Eyesibili EyamaKhosi
2 UJehova wathi esezaphakamisela u-Elija+ emazulwini* ngesiphepho,+ u-Elija lo-Elisha+ basuka eGiligali.+ 2 U-Elija wathi ku-Elisha: “Ngicela usale lapha ngoba uJehova ungithume eBhetheli.” Kodwa u-Elisha wathi: “Ngifunga ngoJehova uNkulunkulu ophilayo ngifunge langawe, angisoze ngehlukane lawe.” Ngakho basuka baya eBhetheli.+ 3 Amadodana abaphrofethi ayeseBhetheli aphuma aya ku-Elisha afika athi kuye: “Uyakwazi yini ukuthi lamuhla uJehova uzasusa inkosi yakho ukuthi ingasabi yinhloko yakho?”+ U-Elisha wabaphendula wathi: “Ngiyakwazi, lina thulani.”
4 U-Elija wasesithi ku-Elisha: “Ngicela usale lapha ngoba uJehova ungithume eJerikho.”+ Kodwa yena waphendula wathi: “Ngifunga ngoJehova uNkulunkulu ophilayo ngifunge langawe, angisoze ngehlukane lawe.” Ngakho baya eJerikho. 5 Amadodana abaphrofethi ayeseJerikho aya ku-Elisha afika athi kuye: “Uyakwazi yini ukuthi lamuhla uJehova uzasusa inkosi yakho ukuthi ingasabi yinhloko yakho?” Yena wathi: “Ngiyakwazi, lina thulani.”
6 U-Elija waphinda wathi ku-Elisha: “Sala lapha ngoba uJehova ungithume emfuleni uJodani.” Kodwa u-Elisha wathi: “Ngifunga ngoJehova uNkulunkulu ophilayo ngifunge langawe, angisoze ngehlukane lawe.” Yikho bahamba bonke. 7 Amadodana abaphrofethi angu-50 abalandela, asemela khatshana ebabukele bona bemi eceleni komfula uJodani. 8 U-Elija wathatha isembatho sakhe somphrofethi+ wasigoqa watshaya ngaso amanzi ehlukana, amanye aba sesandleni sokudla amanye kwesenxele, bachapha emhlabathini owomileyo.+
9 Bathi sebechaphile, u-Elija wathi ku-Elisha: “Cela ofuna ngikwenzele khona ngingakasuswa kuwe.” Ngakho u-Elisha wathi: “Ngicela ukuthi ngiphiwe umoya* wakho+ uphindwe kabili.”*+ 10 U-Elija wamphendula wathi: “Ucele into enzima. Nxa ungangibona sengisuswa kuwe, okucelileyo kuzakwenzakala. Kodwa nxa ungasangibonanga, akusoze kwenzakale.”
11 Bathi belokhu behamba bexoxa, kwathutsha inqola yomlilo lamabhiza omlilo+ kwabehlukanisa, u-Elija wasephakanyiselwa emazulwini* ngesiphepho.+ 12 U-Elisha yena wayebukele ememeza esithi: “Baba, baba! Inqola yempi yako-Israyeli labagadi bamabhiza!”+ Wathi engasamboni u-Elija, wabamba izembatho zakhe wazidabula.+ 13 Ngemva kwalokho wadobha isembatho somphrofethi+ u-Elija esasiwile, wasebuyela emuva wayakuma ekhunjini lomfula uJodani. 14 Wathatha isembatho somphrofethi u-Elija esasiwile, watshaya ngaso amanzi esithi: “Ungaphi uJehova uNkulunkulu ka-Elija?” Wathi ewatshaya ehlukana, amanye aba sesandleni sokudla amanye kwesenxele, wasechapha.+
15 Amadodana abaphrofethi ayeseJerikho athi embona esesekhatshana athi: “Umoya ka-Elija usuyehlele ku-Elisha.”+ Yikho aphuma amhlangabeza afika aguqa phambi kwakhe athi mbo phansi ngobuso. 16 Asesithi kuye: “Phakathi kwezinceku zakho kulamadoda angu-50 aqinileyo. Sicela usivumele siwathume ayedinga inkosi yakho. Mhlawumbe umoya kaJehova uyiphakamise wayayilahlela kwenye intaba kumbe kwesinye isigodi.”+ Kodwa yena wathi: “Lingabathumi.” 17 Amadodana abaphrofethi aqhubeka elokhu emncenga waze waba lenhloni, wasesithi: “Bathumeni.” Athuma amadoda angu-50, ahamba ayamdinga okwamalanga amathathu kodwa awamtholanga. 18 Athi ephenduka yena wayeseJerikho.+ U-Elisha wathi kuwo: “Angithi ngilitshelile ukuthi lingahambi.”
19 Ngemva kwesikhathi amadoda ayehlala edolobheni athi ku-Elisha: “Sithemba uyabona nkosi ukuthi idolobho leli lisendaweni enhle,+ kodwa amanzi alapha mabi futhi ilizwe alitheli.” 20 U-Elisha wathi: “Ngiphani umganu omutsha omncane, lifake isawudo phakathi kwawo.” Basebewuletha kuye, 21 yena waya emthonjeni wamanzi wafika waphosela isawudo phakathi kwawo+ wathi: “Nanku okutshiwo nguJehova, ‘Amanzi la sengiwelaphile. Awasoze aphinde abangele ukufa kumbe ukuthi abesifazana babe zinyumba.’” 22 Kuze kube lamuhla amanzi lawo alokhu ehlambulukile njengokutsho kuka-Elisha.
23 Wasuka lapho waya eBhetheli. Wathi esahamba endleleni kwaphuma abanye abafana edolobheni baqalisa ukumchothoza+ besithi: “Hamba wena mpabanga! Hamba wena mpabanga!” 24 U-Elisha wacina etshibilika ebakhangela, wasebaqalekisa ngebizo likaJehova. Kwaphuma amabhere amabili amasikazi+ adabudabula abangu-42 ababulala.+ 25 U-Elisha waqhubeka ehamba waze wayafika entabeni iKhameli.+ Wathi esuka lapho wabuyela eSamariya.