ImiSebenzi Yabaphostoli
18 Ngemva kwalokho wasuka e-Athene waya eKhorinte. 2 Wathola umJuda okuthiwa ngu-Akhwila+ owayedabuka ePhontusi. Wayesanda kufika evela e-Ithali lomkakhe uPrisila ngoba uKlawudiyu wayekhiphe umlayo wokuthi wonke amaJuda asuke eRoma. Ngakho uPhawuli waya kubo, 3 wahlala emzini wabo njalo wasebenza labo+ ngoba babesenza umsebenzi wokwenza amatende njengaye. 4 Wayebonisana labantu* esinagogeni+ ngamasabatha wonke+ futhi wenza amaJuda lamaGrikhi atshintsha ingqondo acina esekholwa.
5 USila+ loThimothi+ bathi sebefikile bevela eMakhedoniya, uPhawuli waqalisa ukusebenzisa isikhathi sakhe esinengi etshumayela ilizwi njalo efakaza kumaJuda ukuze atshengise ukuthi uJesu nguKhristu.+ 6 Kodwa amaJuda ayelokhu emphikisa futhi emthuka. Yikho wathintitha izembatho zakhe+ wathi kuwo: “Igazi lenu alibe phezu kwamakhanda enu.+ Mina ngimsulwa.+ Kusukela khathesi sengizakuya ebantwini bezinye izizwe.”+ 7 Yikho wasuka kuleyondawo* waya endlini yendoda okuthiwa nguThithiyu Justu. Indoda le yayikhonza uNkulunkulu futhi indlu yayo yayiseduze lesinagogi. 8 Loba kunjalo uKhrispu+ umphathi wesinagogi wakholwa eNkosini kanye labo bonke ayehlala labo. Abantu beKhorinte abanengi abalizwayo ilizwi bakholwa babhabhathizwa. 9 Kanti njalo ebusuku iNkosi yakhuluma loPhawuli embonweni yathi: “Ungesabi, qhubeka ukhuluma ungathuli 10 ngoba ngilawe+ njalo kakho ozakuhlasela akulimaze. Ngilabantu abanengi edolobheni leli.” 11 Ngakho wahlala lapho okomnyaka lenyanga eziyisithupha efundisa abantu ilizwi likaNkulunkulu.
12 Ngesikhathi uGaliyo engumbusi wesabelo* se-Akhaya, amaJuda amanyana ahlasela uPhawuli asemqhuba amusa esihlalweni sokwahlulela 13 afika athi: “Indoda le ihuga abantu ukuthi bakhonze uNkulunkulu ngendlela ephikisana lomthetho.” 14 UPhawuli wathi esezakhuluma, uGaliyo wathi kumaJuda: “MaJuda, aluba indoda le yenze into embi kumbe icala elikhulu, bengizakuba lesizatho sokuthi ngibekezele ngililalele. 15 Kodwa nxa liphikisana ngamazwi lamabizo langomthetho wenu,+ ziboneleni. Mina angifuni ukuba ngumahluleli wezinto lezo.” 16 Ngemva kwalokho wabatshela ukuthi basuke esihlalweni sokwahlulela. 17 Bonke basebebamba uSosithene+ umphathi wesinagogi, baqalisa ukumtshaya bephambi kwesihlalo sokwahlulela. Kodwa uGaliyo kazange azihluphe ngakho lokho.
18 UPhawuli wathi esehlale okwensuku ezithile, wavalelisa abazalwane waya eSiriya ngesikepe ephelekezelwa nguPrisila lo-Akhwila. Wathi eseKhenikhreya+ wagela inwele zaba zimfitshane ngenxa yesifungo ayesenzile. 19 Basebefika e-Efesu wabatshiya edolobheni, yena wangena esinagogeni wabonisana lamaJuda.+ 20 Lanxa abazalwane babelokhu bemcela ukuthi angahambi, kazange avume. 21 Wabavalelisa wathi kubo: “Ngizaphinda ngiphenduke kini nxa uJehova* ethanda.” Wasesuka e-Efesu ngomkhumbi 22 wayafika eKhesariya. Wahamba* wayabingelela ibandla, wasesiya e-Antiyokhi.+
23 Wathi esehlale okwesikhatshana e-Antiyokhi wasuka waya ezindaweni ezitshiyeneyo ezisemangweni weGalathiya leFrigiya,+ eqinisa bonke abafundi.+
24 Edolobheni le-Efesu kwafika umJuda okwakuthiwa ngu-Apholo+ owayedabuka e-Alekizandriya. Wayeyingcitshi ekukhulumeni njalo eyazi kuhle iMibhalo. 25 Wayefundiswe* indlela kaJehova* futhi wayevutha emoyeni, ekhuluma njalo efundisa izinto eziqondileyo ngoJesu kodwa esazi ubhabhathizo lukaJohane kuphela. 26 Waqalisa ukukhuluma ngesibindi esinagogeni. UPrisila lo-Akhwila+ bathi bemuzwa bamthatha bamchasisela indlela kaNkulunkulu ukuze imcacele kuhle. 27 Yena wayefuna ukuchapha aye e-Akhaya, yikho abazalwane babhalela abafundi bebacela ukuthi bamamukele kuhle. Wathi efika khonale wabancedisa kakhulu labo abasebengamakholwa ngenxa yomusa omkhulu kaNkulunkulu 28 ngoba wayekhuluma ngedlabuzane eveza egcekeni ukuthi amaJuda ayengaqondanga, ewatshengisa ngeMibhalo ukuthi uJesu nguKhristu.+