IVangeli Elabhalwa NguMathewu
19 UJesu wathi eqeda ukukhuluma izinto lezi, wasuka eGalile waya ezindaweni ezisemngceleni weJudiya ngaphetsheya kukaJodani.+ 2 Walandelwa ngabantu abanengi kakhulu, welapha abagulayo.
3 AbaFarisi basebemlanda befuna ukumlinga bafika bambuza bathi: “Kusemthethweni yini ukuthi indoda idivose umkayo ngaloba yisiphi isizatho?”+ 4 Wabaphendula wathi: “Alikaze likubale yini ukuthi owabadalayo ekuqaleni wenza owesilisa lowesifazana,+ 5 wasesithi: ‘Ngenxa yalokho indoda izatshiya uyise lonina inamathele kumkayo futhi bobabili bazakuba nyamanye’?+ 6 Yikho kabasebabili kodwa sebenyamanye. Ngakho lokho uNkulunkulu asekuhlanganisile* akungabi lomuntu okwehlukanisayo.”+ 7 Bona bathi kuye: “Pho kungani uMosi wathi indoda kumele iphe umkayo incwadi yokumdivosa imxotshe?”+ 8 UJesu wathi kubo: “UMosi walivumela ukuthi lidivose amakhosikazi enu+ ngoba lilenhliziyo ezilukhuni, kodwa kwakungenjalo ekuqaleni.+ 9 Ngithi kini, loba ngubani odivosa inkosikazi yakhe ingazange ifebe,* abesetshada lomunye umfazi, uyafeba.”+
10 Abafundi basebesithi kuye: “Nxa ukutshada kunjalo, kungcono ukungatshadi phela.” 11 Yena wathi kubo: “Ayisibo bonke abawamukelayo amazwi la kodwa amukelwa ngabalesipho kuphela.+ 12 Kulabathenwa abazalwa bevele benjalo, kube labathenwa abathenwa ngabantu, besekusiba labanye abazenze baba ngabathenwa ngenxa yoMbuso wezulu. Ongakwemukela lokho kakwemukele.”+
13 Abantu baletha abantwana abancane kuye ukuze ababeke izandla futhi abakhulekele, kodwa abafundi babakhuza.+ 14 Lanxa kunjalo uJesu wathi: “Bayekeleni abantwana abancane, lingazami ukubavimba ukuthi babuye kimi ngoba uMbuso wezulu ngowalabo abanjengabantwana.”+ 15 Wababeka izandla wasesuka wahamba.
16 Kwasekufika omunye umuntu wathi kuye: “Mfundisi, kuyini okuhle okumele ngikwenze ukuze ngizuze ukuphila okungapheliyo?”+ 17 Wathi kuye: “Kungani ubuza kimi ukuthi kuyini okuhle? Uyedwa kuphela omuhle.+ Kodwa nxa wena ufuna ukuthola ukuphila, qhubeka ulalela imilayo.”+ 18 Yena wathi kuye: “Imilayo yiphi?” UJesu wathi: “Ungabulali,+ ungafebi,*+ ungatshontshi,+ ungafakazi amanga,+ 19 hlonipha uyihlo lonyoko+ njalo uthande umakhelwane wakho ngendlela ozithanda ngayo.”+ 20 Ijaha lelo lathi kuye: “Ngiyayigcina yonke imilayo le. Pho kuyini okusasilela kimi?” 21 UJesu wathi kulo: “Nxa ufuna ukuba ngopheleleyo hamba uyethengisa impahla yakho unike abayanga, lapho-ke uzakuba lenotho ezulwini.+ Ngemva kwalokho usungabuya uzokuba ngumlandeli wami.”+ 22 Ijaha lelo lathi likuzwa lokhu lasuka lahamba lidanile ngoba lalilempahla enengi.+ 23 UJesu wasesithi kubafundi bakhe: “Ngiqinisile ngithi kini, kuzakuba nzima ukuthi umuntu onothileyo angene eMbusweni wamazulu,+ 24 njalo ngithi kini kulula ukuthi ikamela lingene esikhaleni senalithi kulokuthi umuntu onothileyo angene eMbusweni kaNkulunkulu.”+
25 Abafundi bathi besizwa lokhu bamangala kakhulu bathi: “Pho ngubani ongasindiswa?”+ 26 UJesu wabakhangela wabathi nhlo, wasesithi kubo: “Ngokubona kwabantu lokhu ngeke kwenzeke, kodwa kuNkulunkulu zonke izinto ziyenzeka.”+
27 UPhetro wasephendula wathi: “Kodwa thina sitshiye zonke izinto sakulandela. Manje sizatholani?”+ 28 UJesu wathi kubo: “Ngiqinisile ngithi kini, nxa izinto sezisenziwa zibe zintsha,* iNdodana yomuntu isihlezi esihlalweni sayo sobukhosi esikhazimulayo, lina ebelingilandela lizahlala ezihlalweni zobukhosi ezilitshumi lambili, lahlulele izizwana zako-Israyeli ezilitshumi lambili.+ 29 Kanti njalo wonke umuntu otshiye izindlu kumbe abafowabo kumbe odadewabo kumbe uyise kumbe unina kumbe abantwana kumbe amasimu ngenxa yebizo lami, uzakuphiwa sekuphindwe ka-100, aphinde athole lelifa lokuphila okungapheliyo.+
30 “Kodwa abanengi abokuqala bazakuba ngabokucina, abokucina babe ngabokuqala.+