U-Isaya
30 “Maye kuwo amadodana ayiziqholo,”+ kutsho uJehova.
“Azenzela okusemakhanda awo, okungaveli kimi,+
Enza izivumelwano* kodwa engazenzi ngomoya wami,
Ukuze angezelele isono phezu kwesono.
3 Kodwa ukuvikelwa nguFaro kuzalenza libe lenhloni,
Lokuphephela emthunzini weGibhithe kuzalenza liyangeke,+
4 Ngoba iziphathamandla seziye eZowani,+
Izithunywa sezifike eHanesi.
5 Bonke bazayangeka
Ngenxa yabantu abangeke babancede ngalutho,
Abantu abangasizi ngalutho labangelanzuzo,
Kodwa abathelela inhloni lehlazo kuphela.”+
6 Isimemezelo salokho okuzakwehlela izilo zaseningizimu:
Badabula elizweni lokuhlupheka lobunzima,
Elilezilwane, izilwane ezibhongayo,
Elilamabululu lezinyoka eziphaphayo ezilobuhlungu obutshisayo,
Bethwele inotho yabo emihlane yabobabhemi,
Lempahla yabo ngamalunda amakamela.
Kodwa izinto lezi azisoze zibancede abantu.
7 Uncedo lweGibhithe ngeke lusebenze ngitsho.+
Yikho ngiyibiza ngokuthi: “URahabi+ ohlezi enganyikinyeki.”
8 “Khathesi hamba uyekubhala lokhu elitsheni* eliyisicecedu, ukubhale bekhangele.
10 Bathi kubaboni, ‘Lingaboni,’
Kwababona imibono bathi, ‘Lingasitsheli imibono eliqiniso.+
Sitsheleni okuzasiqumbaqumba, bonani imibono engamanga.+
11 Phambukani endleleni, sukani emgwaqweni.
Yekelani ukusitshela ngoNgcwele ka-Israyeli.’”+
12 Yikho-ke, nanku akutshoyo oNgcwele ka-Israyeli:
“Njengoba lingalamukeli ilizwi leli,+
Lithemba ukudlelezela lobuqili,
Njalo libambelele ezintweni lezi,+
13 Selinjengomduli olomkenke ngenxa yecala lenu,
Njengomduli omude futhi otshekileyo osuzakuwa.
Uzakuwa masinyane ngokucwayiza kwelihlo,
14 Udilike njengembiza enkulu yombumbi,
Ephahlazeka kusale kungela ngitsho lolulodwa udengezi
Lokokha amalahle avuthayo eziko,
Loba isiqephu sokukha amanzi echibini.”*
15 Nanku okutshiwo yiNkosi Enkulu uJehova, oNgcwele ka-Israyeli:
“Nxa lingaphenduka kimi njalo liphumule, lizasindiswa,
Lizakuba lamandla nxa lingahlaliseka futhi lingithembe.”+
Kodwa lina belingafuni.+
16 Esikhundleni salokho lithe: “Hatshi, sizabaleka ngamabhiza!”
Lakanye lizabaleka sibili.
Lathi: “Sizagada amabhiza agijima ngesiqubu esikhulu!”+
Yikho abalixotshanisayo bazabe begijima ngesiqubu esimangalisayo.+
17 Abayinkulungwane bazaqhuqha ngenxa yomuntu oyedwa obasongelayo,+
Lizabaleka ngenxa yabantu abahlanu abalisongelayo,
Kuze kuthi abaseleyo benu babe njengensika esesiqongweni sentaba,
Lanjengogodo oluyisibonakaliso oluphezu koqaqa.+
Ngoba uJehova nguNkulunkulu owahlulela kuhle.+
Bayathokoza bonke abaqhubeka bemlindele.*+
19 Nxa abantu sebehlala eZiyoni, khona kanye eJerusalema,+ awusoze ukhale loba sekutheni.*+ Uzathi ekuzwa ukhalela uncedo akwenzele umusa, uzakuphendula esanda kukuzwa nje.+ 20 Lanxa uJehova ezakupha ukuhlupheka kube yisinkwa, lokuhlukuluzwa kube ngamanzi okunatha,+ uMfundisi wakho omkhulu kasoze aphinde azifihle njalo uzambona ngamehlo akho uMfundisi wakho omkhulu.+ 21 Nxa lingaphambuka liye kwesokudla loba kwesenxele,+ ngamunye wenu uzakuzwa ilizwi ngemva kwakhe lisithi, “Le yiyo indlela.+ Hambani ngayo.”
22 Lizangcolisa izithombe zenu ezibazwe zahuqwa ngesiliva kanye lezithombe zenu zensimbi ezinanyekwe ngegolide.+ Lizazilahlela khatshana njengelembu elisetshenziswe ngowesifazana osesikhathini, lithi kuzo, “Hambani khatshana!”*+ 23 UNkulunkulu uzakwenza izulu line ukuze inhlanyelo eliyihlanyele emhlabathini imile+ futhi amabele aphuma emhlabathini azakhipha isinkwa esinengi esakha umzimba.+ Ngalolosuku izifuyo zenu zizakudla emadlelweni abanzi.+ 24 Inkomo labobabhemi elilima ngakho kuzakudla ukudla okuhlanganisiweyo okuhle kakhulu, okuyelwe ngefotsholo langefologwe. 25 Kanti njalo ngelanga lokubulawa okukhulu lapho imiphotshongo isiwa kuzakuba lezifula lemisele yamanzi+ kuzo zonke izintaba ezinde lakuwo wonke amaqaqa aphakemeyo. 26 Ukukhanya kwenyanga egcweleyo kuzakuba njengokukhanya kwelanga. Lokukhanya kwelanga kuzakuba lamandla aphindwe kasikhombisa,+ njengokukhanya kwamalanga ayisikhombisa, ngosuku uJehova azabopha ngalo ukwephuka kwabantu bakhe,+ elaphe lenxeba elikhulu elabangelwa yikubatshaya kwakhe.+
27 Khangelani! Ibizo likaJehova liyeza livela khatshana,
Ngokutshisa kolaka lwakhe langamayezi ajiyileyo.
Indebe zakhe zigcwele intukuthelo,
Ulimi lwakhe lunjengomlilo otshabalalisayo.+
28 Umoya wakhe unjengesifula esigcweleyo esilamanzi akhawula entanyeni,
Unyikinya izizwe phakathi kwesefa yokubhubhisa,
Izizwe zizafakwa amatomu emihlathini yazo+ ukuze ziphanjulwe.
29 Kodwa ingoma yenu izakuba njengengoma ehlatshelwa ebusuku,
Inhliziyo zenu zizathokoza njengomuntu
Ohamba ethwele ifluthi
Esiya entabeni kaJehova, yena oliDwala lika-Israyeli.+
30 UJehova uzakwenza ilizwi lakhe elikhulu+ lizwakale,
Uzaveza ingalo yakhe+ nxa isisehla ngolaka oluvuthayo,+
Langelangabi lomlilo otshabalalisayo,+
Langezulu elikhulu+ langesiphepho kanye lamatshe esiqhotho.+
32 Kuzakuthi loba nini lapho uJehova etshaya ama-Asiriya
Ngentonga yakhe yokujezisa,
Kuzazwakala umsindo wamathamborini lamahabhu,*+
Ngesikhathi ephakamisa ingalo yakhe ukuze amelane labo empini.+
Indawo yokubuthelela inkuni iyatshona futhi ibanzi,
Ilomlilo omkhulu kanye lenkuni.
Umoya kaJehova onjengesifula sesalufa
Uzayilumathisa ngomlilo.