Eyesibili EkaJohane

1 Mina engimdala* ngibhalela owesifazana okhethiweyo labantwabakhe engibathanda okweqiniso. Ayisimi ngedwa engibathandayo kodwa bathandwa layibo bonke asebelazi iqiniso 2 ngenxa yeqiniso esilalo lesizahlala silalo kuze kube nini lanini. 3 UNkulunkulu uBaba leNdodana yakhe uJesu Khristu bazakuba lomusa omkhulu lesihawu kithi, basenze sibe lokuthula njalo bazasithanda baphinde basifundise iqiniso.

4 Ngiyathokoza kakhulu ngoba ngithole abanye abantwabakho behamba eqinisweni+ njengoba nje uBaba wathi senze njalo. 5 Yikho-ke khathesi ngiyakucela wena wesifazana okhethiweyo ukuthi sithandane. (Angikubhaleli umlayo omutsha kodwa ngikubhalela umlayo esasilawo kusukela ekuqaleni.)+ 6 Ukuba lothando kutsho ukuthi siqhubeke silandela imilayo yakhe.+ Umlayo lo yiwo okumele liqhubeke liwulandela njengoba nje lezwa kusukela ekuqaleni. 7 Phela amaqili asemanengi emhlabeni+ futhi awavumi ukuthi uJesu Khristu weza emhlabeni engumuntu.+ Umuntu onjalo uliqili lomphikukhristu.+

8 Nanzelelani zingaliphunyuki izinto esizisebenzeleyo ukuze liwuthole wonke umvuzo.+ 9 Wonke umuntu odlulela ngale kwemfundiso kaKhristu longabambeleli kuyo kalaye uNkulunkulu.+ Lowo oqhubeka ebambelele emfundisweni le nguye oloBaba leNdodana.+ 10 Nxa umuntu angeza kini elemfundiso etshiyene lale, lingamamukeli emizini yenu+ futhi lingambingeleli 11 ngoba lowo ombingelelayo uhlanganyela laye emisebenzini yakhe emibi.

12 Lanxa ngilezinto ezinengi engifuna ukulitshela zona, angifuni ukusebenzisa iphepha le-inki kodwa ngilethemba lokuza kini ngizokhuluma lani sikhangelene ukuze intokozo yenu iphelele.

13 Abantwana bakadadewenu okhethiweyo bayakubingelela.