kodwa kwakungelamuntu owayenganceda,
Kwangimangalisa ukuthi kakho owayefuna ukuncedisa.
6 Ngagxobagxoba izizwe ngizondile,
Ngazenza zadakwa ngolaka lwami,+
Ngathululela igazi lazo emhlabathini.”
7 Ngizakhuluma ngezenzo zikaJehova zothando oluqotho,
Izenzo okumele uJehova adunyiswe ngazo,
Ngenxa yakho konke uJehova asenzele khona,+
Izinto ezinengi ezinhle azenzele abendlu ka-Israyeli,
Ngenxa yesihawu sakhe lothando lwakhe oluqotho.*
8 Wathi: “Ngeqiniso bangabantu bami, amadodana azahlala eqotho.”*+
Yikho waba nguMsindisi wabo.+
9 Kulo lonke usizi lwabo, laye waba losizi.+
Isithunywa sakhe sabasindisa.*+
Wabahlenga ngenxa yothando lwakhe lozwelo lwakhe,+
Wabaphakamisa wabathwala kuzo zonke izinsuku zakudala.+
10 Kodwa bahlamuka,+ badabukisa* umoya wakhe ongcwele.+
11 Basebekhumbula izinsuku zakudala,
Insuku zenceku yakhe uMosi, bathi:
“Ungaphi lowo owabachaphisa elwandle+ kanye labelusi bomhlambi wakhe?+
Ungaphi lowo owafaka umoya wakhe ongcwele kuye,+
12 Owenza ukuthi ingalo yakhe ekhazimulayo iphelekezele isandla sokudla sikaMosi,+
Wehlukanisa amanzi phambi kwabo+
Ukuze azenzele ibizo laphakade?+
13 Ungaphi lowo owabenza badabula ezinzikini zamanzi,
Bahamba bengakhubeki,
Njengebhiza elihamba endaweni eligceke?*
14 Umoya kaJehova wabenza baphumula+
Njengezifuyo ezehlela emagcekeni.”
15 Khangela phansi usezulwini ubone,
Khangela usendaweni yakho ephakemeyo, engcwele lekhazimulayo.*
Kungaphi ukutshiseka kwakho lamandla akho?
Lungaphi uzwelo* lwakho+ lesihawu sakho?+
Konke ngikufihlelwe.
16 Wena unguBaba wethu;+
Lanxa kungenzakala ukuthi u-Abrahama angasazi
Lo-Israyeli angasinanzeleli,
Wena Jehova unguBaba wethu.
Kusukela kudala ubulokhu ubizwa ngokuthi unguMhlengi wethu.+
17 Awu Jehova, kungani uvumela ukuthi siphambuke* ezindleleni zakho?
Kungani uvumela ukuthi inhliziyo zethu zibe lukhuni, sicine singasakwesabi?+
Phenduka ubuye ngenxa yezinceku zakho,
Izizwana ezililifa lakho.+
18 Ilizwe laba ngelabantu bakho abangcwele okwesikhatshana.
Izitha zethu sezinyathenyathele indawo yakho engcwele.+
19 Sesilesikhathi eside sinjengabantu ongakaze ubabuse,
Lanjengabantu abangakaze babizwe ngebizo lakho.