Eyesibili EyamaKhosi
20 Ngalezonsuku uHezekhiya wagula wabangwa lezibi.+ Umphrofethi u-Isaya indodana ka-Amozi wasefika kuye wamtshela wathi: “UJehova uthi, ‘Layezela abemuli yakho* ngoba awusoze usile, uzakufa.’”+ 2 UHezekhiya wathi ekuzwa lokho watshibilika wakhangela emdulini wasekhuleka kuJehova wathi: 3 “Awu Jehova, ngiyakuncenga, ngicela ukhumbule ukuthi bengihamba phambi kwakho ngenhliziyo yami yonke futhi ngithembekile, ngisenza okuhle phambi kwakho.”+ UHezekhiya wasekhala kabuhlungu.
4 U-Isaya wathi engakafiki lasegumeni elingaphakathi ilizwi likaJehova lafika kuye lathi:+ 5 “Buyela uyetshela uHezekhiya umkhokheli wabantu bami uthi, ‘Nanku okutshiwo nguJehova uNkulunkulu kakhokho wakho uDavida: “Ngiwuzwile umthandazo wakho, lenyembezi zakho ngizibonile.+ Ngakho ngizakusilisa.+ Ngelanga lesithathu uzakuya endlini kaJehova.+ 6 Ngizakwengezelela iminyaka engu-15 empilweni yakho* njalo ngizakukhulula wena ledolobho leli esandleni senkosi ye-Asiriya.+ Ngizalilwela idolobho leli ngenxa yebizo lami langenxa kaDavida inceku yami.”’”+
7 U-Isaya wasesithi: “Lethani ikhekhe elenziwe ngamakhiwane awonyisiweyo.” Ngakho baliletha basebelininda phezu kwethumba. Ngemva kwalokho uHezekhiya wasila kancane kancane.+
8 UHezekhiya wayebuze u-Isaya wathi: “Ngizabona ngani+ ukuthi uJehova uzangisilisa lokuthi ngosuku lwesithathu ngizakuya endlini kaJehova?” 9 U-Isaya waphendula wathi: “Nansi isibonakaliso esivela kuJehova esizakutshengisa ukuthi uJehova uzakwenza lokho akukhulumileyo: Ukhetha ukuthi umthunzi osemasitephisini* uye phambili ngamasitephisi alitshumi kumbe ubuyele emuva ngamasitephisi alitshumi?”+ 10 UHezekhiya wathi: “Kulula ukuthi umthunzi uye phambili ngamasitephisi alitshumi kulokuthi ubuyele emuva ngamasitephisi alitshumi.” 11 Ngakho umphrofethi u-Isaya wathandaza kuJehova. UNkulunkulu wenza umthunzi owawusemasitephisini ka-Ahazi wabuyela emuva ngamasitephisi alitshumi owawusudlule kuwo.+
12 Ngalesosikhathi inkosi yeBhabhiloni uBherodakhi-bhaladani indodana kaBhaladani yathumela izincwadi lesipho kuHezekhiya ngoba yayizwile ukuthi wayegula.+ 13 UHezekhiya wazemukela kuhle* izithunywa wasezitshengisa konke okwakusendlini okwakugcinelwa kuyo inotho yakhe.+ Wazitshengisa isiliva, legolide, lamafutha ebhalisamu lamanye amafutha aligugu, lezikhali zakhe kanye lakho konke okwakutholakala enothweni yakhe. Akulalutho uHezekhiya angazange azitshengise lona endlini yakhe* lasembusweni wakhe wonke.
14 Ngemva kwalokho umphrofethi u-Isaya wafika enkosini uHezekhiya wayibuza wathi: “Abantu laba batheni futhi bebevela ngaphi?” UHezekhiya wathi: “Bebevela khatshana khonale elizweni laseBhabhiloni.”+ 15 U-Isaya wasebuza wathi: “Baboneni endlini yakho?”* UHezekhiya waphendula wathi: “Babone konke okusendlini yami.* Akulalutho engingazange ngibatshengise lona kuyo yonke inotho yami.”
16 U-Isaya wasesithi kuHezekhiya: “Zwana ilizwi elivela kuJehova,+ 17 ‘Ziyeza insuku lapho okuzathathwa khona konke okusendlini yakho* lakho konke okwabuthelelwa ngokhokho bakho kuze kube lamuhla. Kuzahanjiswa eBhabhiloni,+ akulalutho oluzasala,’ kutsho uJehova. 18 ‘Amanye amadodana ozakuba lawo azathathwa+ ayekuba yiziphathamandla esigodlweni senkosi yeBhabhiloni.’”+
19 UHezekhiya wasesithi ku-Isaya: “Ilizwi likaJehova olikhulumileyo lilungile.”+ Waqhubeka wathi: “Nxa kuzakuba lokuthula lokuhlaliseka* ngesikhathi ngisaphila* kuyabe kulungile.”+
20 Yonke imbali kaHezekhiya, lobuqhawe bakhe, lokwenza kwakhe ichibi+ kanye lomgelo owawuletha amanzi edolobheni,+ kubhaliwe ebhukwini lembali yamakhosi akoJuda. 21 UHezekhiya wafa,+ indodana yakhe uManase+ yasisiba yinkosi esikhundleni sakhe.+